جۇما, 7 قازان 2022
بيلىك 1558 1 پىكىر 17 ماۋسىم, 2022 ساعات 14:01

جاڭاوزەن اكىمى ەرەۋىلشىلەردى سابىرعا شاقىردى

ارداقتى اعايىن، قۇرمەتتى جەرلەستەر!

بۇگىنگى كۇنى جاڭاوزەن قالاسىنداعى 5 مەكەمەدە ەڭبەك داۋى ءجۇرىپ جاتىر. كومپانيا وكىلدەرى كۇنى كەشە، 15 ماۋسىمدا قالا اكىمدىگىنىڭ الدىنا جينالىپ، بەينەۇندەۋ جولداعان بولاتىن.

قولدانىستاعى زاڭناماعا سايكەس قىزمەتكەر مەن جۇمىس بەرۋشى اراسىنداعى ەڭبەك داۋلارى بەلگىلى ءبىر تارتىپپەن ءجۇرۋى ءتيىس. بۇل ەكى تاراپتىڭ ءوز ۇستانىمدارىن ەگجەي-تەگجەيلى تۇسىندىرە وتىرىپ، قاراما-قارسى دالەلدەردى تىڭداي الاتىن سىندارلى ديالوگ جولى.

الايدا، كوپ جاعدايدا تاراپتاردىڭ ءبىرى بەلگىلەنگەن ءتارتىپتى ەلەمەي، ءوز ماسەلەلەرىن ۋلتيماتۋم قويۋ ارقىلى، زاڭسىز ەرەۋىلدەر وتكىزۋ ارقىلى شەشكىسى كەلەدى. وكىنىشكە وراي، مۇنداي جاعدايعا ارانداتۋشىلاردىڭ سوزىنە ەرگەن كاسىپورىن قىزمەتكەرلەرى بارىپ جاتادى.

بۇل جاعدايدا جۇمىس بەرۋشى ەرەۋىلدى زاڭسىز دەپ تانۋ ءۇشىن سوتقا جۇگىنۋگە جانە سوت وڭ شەشىم قابىلداعان جاعدايدا جۇمىستان بوساتۋعا دەيىن شارالار قابىلداۋعا قۇقىلى.

جاڭاوزەن قالاسى اكىمدىگىنىڭ الدىندا تۇرعان جۇمىسشىلاردىڭ بۇرىن ەڭبەك ەتكەن كومپانيالارى بۇگىنگى كۇنى شتاتتىق رەجيمدە جۇمىس ىستەۋدە. جۇمىس بەرۋشىلەر كەلىسسوز كەزىندە قىزمەتكەرلەرىنە بارلىق زاڭداردى العا تارتا وتىرىپ، زاڭسىز ارەكەتتەر جاساماۋعا شاقىرعان. الايدا تۇسىندىرمە جۇمىستارى ناتيجەسىز اياقتالىپ، كومپانيا باسشىلىعى ۇجىمنىڭ وزگە قىزمەتكەرلەرىنە كەدەرگى كەلتىرگەن ازاماتتاردى سوتقا بەرىپ، جۇمىستان شىعارۋعا ءماجبۇر بولدى.

سوت شەشىمىمەن جۇمىستان بوساپ قالعان جۇمىسشىلار قالا اكىمدىگىنە بۇرىنعى جۇمىسىنا قايتارۋدى تالاپ ەتىپ كەلدى. الايدا، مەملەكەتتىك ورگانداردىڭ جەكە كومپانيالارعا قانداي دا ءبىر ادامدى جۇمىسقا ورنالاستىرۋ تۋرالى نۇسقاۋ بەرۋىنە قۇقىعى جوق.

ءبىز ارىپتەستەرىمىزبەن وسى كومپانيالاردىڭ جۇمىس بەرۋشىلەرىمەن جانە جۇمىسشىلارىمەن بىرنەشە رەت كەزدەسىپ، سويلەستىك. ءبىز ماسەلەنى داۋ-دامايسىز شەشۋگە شاقىردىق. جۇمىس بەرۋشى قىزمەتكەرلەرىنە ءادىل بولىپ، ەڭبەك ەتۋلەرىنە قولايلى جاعداي جاساۋعا تىرىسۋلارى قاجەت. ال، قىزمەتكەر ەڭبەك شارتىندا كورسەتىلگەن مىندەتتەمەلەردى ادال ورىنداۋعا ءتيىس.

