جۇما, 29 ناۋرىز 2024
اقمىلتىق 3459 5 پىكىر 15 ماۋسىم, 2022 ساعات 14:50

كىم كەپىل: ەلىڭ بە، كرەمل مە؟

الگىننەن بەرى قازاقستاندىقتار ەلىمىزدىڭ تۇڭعىش پرەزيدەنتى نۇرسۇلتان نازارباۆتىڭ ماسكەۋگە بارعان ساپارىن تالقىلاپ جاتىر.

دالىرەك ايتساق، رەسمي باق جاعى - ءۇنسىز دەرلىك. كوبىنەسە، الەۋمەتتىك جەلىلەر مەن شەتەل باسىلىمدارى اڭگىمە قوزعاپ، سان قيلى بولجام جاساۋدا.

سىرتقى ىستەر ءمينيسترى تىلەۋبەردى جۋرناليستەرگە بەرگەن جاۋابىندا نازارباەۆ پەن ءپۋتيننىڭ نە تۋرالى سويلەسكەنىن بىلمەيتىنىن مالىمدەپتى.

قاڭتاردان كەيىن بۇرىن ەشكىم دە ء(بىز سياقتى وپپوزيتسيادان باسقا) سىناي المايتىن نازارباەۆ تۋرالى كەز كەلگەن ادام ويىنا كەلگەنىن ايتا باستاعان بۇل «قىزىق» كەزەڭدە مەن ول كىسى تۋرالى ءسوز قوزعاۋدى ادەيى توقتاتقانمىن: ونى تالاپ جاتقاندار مەنسىز دە جەتەدى دەپ.

بۇگىن، مىنا حاباردى ەستىپ، ورتاق تالقىلاۋعا ءبىر وي قوسقىم كەلگەنى.

ونىڭ اتى – كەپىل.

اۆتوريتارلىق جۇيەلەردە كەزىندە بيلىكتە بولعان، قىزمەت بابىن پايدالانعان، تالاي ادامعا تىزەسىن باتىرعان، بىرەۋدىڭ الا ءجىبىن اتتاعان باسشىلار يا ولە-ولگەنشە تاقتان ايرىلمايدى، يا بولماسا وزىنەن كەيىنگى مۇراگەردى ءوز قولىمەن تاعايىنداپ، سونىڭ ءتيىستى كەپىلدىگىن الادى. ياعني «ماعان، وتباسىما تيىسپەيسىڭ، جيعان-تەرگەنىم وزىمدە قالادى» دەگەندەي.

رەسەيلىك ەلتسين دە ءپۋتيندى تاعايىنداعاندا سويتكەن.

ءبىزدىڭ ەلباسى دا ءسويتتى ەمەس پە؟ ءوزىنىڭ اينالاسىنان توقاەۆتى تاڭداپ، وعان ءوز ورنىن بەردى. جوعارىدا ايتىلعان ءتيىستى كەپىلدىكتەر تۋرالى اڭگىمە بولعانى دا راس.

الايدا، ەكى جاقتىق كەلىسىم ورىندالماي قالدى.

وعان نە سەبەپ بولعانىن ءبىر قۇدايدىڭ ءوزى بىلەدى.

رەسمي دولبارعا سەنسەك، ەكەۋارا ۋاعدالاستىقتى «قاڭتار قاندى قىرعىنى» كەزىندە توقاەۆتى بيلىكتەن الاستاتامىز دەپ، نازارباەۆتىڭ وتباسى مۇشەلەرى ورەسكەل بۇزعان سەكىلدى.

ول تۋرالى وتباسى باسشىسى ءبىلدى مە، بىلمەدى مە، ونى دا ءبىر قۇدايدىڭ ءوزى بىلەدى.

سودان ءترانزيتىمىزدىڭ اڭكى-تاڭكىسى شىقتى!

نە بولعانى – كوز الدىمىزدا.

كەپىل تۋرالى اڭگىمەمدى جالعاستىرايىن.

دەموكراتيالىق ەلدەردە بيلىكتەن كەتكەن باسشىنىڭ كەپىلدىگى – ەل باسقارعان كەزىندە زاڭدى بۇزباعانى، ۇرلىق-قارلىق جاساماعانى، ەلىنە ادال قىزمەت ەتكەنى عانا. سول ءۇشىن ول قىزمەتتەن كەتسە دە، حالقىنىڭ ءىلتيپاتىنا يە بولىپ، ەل ارالاپ، لەكتسيا وقىپ، كىتاپ جازىپ، اقىلىمەن، كورگەن-بىلگەنىمەن ءبولىسىپ جاتادى.

بىزگە دە كەرەگى – وسىنداي وركەنيەتتىك ءداستۇر ورناتۋ! وعان دا جەتەرمىز.

بۇل جولعى ساپار كەپىلدىكتىڭ تاعى ءبىر ءتۇرىن اشقانداي.

ارينە، نازارباەۆ پەن پۋتين اراسىندا نە اڭگىمە بولعانىن ەكەۋىنەن باسقا ەشكىم بىلمەيتىنى تۇسىنىكتى.

بىراق، ەلباسى ماسكەۋگە بارىپ، سول جاقتىڭ كەپىلدىگىنە جۇگىندى دەگەن ءسوزدىڭ جانى بار سياقتى.

ولاي بولسا، بۇل - وتە قاۋىپتى پرەتسەدەنت!

ءپۋتيننىڭ پوستسوۆەتتىك كەڭىستىكتە ءوز ىقپالىن ساقتاپ قالۋعا ۇمتىلاتىنىن ەسكەرسەك، توقاەۆ پەن نازارباەۆتىڭ اراسىنداعى داعدارىستى ول ءوز ماقسات-مۇددەسىنە پايدالانۋى ابدەن مۇمكىن.

ول دەگەنىڭىز - باسقا ەلدىڭ ءبىزدىڭ ىشكى ىستەرىمىزگە تىكەلەي ارالاسۋى!

پرەزيدەنتتەر كەلەدى، كەتەدى.

بولاشاقتا وسىنداي جايتتار قايتالانباۋى ءۇشىن وسى باستان العىشارتتار جاساپ قويۋىمىز كەرەك!

بالكىم، ول كەپىلدىكتەر كەزەكتى، ءۇشىنشى كونستيتۋتسيالىق رەفورما تۇسىندا ەسكەرىلۋى ءتيىس.

وسى ەدى عانا ايتايىن دەگەنىم...

ءامىرجان قوسان

Abai.kz

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1581
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3610