بەيسەنبى, 28 ناۋرىز 2024
ماسقارا! 3366 7 پىكىر 17 ماۋسىم, 2022 ساعات 15:02

قوستاناي شەندىلەرى احاڭ تۋعان ءۇيدى بۇزىپ تاستادى

ۇلت ۇستازى احمەت بايتۇرسىنوۆتىڭ قوستانايداعى تۋىپ-وسكەن ءۇيىن مەردىگەرلەر تۇگىن قالدىرماي بۇزىپ تاستاعان. 2009 جىلى اۋىل تۇرعىندارى بايتۇرسىنوۆتىڭ كىندىك قانى تامعان تامنىڭ ىرگەتاسىنان جوعارى بويلاي ەسكەرتكىش رەتىندە ەكى بولمەلى ءۇي كوتەرگەن.

ولار باسپانانى تاريحي جادىگەر رەتىندە ساقتاپ، كۇتىپ ۇستاعان. بىراق بيىل مامىر ايىندا بايتۇرسىنوۆتىڭ تۋعان ءۇيى تەندەرگە ءتۇسىپ، مەردىگەرلەر باسپانانىڭ استاڭ-كەستەڭىن شىعارىپ بۇزىپ تاستاپ، قۇرىلىس جۇمىسىن باستايدى.

«مىناۋ ارادا احمەتتىڭ بۇرىنعى ءۇيىنىڭ ءىزى بولعان. فۋندامەنتى بۇنىڭ قارا شىمنان كەسەكتەن سالىنعان ەدى. مىنە، قاراپ وتىرساڭدار جوباسى وسى جەردەن. مىناۋ ارادا پەشپەن بولىنگەن ەدى. سول پەشپەن بولىنگەن بۇرىشتا ءبىزدىڭ احمەت اتامىزدىڭ ۇيىندەگى اجەمىز وسى جەردە احمەت اتامىزدى دۇنيەگە اكەلدى-اۋ دەپ ءوزىمىز ويلايتىن ەدىك. استان-كەستەنى شىققان. ءىزى دە قالماعان، دىمى دا قالماعان. ەڭ سوڭعى احمەتتىڭ وزىمىزدە بار ەسكەرتكىشىنەن ايىرىلىپ قالىپ تۇرمىز»، – احمەت بايتۇرسىنۇلى اۋىلىنىڭ تۇرعىنى جاقسىبەك ابدىسالىق.

نە سەبەپتى ەكەنى بەلگىسىز 22 ميلليون تەڭگە بولىنگەن قۇرىلىس ورتا جولدا توقتاپ قالادى. ءارى نىساندى جاڭعىرتۋ جاۋاپكەرشىلىگى جۇكتەلگەن مەكەمەنىڭ ساپاسىز ماتەريال پايدالانعانى تۋرالى الەۋمەتتىك جەلىدە بەينەجازبالار تارادى. قۇرىلىسقا ادام قولى تيسە ۇگىتىلىپ قويا بەرەتىن قۇم كىرپىشتەر قولدانىلعانى ايتىلدى.

ال، شەنەۋنىكتەر «احمەتتىڭ ءۇيىن بۇزۋدى جەرگىلىكتى تۇرعىندار سۇرادى»، دەيدى. «ەكى اۋىلدىڭ تۇرعىندارى ءۇيدىڭ اپاتتى جاعدايدا ەكەنىن ايتىپ، ماسەلە كوتەردى. اۋدان، وبلىس اكىمدىكتەرىنە جۇگىندى. سوندىقتان ءبىز وسىنداي شەشىم قابىلدادىق»، – دەدى احمەت بايتۇرسىنۇلى اۋىلىنىڭ اكىمى نۇرسۇلتان ءبايدىلدين.

قازىر ۇلت ۇستازىنىڭ ءۇيىن قايتا سالۋ ءۇشىن جاڭا مەردىگەرلەر ىزدەستىرىلىپ جاتىر جانە جوبانىڭ قۇنى 37 ميلليونعا دەيىن وسكەن.

