ۋكرايناعا اسكەري كومەك كورسەتۋ بويىنشا الەمدىك قاۋىمداستىقتىڭ بىرلەسكەن جۇمىسى جالعاسۋدا. اقش-تىڭ لەند ليز زاڭىنان بولەك، كيەۆكە كومەك كورسەتۋ بويىنشا الەمنىڭ 40-تان استام ەلى اي سايىن باس قوسىپ، قارۋ جەتكىزۋ جولىن تالقىلايتىن ارنايى فورمات قالىپتاسىپ ۇلگەردى. 

گەرمانيانىڭ رامشتاين اسكەري بازاسىندا ۋكرايناعا قارۋ جەتكىزۋ بويىنشا ارنايى كەزدەسۋ العاش رەت ءساۋىر ايىندا ءوتتى. ءبىرىنشى كەزدەسۋگە 40 مەملەكەت قاتىسىپ، ولار كيەۆكە جەڭىل اتىس قارۋ تۇرلەرىن بەرۋ بويىنشا كەلىستى. بۇل كەزدەسۋ ءداستۇرلى فورماتقا اينالىپ، مامىر ايىندا جالعاسىن تاپتى. مامىردىڭ 23-دە وتكەن رامشتاين-2 كەزدەسۋىنە ءبىرىنشى كەزدەسۋگە قاراعاندا كوبىرەك ەل قاتىستى.

كۇنى كەشە رامشتاين-3 كەزدەسۋى ءوتتى. اتالمىش جيىنعا 45 مەملەكەت قاتىستى. جيىندى اقش قورعانىس ءمينيسترى وستين اشىپ، ءسوز سويلەۋ بارىسىندا “ۋكرايناعا قولداۋ كورسەتۋ مەن قارۋ جەتكىزۋدى جىلدامداتۋ كەرەك، قارقىندى ازايتۋعا بولمايدى، ءباستىڭ باعاسى تىم ۇلكەن” دەدى.

رامشتايناعى كەزدەسۋدە سلوۆاكيا تىكۇشاقتار، كانادا، پولشا جىنە نيدەرلاندى ارتيللەريا قۇرىلعىلارىن تەز ارادا جەتكىزەتىنىن مالىمدەدى. سونىمەن قاتار گەرمانيا الىس قاشىقتىققا سوققى بەرۋگە قابىلەتتى زىمىران كەشەندەرىن بەرەتىنىن ايتتى. الايدا بەرلين ۋكراينا سوعىسىندا ءوز پوزيتسياسىن ناقتى ايتپاي، قارۋ بەرۋدى سوزبالاقتاپ جۇرگەن ەلدىڭ ءبىرى. سوندىقتان ساراپشىلار گەرمانيانىڭ سوزىنە قاتتى نازار اۋدارۋ قاتەلىك دەيدى.

پەنتاگون باسشىسى ۋكرايناعا قاجەتتى قارۋدى جىلدام جەتكىزۋ ارقىلى، باسقىنشى قولىنداعى اۋماقتى ازات ەتۋگە كومەكتەسەتىنىن ايتتى. " رەسەيدىڭ ۋكرايناعا باسىپ كىرۋى الەمدەگى جاعدايدى وزگەرتتى. سونىمەن بىرگە ءبىز ۋكراين حالقىنىڭ باتىرلىعى مەن قايسارلىعىنا كۋا بولدىق. ءبىز ۋكراينانى قولداۋدى توقتاتپايمىز", – دەدى وستين. وستين اقش تاراپىنان ۋكرايناعا بەرىلەتىن كومەكتى اتاپ ءوتتى.

18 دانا 155-ميلليمەترلى گاۋبيتسالارى;
36 مىڭ دانا 155-ميلليمەترلى سناريادتار;
18 دانا گاۋبيتسا تاسۋعا ارنالعان كولىك;
HIMARS زىمىران كەشەنىنە ارنالعان زىمىراندار;
Harpoon زىمىران كەشەنى جانە وزگە قارۋلاردى بەرمەك.

رەسەي "ۋكرايناعا قارۋ بەرۋ جاعدايدى تىم ۋشىقتىرادى" دەگەن پىكىرىن تاعى ءبىر مارتە ايتتى.

Abai.kz