بەيسەنبى, 28 ناۋرىز 2024
اقمىلتىق 3882 8 پىكىر 17 مامىر, 2022 ساعات 14:20

پۋتين تاعى ءبىر ەلدى باس سالماق...

رەسەي اسكەرىنىڭ ۋكرايناداعى سوعىسى ماسكەۋدىڭ جوسپارىنا ساي ىسكە اسپاۋدا. سايكەسىنشە رەسەي بيلىگىنىڭ اقپاراتتىق كەڭىستىكتە رەسەي حالقىنا باعىتتالعان پروپاگانداسى دا ءالسىز بولا تۇسۋدە. كرەمل باسقا قادامدارعا بارۋى ابدەن مۇمكىن. 

ارىدان باستاساق. رەسەي بيلىگى ۋكرايناداعى سوعىستى "اسكەري وپەراتسيا" دەپ اتاپ، ونى جىلدام ءارى از عانا شىعىنمەن اياقتايتىن كەيىپ تانىتتى. قوعامدى سوعان سەندىردى، بارىنشا ناسيحاتتادى. كيەۆتى 48 ساعاتتا الۋ جوسپارى ىسكە اسپادى. ارتىنشا كيەۆ، سۋم جانە چەرنيگوۆ ايماعىنان شەگۋنى باستالدى. بۇل رەسەي بيلىگىنىڭ جوسپارىنا ساي ەمەس ەدى جانە رەسەي حالقى اتالمىش ارەكەتتى ءتۇسىندىرۋدى تالاپ ەتكەن ساتتە، رەسەي بيلىگى كيەۆپەن كەلىسسوز جۇرگىزۋ ماقساتىندا دەپ جىلى جاپتى. شىندىعىندا بۇل اسكەري جەڭىلىستىڭ ءبىر كورىنىسى بولاتىن.

رەسەي بيلىگى 9 مامىر قارساڭىندا حالىققا "جەڭىس پەن جەتىستىكتىڭ" كورىنىسى رەىتندە دونەتسك جانە لۋگانسك ايماقتارىن تولىق باسىپ الىپ، تەلەارنادان كورسەتۋدى جوسپارلاعان. الايدا اتالمىش ايماقتى باسىپ الۋ بىلاي تۇرسىن، حاركوۆ وبلىسىندا جەڭىلىسكە ۇشىراپ، ۋكراينا اسكەرى رەسەي شەكاراسىنا تۋ تىكتى.

رەسەي ءتىپتى ماريۋپول قالاسىن دا تولىق باسىپ الا المايدى. قالانىڭ وڭتۇستىك شىعىسىندا ورنالاسقان "ازوۆستال" زاۋىتىندا ءالى كۇنگە دەيىن ۋكراينا جاساقتارى بەكىنىپ، قارسىلىق ءبىلدىرىپ جاتىر. زاۋىتتى قورعاۋشىلار اراسىندا جارالانعاندار كوپ، سوندىقتان كيەۆ تۇتقىن الماسۋ پروتسەسى ارقىلى ولاردى شىعارۋ جولىن دا قاراستىرۋدا.

9-مامىر كۇنى رەسەي تاراپىنان جاپپاي موبيليزاتسيا جاريالاۋ دا، حەرسوندى قوسىپ الۋ دا، پريدنەستروۆە تاۋەلسىزدىگىن مويىنداۋ مەن لۋگانسك پەن دونەتسك ايماقتارىن رەسەيدىڭ ءبىر ايماعى ەتىپ تانۋ دا بولمادى. تەك ازىرگە باسقىنشى قولىنا وتكەن ايماقتا اسكەري شەرۋ وتكىزۋمەن شەكتەلدى.

امەريكاندىق ساراپشى لينكولن ميتچەللدىڭ پىكىرىنشە پۋتين ۋكرايناداعى ساتسىزدىگىن بۇركەمەلەۋ ماقساتىندا گرۋزياعا سوعىس اشۋى مۇمكىن. سەبەبى پۋتين بيلىگى حالىققا جىلدام ءارى شىعىنى از جەڭىستى سىيلاۋ ارقىلى، ءوز رەجيمىنىڭ ومىرشەڭدىگىن ۇزارتادى.اسكەري ساراپشىلار بۇل پىكىرمەن كەلىسىەدى. گرۋزيا حالقى از، اسكەرى كاسىبي ەمەس جانە 2008 جىلعى سوعىستان كەيىن رەسەي بيلىگىمەن قاقتىعىسۋدان قاشقاقتايتىن ەل. سوندىقتان وسەتيانى قوسۋ رەفەرەندۋمىن جاساۋ بارىسىندا ارانداتۋعا بارىپ، ارتىنشا سوعىس اشۋى مۇمكىن دەگەندى ايتادى.

اسحات قاسەنعالي

Abai.kz

8 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2249
عيبىرات

قايسار رۋحتى عازيز جان

مۇحتار قۇل-مۇحاممەد 3499