سارسەنبى, 10 تامىز 2022
الاڭ 2615 25 پىكىر 13 ماۋسىم, 2022 ساعات 12:17

«رەسەي كۇنى» ءھام نازارباەۆتىڭ ماسكەۋ ساپارى

12 ماۋسىم رەسەي ەلىندە «رەسەي كۇنى» مەرەكەسى. مەرەكەگە وراي ماسكەۋ ءتۇرلى يدەولوگيالىق شارالاردى ۇيىمداستىرادى. بيىل ءتىپتى, ۇلعايتتى جانە ول ۋكرايناعا سوعىس اشۋىمەن تىكەلەي بايلانىستى. رەسەي قوعامىن بىرىكتىرۋ جانە رەجيمدى قولداۋ شارالارىن كرەمل قالت جىبەرمەيدى.

رەسەي كۇنىندە رەسەي اۋماعى بويىنشا جاپپاي كونتسەرتتەر ۇيىمداستىرىلىپ، پروپاگاندالىق شارالار ءوتتى. مىسالى كوپتەگەن رەسەي قالالارىندا «Z» بەلگىسى بار ەسكەرتكىشتەر ورنالاستىرىلدى. حالىق جاپپاي رەسەي تۋىن كوتەرىپ، الاڭدارعا جينالدى. اسكەري اندەر ايتىلدى، «ناتسيزمگە قارسىمىز» دەگەن ۇراندار تاستالدى. رەسەيدىڭ باسقىنشىلىق ارەكەتىن جاقتايتىن جانە اقتايتىن باياندامالار وقىلدى.

«رەسەي كۇنىنە» وراي سولتۇستىك كورشىمىز بەن وزگە دە مەملەكەتتەردە انتيرەسەيلىك اكتسيالار دا ۇيىمداستىرىلدى. سوعىسقا قارسى سيپاتتاعى اكتسيالار ەۋروپا ەلدەرىندە ءوتتى. رەسەي بويىنشا 50-دەن استام ادام ۇستالىپ، قامالدى. ولار «بۇل مەنىڭ كۇنىم ەمەس»، «رەسەي ەندى جوق»، «ساياساتتا تاققا جابىسۋ ەلدى قۇرتادى» دەگەن پلاكاتتار كوتەرىپ شىقتى.

جالپى الەمنىڭ 70-تەن استام قالاسىندا انتيرەسەيلىك اكتسيالار ءوتتى.  «Russians Against War» اكتسياسىنا شىعۋشىلار «پۋتينگە ءولىم» دەپ ۇرانداپ، ۋكراينانىڭ تۋىن كوتەرىپ شىقتى. ولار اق-كوك جولاقتى تۋدى دا الا شىققان. بۇل رەسەي وپپوزيتسياسىنىڭ تۋى جانە قازىرگى تۋداعى قىزىل جولاقتى الىپ تاستاپ، جاڭا تۋ جاساۋ كەرەك دەگەن ۇسىنىستى قولدايدى. ءدال وسىنداي تۋمەن «ازات رەسەي» لەگيونى دا ۋكراينا ءۇشىن سوعىسۋدا. بۇل رەسەيلىكتەردەن قۇرالعان جانە رەسەيدى پۋتين رەجيمىنەن ازات ەتۋ ءۇشىن سوعىسىپ جاتقان اسكەري جاساق سانالادى.

«رەسەي كۇنىندە» رەسەيگە ساپارلاپ نازارباەۆ باردى. نازارباەۆ پۋتينمەن كەزدەسىپ، ونى «رەسەي كۇنىمەن» قۇتتىقتادى. بۇل تۋرالى: «نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەسىپ، ەلدىڭ ۇلتتىق مەرەكەسى – «رەسەي كۇنىمەن» قۇتتىقتادى. كەزدەسۋدە قازاقستاننىڭ تۇڭعىش پرەزيدەنتى مەن رەسەي فەدەراتسياسىنىڭ پرەزيدەنتى ەكى ەل اراسىندا قارىم-قاتىناس ورناعانىنا 30 جىل تولۋىنا وراي ءبىر-بىرىنە جىلى لەبىزدەرىن جەتكىزدى. تاراپتار قازاقستان مەن رەسەي ىنتىماقتاستىعى تەڭ دارەجەدەگى ديالوگ نەگىزىندە دامىپ كەلە جاتقانىن اتاپ ءوتتى. نۇرسۇلتان نازارباەۆ پەن ۆلاديمير پۋتين ءبىر-بىرىنە مىقتى دەنساۋلىق جانە اماندىق تىلەپ، اراداعى دوستىق بايلانىس الداعى ۋاقىتتا دا قازاقستان مەن رەسەي حالىقتارىنىڭ يگىلىگى ءۇشىن جالعاسىن تابادى دەگەن سەنىم ءبىلدىردى»، - دەگەن اقپارات شىقتى.

الايدا ساراپشىلار نازارباەۆتىڭ مەرەكەمەن قۇتتىقتاۋ ءۇشىن بارماعانىن ايتادى. ساپار ەلدەگى ساياسي وزگەرىستەر مەن نازارباەۆ اۋلەتىنىڭ ساياسي ارەنادا السىرەۋىنە بايلانىستى جاسالۋى مۇمكىن دەيدى. نازارباەۆتىڭ قۇزىرەتىن الىپ تاستايتىن رەفەرەندۋم وتكەنىنە ءبىر اپتا بولدى.

17 ماۋسىم كۇنى پرەزيدەنت قاسىم-جومارت توقاەۆ پەتەربۋرگ حالىقارالىق ەكونوميكالىق فورۋمىنا بارماق. فورۋمعا پۋتين رەسمي شاقىرعان بولاتىن. اتالمىش فورۋمنان كەيىن ەكى ەل باسشىسى كەلىسسوزدەر جۇرگىزۋى مۇمكىن.

Abai.kz

25 پىكىر

ۇزدىك ماتەريالدار

الاشوردا

الاش-ارمان

بەيبىت قويشىباەۆ  1786
بىلگەنگە مارجان

حيلدا حۋكحەم جانە ۇلى قولباسشىلار

بەيسەنعازى ۇلىقبەك 1745
ادەبيەت

ءتۇس

ەرعالي باقاش 1652
انە، كوردىڭ بە؟

ارحيمەد كىمدى قورعاشتايدى؟

جايبەرگەن بولاتوۆ 2674