جەكسەنبى, 25 قىركۇيەك 2022
بيلىك 1990 2 پىكىر 17 ماۋسىم, 2022 ساعات 18:53

ءماجىلىستىڭ جانىنان قوعامدىق پالاتا قۇرىلادى

بۇگىن ءماجىلىس سپيكەرى ەرلان قوشانوۆتىڭ توراعالىعىمەن بيۋرو وتىرىسى ءوتىپ، وندا الداعى جالپى وتىرىستىڭ كۇن ءتارتىبىنىڭ جوباسى ناقتىلاندى.

وتىرىستا دەپۋتاتتار جاڭا ديالوگ الاڭىنا اينالاتىن پارلامەنت ءماجىلىسى جانىنان قوعامدىق پالاتا قۇرۋ تۋرالى باستامانى قولدادى. بۇل تۋرالى الداعى جالپى وتىرىستا جان-جاقتى تالقىلاناتىن بولادى. ونىڭ قۇرامىنا بەدەلدى ساراپشىلار، قوعام قايرەتكەرلەرى، ساياسي پارتيالار مەن باق وكىلدەرى كىرەدى دەپ كۇتىلۋدە.

ءماجىلىس جانىنان قوعامدىق پالاتا قۇرۋ تۋرالى باستامانى ءماجىلىس توراعاسى ۇلتتىق قۇرىلتايدىڭ ءبىرىنشى وتىرىسىندا ايتتى. ول دەپۋتاتتاردىڭ قاراۋىنداعى زاڭ جوبالاردى اشىق تالقىلاۋعا، قوعامدى تولعاندىراتىن باسقا دا ماڭىزدى ماسەلەلەر  بويىنشا پىكىر الىساتىن ورىن بولماق. سونىمەن قاتار قوعامدىق پالاتا ۇلتتىق قۇرىلتايدا قابىلداناتىن شەشىمدەردى، سونداي-اق باسقا دا قوعامدىق جانە الەۋمەتتىك ماڭىزى بار باستامالاردى زاڭنامالىق ىسكە اسىرۋ الاڭىنا اينالادى.

سونداي-اق ءماجىلىس الداعى جالپى وتىرىستا «گەودەزيا، كارتوگرافيا جانە كەڭىستىكتىك دەرەكتەر تۋرالى» جانە وعان ىلەسپە زاڭ جوبالارىن ءبىرىنشى وقىلىمدا قارايتىن بولادى. زاڭ جوباسى گەودەزيالىق جانە كارتوگرافيالىق قىزمەت سۋبەكتىلەرى قىزمەتىنىڭ جاڭا جانە جەتىلدىرىلگەن تەتىكتەرىن ەنگىزۋ ماقساتىندا ازىرلەنگەن. قۇجات گەودەزيالىق، كارتوگرافيالىق قىزمەتتى رەتتەۋدىڭ، وسى سالاداعى مەملەكەتتىك باقىلاۋدى جەتىلدىرۋدىڭ جالپى تانىلعان حالىقارالىق قاعيداتتارى مەن تاسىلدەرىن ەنگىزۋگە باعىتتالعان.

جالپى وتىرىستا پالاتا كوميتەتى «ەۋرازيالىق ەكونوميكالىق وداقتىڭ تەحنيكالىق رەگلامەنتتەرى تالاپتارىنىڭ ساقتالۋىنا مەملەكەتتىك باقىلاۋدى (قاداعالاۋدى) ەۋرازيالىق ەكونوميكالىق وداققا مۇشە مەملەكەتتەردىڭ كورسەتىلگەن سالاداعى زاڭناماسىن ۇيلەستىرۋ ماقساتىندا جۇزەگە اسىرۋ قاعيداتتارى مەن تاسىلدەرى تۋرالى كەلىسىمدى راتيفيكاتسيالاۋ تۋرالى» زاڭ جوباسىن جۇمىسقا الاتىن بولادى.

 

Abai.kz

2 پىكىر