دۇيسەنبى, 27 ماۋسىم 2022
انە، كوردىڭ بە؟ 3946 14 پىكىر 13 مامىر, 2022 ساعات 15:20

پۋتين ءمۇيىز سۇراپ، قۇلاقتان ايىرىلدى...

رەسەي بيلىگىنىڭ ۋكرايناعا سوعىس اشۋىنىڭ ءبىر سەبەبى كيەۆتىڭ ناتو-عا كىرۋگە ۇمتىلۋى بولاتىن. ماسكەۋ ونى ءوز اۋماعىنا قاۋىپ دەپ اتاپ، سوعىس اشۋعا يتەرمەلەيتىن قادامنىڭ ءبىرى ەكەنىن ايتتى. ناتو-نىڭ جارعىسىنا سايكەس قانداي دا ءبىر اۋماقتىق ماسەلەسى بار ەل اسكەري وداققا كىرە المايتىنى بەلگىلى. قىرىم مەن دونباسستاعى اۋماقتىق ماسەلەگە بايلانىستى ۋكراينانىڭ ناتو-عا كىرە المايتىنى بەلگىلى ەدى. سوعان قاراماستان رەسەي ۋكرايناعا اشىق سوعىس اشىپ، باسقىنشىلىققا كوشتى. 

پۋتين 2021 جىلدىڭ جەلتوقسان ايىندا ناتو مەن اقش-قا ۋلتيماتۋم قويدى. كرەمل ناتو ۋكراينانى ناتو-عا قابىلداماۋ، ناتو-نىڭ 1997 جىلعى شەكاراعا دەيىن قايتۋىن، شىعىسقا جىلجۋىن توقتاتۋ مەن پوستكەڭەستىك ەلدەردى ناتو قۇرامىنا الماۋ جايىندا تالابىن ايتتى. ارينە اقش پەن ناتو ەلدەرى بۇل ۇسىنىستاردى مۇلدە قابىلداعان جوق.

12 مامىر كۇنى فينليانديا پرەزيدەنتى ساۋلي نينيستو مەن پرەمەر-مينيستر ساننا مارين ناتو-عا قوسىلۋ جوسپارىن قولدايتىنىن اشىق مالىمدەگەن بولاتىن. ەندىگى تاڭدا ءوز پوزيتسياسىن ەل پارلامەنتى ءبىلدىرۋى ءتيىس. ال رەسەيمەن شەكارالاس ايماقتا حالىق ءوز شەشىمىن بيلىككە دەيىن انىقتاعانىن جانە رەسەيمەن بولۋى مۇمكىن اسكەري قاقتىعىسقا دايىن ەكەنىن ايتادى.

ناتو-عا كىرۋدى قولدايتىن ەل حالقى سوڭعى ءۇش ايدا ەكى ەسە ارتقان. بۇل رەسەيدىڭ ۋكرايناعا سوعىس اشۋىمەن تىكەلەي بايلانىستى. Helsingin Sanomat باسىلىمىنىڭ اقپاراتى بويىنشا قاڭتار ايىندا ناتو-عا كىرۋدى قولدايتىندار سانى 28%-دى قۇراسا، ناۋرىز ايىندا ولاردىڭ سانى 54%، ال مامىردىڭ باسىندا 73%-عا جەتكەن. وسىلايشا، ناتو-عا كىرۋدى قولدايتىندار سانى كۇن ساناپ ارتىپ كەلەدى.

فينليانديا ەكىنشى جاھان سوعىسىنان كەيىنگى ەڭ ءىرى اسكەري جاتتىعۋلاردى باستادى. وسىلايشا ول ءوز شەشىمىنە نىق ەكەنىن ناقتى كورسەتۋدە. مەملەكەتتە بومبادان ساقتانۋ جانە جاسىرىنۋ ورىندارى جوندەۋدەن وتكىزىلە باستادى. فين اسكەرىنىڭ سانى بەيبىت جانە سوعىس كەزەڭىنە بايلانىستى اۋىتقىپ تۇرادى. كاسىبي 12 مىڭ اسكەر مەن جىل سايىن 20 مىڭ سارباز جاتتىعۋدان وتەدى. ال سوعىس كەزەڭىندە اسكەر سانى 280 مىڭعا جەتكىزىلىپ، قوسىمشا 900 مىڭ رەزەرۆ جاساقتاۋ جوسپارى بەكىتىلگەن.

الايدا رەسەي فينليانديا مەن شۆەتسيانىڭ ناتو-عا كىرۋى ۇلكەن قاۋىپ ەكەنىن ەسكەرتىپ، اسكەري جانە ساياسي قادامدارعا باراتىنىن ەسكەرتتى. ءتىپتى يادرولىق قارۋ قولدانۋ مۇمكىندىگىن دە مەڭزەدى.

ساراپشىلار پۋتين ۋكراينانىڭ ناتو-عا كىرۋىن تەجەيمىن دەپ، كەرىسىنشە ەكى ەكونوميكالىق قۋاتتى ەلدى ناتو-عا يتەرمەلەگەنىن ايتادى. وسىلايشا رەسەي باسشىسى ءمۇيىز سۇراپ، قۇلاقتان ايىرىلعان سياقتى...

Abai.kz

14 پىكىر