بۇگىننەن باستاپ وڭىرلەردە پارلامەنتتەگى ساياسي پارتيالاردىڭ بارلىق فراكتسيالارىنىڭ مۇشەلەرى، سونداي-اق قازاقستان حالقى اسسامبلەياسىنىڭ دەپۋتاتتارى ءىس-ساپارعا شىقتى. وندا دەپۋتاتتار مەملەكەت باسشىسى قاسىم-جومارت توقاەۆتىڭ باستاماسىمەن اتا زاڭعا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋم وتكىزۋدىڭ ماڭىزدىلىعىن ءتۇسىندىردى.

باستى ماقسات – ناقتى ساياسي باسەكەلەستىك ءۇشىن جاعداي جاساۋ، حالىقتىڭ ەلدى باسقارۋعا قاتىسۋىن ارتتىرۋ، قازاقستاندىقتاردىڭ قۇقىقتارىن قورعاۋدىڭ كونستيتۋتسيالىق تەتىكتەرىن كۇشەيتۋ.

نۇر-سۇلتان قالاسىندا ءماجىلىس دەپۋتاتتارى پاۆەل كازانتسەۆ، ساياسات نۇربەك، لاريسا پاۆلوۆەتس جانە دينارا زاكيەۆا «استانا-تازالىق» سەرىكتەستىگىنە باردى.

دەپۋتاتتار ەكبەك ۇجىمىمەن جۇزدەسىپ، جالپىحالىقتىق رەفەرەندۋم تۋرالى، داۋىس بەرۋدىڭ ەرەجەلەرى مەن شارتتارى جايلى ايتىپ، قابىلداناتىن ءار وزگەرىسكە جەكە-جەكە تۇسىنىكتەمە بەردى. ءماجىلىس دەپۋتاتتارى الداعى وزگەرىستەردىڭ ماڭىزدىلىعىنا توقتالدى.

– 5 ماۋسىمدا قازاقستاننىڭ بولاشاعىن ايقىندايتىن جالپىحالىقتىق داۋىس بەرۋ ارقىلى تاريحي شەشىمدەر قابىلدانادى. ەل تاعدىرىنا بەي-جاي قارامايتىن ءاربىر ادام ءوز تاڭداۋىن جاساپ، وسى ناۋقانعا اتسالىسۋى كەرەك، – دەدى ءماجىلىس دەپۋتاتى لاريسا پاۆلوۆەتس.

سونداي-اق دەپۋتاتتار ەلىمىزدىڭ اتا زاڭىنا ەنگىزىلەتىن ناقتى نورمالاردىڭ ماڭىزدىلىعىنا توقتالدى. اتاپ ايتقاندا، ولار سۋپەرپرەزيدەنتتىك مودەلدەن پرەزيدەنتتىك رەسپۋبليكاعا تۇپكىلىكتى كوشۋ، بىرقاتار بيلىك وكىلەتتىكتەرىن قايتا ءبولۋ، پارلامەنتتىڭ ءرولى مەن مارتەبەسىن كۇشەيتۋدى قامتاماسىز ەتۋ، سايلاۋ جۇيەسىن رەفورمالاۋ مەن جاڭا ساياسي پارتيالاردىڭ قۇرىلۋى.

ءماجىلىس دەپۋتاتتارى ايگۇل نۇركينا، ۆەرا كيم جانە اناتولي بويچين پاۆلودار وبلىسىندا ءبىلىم بەرۋ جانە دەنساۋلىق ساقتاۋ سالالارىنىڭ وكىلدەرىمەن، سونداي-اق پاۆلودار قالاسى ترامۆاي باسقارماسىنىڭ ۇجىمىمەن كەزدەستى.

– بۇل رەفەرەندۋم ءار قازاقستاندىققا ءوز پىكىرىن بىلدىرۋگە مۇمكىندىك بەرەدى. ەل تۇرعىندارى مەملەكەتتى باسقارۋ پروتسەسىنە ارالاسا الادى. وسىلايشا كونستيتۋتسيانىڭ 3-تەن ءبىر بولىگىنە وزگەرىس ەنگىزىلەدى، – دەدى ءماجىلىس دەپۋتاتى ۆەرا كيم.

كارديولوگيالىق ورتالىق دارىگەرلەرى دە الداعى رەفەرەندۋم مەن ساياسي رەفورمالاردان كۇتەر ءۇمىتى زور.

– رەفەرەندۋم قازاقستان حالقىنا بەرىلگەن ۇلكەن مۇمكىندىك دەپ ويلايمىن. بۇل رەفورمالار ايتۋلى وزگەرىستەرگە اپارادى. مەنىڭ ومىرىمدە رەفەرەندۋم ءبىرىنشى رەت بولعالى تۇر. جالپى جانۇياممەن بۇل ءىس-شاراعا بارامىز دەپ جوسپارلاپ وتىرمىن، – دەدى كارديولوگيالىق ورتالىقتىڭ دارىگەرى دۋمان يزگۋتدينوۆ.

بۇگىن ءماجىلىس دەپۋتاتى عازيز قۇلاحمەتوۆ الماتى قالاسىنداعى №137 مەكتەپكە بارىپ، جالپىحالىقتىق رەفەرەندۋمنىڭ قوعامدىق-ساياسي ماڭىزى تۋرالى ايتىپ، كونستيتۋتسيالىق رەفورمانىڭ جاڭاشىلدىقتارىنا توقتالدى.
سونداي-اق ءماجىلىس دەپۋتاتى ناتاليا دەمەنتەۆا اقمولا وبلىسىنىڭ ساندىقتاۋ اۋدانىنداعى بالكاشينو اۋىلىنىڭ تۇرعىندارىمەن كەزدەستى. وندا بىرقاتار الەۋمەتتىك ماسەلە تالقىلانىپ، الداعى رەفەرەندۋم جايلى اڭگىمەلەستى.

بارلىق وڭىرلەردە ازاماتتار دەپۋتاتتارمەن پىكىرتالاستارعا بەلسەنە قاتىسىپ، كوپتەگەن سۇراقتار قويىپ، ءوز پىكىرلەرىمەن ءبولىستى.

Abai.kz