«جوبا بويىنشا 149 شارشى مەتر. تۇرعىن ءۇيدى مۋزەي ءۇي ەتىپ، قايتا قالپىنا كەلتىرۋ جۇمىستارىن جۇرگىزەدى. جوباسى 20 ماۋسىمدا الىنادى. پسد-نى جوبالاۋعا 1,2 ملن تەڭگە دەمەۋشىلەر اتىنان ىستەلەدى. ال ەندى ءۇيدىڭ قۇنى 37 ملن بوپ تۇر. ەكسپەرتيزاعا دەيىن. ەندى ول وزگەلەردى ءالى»، – جانگەلدى اۋداندىق قۇرىلىس ءبولىمىنىڭ باسشىسى ادىلبەك يمانعاليەۆ.م

وزگە ەلدەر تاريحي قۇندىلىعىن شاشاۋ شىعارماي جيناپ، بىرنەشە عاسىرلىق مۇراسىن بارىنشا ءوز قالپىندا ساقتاۋعا تىرىسادى. جاساندىدىنىڭ اتى جاساندى ەكەنىن تەرەڭ ۇعىنادى.

وسى وقيعا تۋرالى جازۋشى ەلدوس توقتارباي ءوزىنىڭ ينستاگرام پاراقشاسىندا بىلاي دەپ جازدى:

«ۇلت ۇستازى، عاسىر پەرزەنتى، مەملەكەت جانە ساياسي قايراتكەر احمەت بايتۇرسىنۇلى تۋعان تاريحي ءۇيدىڭ ىرگەتاسىن كورگەنمىن. تاريح ەدى!

نەشە كۇننەن بەرى تورعايدان جەتكەن ۆيدەونى كورىپ، جۇرەك اۋىرادى. اقساقال جىلاپ تۇر! ونىڭ جۇرەگى جىلاپ تۇر! موجانتوپايلار تاريحي ءۇيدىڭ ىرگەتاسىن قوپارىپ، جەرمەن-جەكسەن ەتتى. تاريحتىڭ قويىپ كەتكەن كوزىندەي بولعان قۇندىلىقتى قۇلاتتى دا تاستادى. جەر قۇرىپ قالعانداي سول ءۇيدىڭ ىرگەتاسىن بۇزىپ، سونىڭ ۇستىنە ءۇي سالاتىنداي نە كۇن تۋدى باسىمىزعا؟!

قۇرمەتتى پرەزيدەنت!

كۇندەر زۋلاپ، ايلار زىمىراپ ءوتىپ جاتىر… ءوتىپ جاتىر… ۇلت ۇستازىنىڭ تويى 5 قىركۇيەك تە وتەدى… نە دايىندىعىمىز بار ءوزى؟! الاڭ كوڭىل… تورعاي-انا قاشان تەڭدىگىن الىپ، ءوز الدىنا بولەك وبلىس بولادى؟! قازاقتىڭ قۇتى بولعان قاراشاڭىراق قاشانعى قوستانايعا تەلمىرىپ تۇرار ەكەن؟!

جاڭا قازاقستان ادىلەتسىزدىكتى قالپىنا كەلتىرەدى دەيدى. تورعايعا كەلگەندە قاشان ادىلەتتى بولار ەكەن…

قايران، احمەت كوكە! «ەل - بۇگىنشىل، مەنىكى - ەرتەڭ ءۇشىن» دەپ ءوتىپ ەدىڭىز وسى ۇرپاق ءۇشىن… سول قادىرىڭە جەتە المادىق… ءوزىڭ ايتقانداي، «دۇنيەنىڭ كىلتى قولىمدا بولسا، قازاققا ۇجماق قىلار ەدىم!» دەمەكشى، ءبىزدىڭ دە قولدا سول كىلت بولسا، ۇجماق قىلىپ، تويىڭدى كەمشىلىكسىز وتكەرەر ەدىك… كەش ءبىزدى، كەشە گور، ارداقتىم!» - دەپ جازدى جازۋشى.

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3508