جەكسەنبى, 2 قازان 2022
جازىلعان جايدىڭ جالعاسى... 1660 19 پىكىر 10 تامىز, 2022 ساعات 12:43

بەكبولات تىلەۋحان: وللاحي، بۇل جالا!

وسىعان دەيىن «ulysmedia.kz» سايتى ءماجىلىستىڭ بۇرىنعى دەپۋتاتى بەكبولات تىلەۋحاننىڭ تۇركيا ازاماتتىعىن الۋعا ءوتىنىش بەرگەنى تۋرالى حابارلاعان ەدى.

«Ulysmedia.kz» پورتالىنا كەلىپ تۇسكەن دەرەككوزگە سايكەس، بەكبولات تىلەۋحان تۇركياعا ءۇشىنشى ايەلى جانار تاپەنوۆامەن بىرگە كەتكەن. ودان التى بالاسى بار. ىستانبۇل قالاسىندا بۇل كۇندە ولار بالالارىمەن بىرگە ساتىپ العان پاتەرىندە تۇرادى.

جانار تاپەنوۆا تۇركياعا كەتەر الدىندا جاقىن تۋىسىنىڭ بىرىنە وزىنە تيەسىلى استانانىڭ سول جاعالاۋىنداعى كوپقاباتتى ۇيدەگى ەكى پاتەر مەن شۇبار اۋدانىنداعى جەر ءۇيدى ساتۋدى تاپسىرىپ كەتكەن.

ىستانبۇلدا جۇرگەن كەزدە ورازادا بەكبولات تىلەۋحان سونداعى قانداستاردى جيناپ، اۋىزاشار بەرگەن. تۇركيا پرەزيدەنتىنىڭ ۇلى ءبىلال ەردوعانمەن كەزدەسكەن. ەكس-دەپۋتات ازىرگە قازاقستانعا قايتپايتىن سەكىلدى. سەبەبى ەرلى-زايىپتى تۇركيا ازاماتتىعىن الۋعا ءوتىنىش بەرگەن. ازىرگە ولار سوندا ىقتيارحاتپەن تۇرىپ جاتىر»، - دەپ جازعان ەدى «ulysmedia.kz».

بەكبولات تىلەۋحان: قازاقستاننىڭ كوك پاسپورتىنان ايىرىلاتىن ويىم جوق!

بەكبولات تىلەۋحان مىرزانىڭ ءوزى بۇل اقپاراتتى جوققا شىعارىپ ارنايى مالىمدەمە جاسادى. بۇل تۋرالى «Skifnews.kz» اقپارات پورتالى جازدى.

ونىڭ ايتۋىنشا، بۇل «كەيبىر سايقال ساياساتكەرلەردىڭ قيسىنسىز جالاسى». سونىمەن قاتار ول وزىنە قاتىستى جالعان اقپارات تاراتقانداردى سوتقا بەرەتىنىن جەتكىزدى.

«بۇل مالىمدەمەگە سەبەپ بولىپ وتىرعان دۇنيە – كوپتەگەن باۋىرلارىمنىڭ جازىپ جاتقان پوستتارى. اقىلعا سىيمايتىن نارسە عوي، ەل نانبايتىن شىعار دەپ ويلاعان ەدىم. سويتسەم، كادىمگىدەي ەل يلانىپ جاتىر. «باسقا ەلدىڭ ازاماتتىعىن الۋعا ءوتىنىش بەرىپتى» دەگەنگە ەل يلانىپ، كادىمگىدەي نانىپ جاتىر. اقىلعا سىيمايتىن، قيسىنعا تومپاق كەلەتىن نارسەگە نانىپ جاتىر.

مەنىڭ اڭعال، باتىر، نانعىش، مەن ءۇشىن اياۋلى بولعان كەيبىر باۋىرلارىمنىڭ وزدەرى نانىپ، شاشىپ پوست جازعانىن كورگەن كەزدە ءبۇيتىپ مالىمدەمە جاساماسا بولمايتىنىنا كوزىم جەتىپ ايتىپ وتىرمىن.

قادىرلى، باۋىرلارىم! مەن ەشبىر بوتەن ەلدىڭ ازاماتتىعىنا ءوتىنىش بەرگەن جوقپىن! اللا كۋا!

قازاقستاندا قوس ازاماتتىققا تىيىم سالىنعان. قازاقستاننىڭ كوك پاسپورتىنان ايىرىلاتىن ويىم جوق. سايقال ساياساتكەرلەردىڭ قيسىنسىز جالاسى بۇل! نانباڭىزدار!

«ۇلىسمەديانى» سوتقا بەرەم! سوتتا كەزدەسەمىز امانشىلىق بولسا!

ەشقاشان وتىرىككە سەنبەڭىزدەر!»، - دەپ اتاپ وتكەن ول ءوزىنىڭ اۋديوجازبا جازباسىندا.

Abai.kz

19 پىكىر