بەيسەنبى, 6 قازان 2022
بيلىك 1167 4 پىكىر 20 ماۋسىم, 2022 ساعات 13:36

قازاقستان الەمدى يادرولىق قارۋدان باس تارتۋعا شاقىردى

قازاقستان سىرتقى ىستەر ءمينيسترى مۇحتار تىلەۋبەردى باسىلىمدارعا جاريالاعان ماقالاسىندا الەم ەلدەرىن بۇۇ-نىڭ ءجۇز جىلدىعىن قاراي، ياعني 2045 جىلعا دەيىن يادرولىق قارۋدان باس تارتۋ جوسپارىن جاساۋعا شاقىردى.

ء"بىز بارلىق مەملەكەتتى، سونىڭ ىشىندە يادرولىق دەرجاۆالاردى بۇۇ-نىڭ 100 جىلدىعىنا قاراي 2045 جىلعا قاراي يادرولىق قارۋدى تولىعىمەن جويۋدىڭ كەزەڭدىك جوسپارىن ازىرلەۋگە شاقىرامىز. وسى ماقساتقا جەتۋ جونىندەگى ۇسىنىستار مەن كەلىسىمدەر ەكى تاراپتىڭ دا يادرولىق قارۋعا تىيىم سالۋ تۋرالى شارتتىڭ ءبىرىنشى كونفەرەنتسياسى جانە شولۋ كونفەرەنتسياسى قورىتىندى قۇجاتتارىندا كورىنىس تابۋى مۇمكىن" ەدى تىلەۋبەردى ماقالاسىندا.

قازاقستان سىرتقى ىستەر ءمينيسترى ماقالاسىن 21-23 ماۋسىمدا ۆەنادا وتەتىن يادرولىق قارۋعا تىيىم سالۋ تۋرالى شارتقا قول قويعان ەلدەردىڭ العاشقى كەزدەسۋى قارساڭىندا جاريالادى.

"بۇۇ باس حاتشىسى انتونيۋ گۋتتەريش قازىر الەمدە شامامەن 13400 يادرولىق جارىلعىش زات بارىن اتاپ ءوتتى. قازىر يادرولىق قارۋدى قولدانۋ قاۋپى ارتتى. ۋكرايناداعى اسكەري قاقتىعىس كەزىندە يادرولىق قارۋ قولدانۋ تۋرالى ءسوز شىعىپ جاتىر، دەمەك بىزگە بىرىگىپ ادامزاتقا قاۋىپ توندىرەتىن قورقىنىشتى قارۋعا تىيىم سالۋ جانە جويۋدى ويلاۋىمىز كەرەك" دەپ جازدى تىلەۋبەردى.

الەمدە يادرولىق قارۋ قولدانۋ قاۋپى ۋكرايناداعى سوعىس كەزىندە قايتا ءتوندى. رەسەي پرەزيدەنتى ۆلاديمير پۋتين اقپاندا زىمىران-يادرولىق كۇشتەرىن كۇشەيتىلگەن رەجيمگە كوشىرۋگە بۇيرىق بەرگەن. وسىدان سوڭ ساراپشىلار ۋكرايناداعى سوعىستا ساتسىزدىككە ۇشىراعان ءارى باتىس سانكتسياسىنا تاپ بولعان رەسەي اسكەري قاقتىعىستا يادرولىق قارۋ قولدانا ما دەپ الاڭداعان ەدى.

قازاقستان مەن ۋكراينا سوۆەت وداعى قۇلاعان سوڭ يادرولىق قارۋىنىڭ باسىم بولىگىنەن باس تارتقان ەدى، ال 1993 جىلى قازاقستان يادرولىق قارۋدى تاراتپاۋ تۋرالى كەلىسىمگە قوسىلعان ەدى.

Abai.kz

4 پىكىر