ەرەۋىلگە شىققان بارلىق قىزمەتكەرلەرگە زاڭسىز ارەكەتتەرى ءۇشىن جۇمىستان شىعىپ قالۋلارى مۇمكىن ەكەندىگى ەسكەرتىلدى. الايدا، مۇنى ءتۇسىنىپ، ەرەۋىلگە شىققان جۇمىسشىلار ەرەۋىلدى توقتاتۋدان جانە جۇمىسىن قايتا باستاۋدان باس تارتتى.

وكىنىشكە وراي، كوپ جاعدايدا تاراپتار كونسترۋكتيۆتى ديالوگقا كەلمەي، ماسەلەنى زاڭسىز ميتينگىلەر مەن ەرەۋىلدەر ارقىلى شەشۋگە ۇمتىلادى. بۇنىڭ سوڭى جاقسىلىققا اكەلمەيدى.

جۇمىس بەرۋشى جۇمىسشىلاردىڭ شتاتى مەن قىزمەتكەرلەردىڭ جالاقىسىن اۋادان الىپ، كوبەيتە المايدى. بۇل نارىق زاڭى. ەگەر جۇمىس بەرۋشىنىڭ قارجىلىق جاعدايى تومەندەسە، ءوندىرىس كولەمى مۇلدەم جوعالىپ، تاپسىرىس بەرۋشىنىڭ الدىنداعى مىندەتتەمەلەرىن ورىنداي الماي قالادى. ول قىزمەتكەرلەردىڭ جۇمىسسىز قالۋىنا الىپ كەلۋى مۇمكىن.

قادىرلى جەرلەستەر!

الەمدەگى كۇردەلى ەكونوميكالىق جانە گەوساياسي جاعدايدى ەسكەرە وتىرىپ، قازىرگى ۋاقىتتا بارىمىزگە بىرلىك پەن شىدامدىلىق تانىتۋ قاجەت.

سونداي-اق بىزگە بەكىتىلگەن الگوريتمنەن اينالىپ ءوتىپ، مۇناي سالاسىنا كەزەكسىز جۇمىسقا ورنالاسۋدى تالاپ ەتەتىن جۇمىسسىزدار ساناتىنداعى ازاماتتار ءوتىنىش بىلدىرۋدە. مەن ولارعا بۇل جونىندە ءبىر ەمەس بىرنەشە رەت ايتتىم. تاعى قايتالاپ ايتامىن - كەزەكتەن تىس جۇمىسقا ورنالاسۋعا بولمايدى، ويتكەنى بۇل كەزەكتە تۇرعان باسقا كانديداتتارعا ادىلەتسىزدىك بولادى. ءسىزدىڭ كەزەگىڭىز كەلگەنشە، ءوز كەزەگىڭىزدى ساقتاي وتىرىپ، جۇمىسپەن قامتۋ ورتالىعى ۇسىناتىن 150 000-نان 200 000 مىڭ تەڭگەگە دەيىنگى جالاقسى بار باسقا ورىنداردا جۇمىس ىستەي الاسىزدار.

مەن ءوز تاراپىمنان وسى پروتسەستىڭ اشىقتىعى مەن ادىلەتتى بولارىنا كەپىلدىك بەرەمىن.

زاڭسىز تالاپتاردىڭ سوڭى ءبىزدى ەشقانداي جاقسىلىققا اپارمايدى. ءبىز سيقىرشى ەمەسپىز جانە مۇناي سالاسىندا مىڭداعان جۇمىس ورىنى قىسقا مەرزىمدە قۇرا المايمىز. بىراق ءبىز قاراپ وتىرعان جوقپىز. شاعىن جانە ورتا بيزنەس كاسىپورىندارىندا جاڭا جۇمىس ورىندارىن اشىپ، وڭىرلىك مەملەكەتتىك باعدارلامالاردى ەنگىزە وتىرىپ، ەكونوميكانى ارتاراپتاندىرۋعا باسىمدىق بەرىپ جاتىرمىز.

بارشاڭىزدى قالامىزدى كوركەيتۋ ءۇشىن جۇدىرىقتاي جۇمىلىپ، اۋىزبىرشىلىكتە ەڭبەك ەتۋگە شاقىرامىن.

 

ايبەك قوسۋاقوۆ، جاڭاوزەن قالاسىنىڭ اكىمى 

Abai.kz

1 پىكىر