قايرات ساتىبالدىۇلى جانە قايرات بورانباەۆقا قاتىستى قاماۋدا ۇستاۋ مەرزىمى ۇزارتىلدى. 

"2022 جىلعى 12 مامىردا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قايرات ساتىبالدىۇلىنا قاتىستى كۇزەتپەن ۇستاۋ تۇرىندەگى سانكتسيالانعان بۇلتارتپاۋ شاراسىنىڭ مەرزىمىن 1 اي مەرزىمگە ۇزارتتى.

2022 جىلعى 10 مامىردا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قايرات بورانباەۆقا قاتىستى كۇزەتپەن ۇستاۋ تۇرىندەگى سانكتسيالانعان بۇلتارتپاۋ شاراسىنىڭ مەرزىمىن 1 اي مەرزىمگە ۇزارتتى", - دەلىنگەن ەلوردالىق سوت حابارلاماسىندا.

ەسكە سالايىق، 13 ناۋرىزدا سىبايلاس جەمقورلىققا قارسى قىزمەت "قازاقتەلەكوم" اق-تىڭ لاۋازىمدىق وكىلەتتىكتەرىن اسىرا پايدالانۋ جانە قاراجاتىن اسا ءىرى مولشەردە ۇرلاۋ دەرەگى بويىنشا قىلمىستىق ءىستى تەرگەپ جاتقانىن حابارلاعان بولاتىن. بۇل قىلمىستاردى جاسادى دەگەن كۇدىكپەن قايرات ساتىبالدىۇلى ۇستالىپ، ۋاقىتشا ۇستاۋ يزولياتورىنا قامالدى.

سونداي-اق، قازاقستاندىق كاسىپكەر قايرات بورانباەۆ قاماۋعا الىنعانى حابارلانعان بولاتىن. 17 ناۋرىزدا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قايرات بورانباەۆقا قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكتسيالادى.

Abai.kz