«Forbes.kz» سايتى جىل سايىنعى داستۇرىنەن جاڭىلماي، قازاقستانداعى اسا باي 50 بيزنەسمەننىڭ تىزىمدىگىن جاريالاپتى.

الەمدىك ساياساتتاعى الا-قۇلا احۋال قازاقستان اۋقاتتىلارىنىڭ قالتاسىن ءبىراز قاقانعا ۇقسايدى. ساراپشىلار، قازىرگى كەزەڭدى - ەكونوميكا ىرعالىپ-قوزعالىپ تۇرعان پاندەميادان كەيىنگى كەزەڭ دەيدى. وعان رەسەيدىڭ ۋكرايناعا اشقان سوعىسى مەن باتىستىڭ، اقش-تىڭ دۇركىن-دۇركىن سانكتسيالارىن جانە قوسىپ ەسەپ قىلاسىز. ويتكەنى، رەسەيگە سالىنعان قاپ-قاپ سانكتسيالاردىڭ قازاقستان ەكونوميكاسىنا دا تىكەلەي جانە جاناما اسەرى بارى بەلگىلى. ەاەو-دەگەن رەسەي مۇددەسىنە ءجۇمىس ىستەيتىن مونوپوليالىق وداقسىماق تاعى بار. قىسقاسى، «Forbes.kz» تىزىمىندەگى تەرەڭ قالتالى توپتىڭ جاعدايى وسىنداي...

«Forbes.kz» ۇجىمى ءسوز باسىندا: «جىل باسىنداعى «قاڭتار وقيعاسىنان» كەيىن جانە ەلىشىلىك ساياسي وزگەرىستەرگە بايلانىستى رەيتينگتىڭ تۇراقتى قاتىسۋشىلارىنىڭ كەيبىرى رەداكتسيامىزعا ارنايى شىعىپ، بۇل جولى تىزىمگە قوسپاۋدى سۇرادى»، - دەپ جازىپتى. ويتكەنى، پرەزيدەنت اپپاراتى مەن ۇكىمەت اۋقاتتىلار تىزىمىنە ەەنگەندەردى «ءماجبۇرلى-ەرىكتى» تۇردە ءتۇرلى باستامالارعا دەمەۋشىلىككە تارتىپ، اۋرەلەيدى ەكەن... دەسە دە، «Forbes قازاقستان» ۇسىنعان ءتىزىمنىڭ تۇگەل ەلۋىن تىزبەلەمەسەك تە، العاشقى وندىعىشا كوز جۇگىرتەلىك:

1. ۆلاديمير كيم. 61 جاستا. داۋلەتى – 5 ملرد دوللاردى قۇراپتى.

2-3. تيمۋر مەن دينارا قۇلىباەۆتار. تيمۋر – 55-تە، دينارا – 54-تە. ارقايسىسىنىڭ ەسەبىندە 3,9 ملرد دوللاردان بار ەكەن. جيىنتىق سوما – 7,8 ملرد دوللار.

4. ۆياچەسلاۆ كيم. جاسى – 52-دە. داۋلەتى – 3,2 ملرد دوللار دەپ باعالانىپتى.

5. ميحايل لومتادزە. 46 جاستا. ونىڭ بايلىعى – 3 ملرد دوللار ەكەن.

6. بولات وتەمۇراتوۆ. 64-تەگى بوكەڭنىڭ بايلىعى – 2,8 ملرد دوللار دەپ ەسەپتەلىپتى.

7. تيمۋر تۋرلوۆ. 34 جاستا. جيعان-تەرگەن بايلىعى – 2 ملرد دوللارعا باعالانعان.

8. يبراگيموۆتەر وتباسى. ايگىلى ەۋرازيالىق ۇشتىكتىڭ ءبىرى بولعان ءادىلجان يبراگيموۆتىڭ وتباسى عوي. ولاردىڭ بايلىعى 1,29 ملرد دوللار دەپ ەسەپتەلگەن.

9. كەڭەس راقىشەۆ. 42 جاستا. ونىڭ داۋلەتى – 960 ملن دوللار دەيدى.

10. سارسەنوۆتەردىڭ وتباسى. ولارعا تيەسىلى سوما – 897 ملن دوللارعا باعالانعان ەكەن.

العاشقى وندىقتىڭ سىقپىتى وسى.  بيىل بۇل تىزىمگە نازارباەۆتار اۋلەتىنىڭ تاعى ەكى مۇشەسى قوسىلعان ەكەن. ولار:

1. داريعا نۇرسۇلتانقىزى نازارباەۆا. 59 جاستاعى داريعا نازارباەۆا بۇرىن دا بۇل تىزىمدە بولىپ كورگەن. كەيىن مەملەكەتتىك قىزمەتتە جۇرگەندىكتەن، تىزىمنەن شىققان. قازىر، قايتا ورالىپتى. سەبەبى دە تۇسىنىكتى.  داريعا نۇرسۇلتانقىزى رەيتينگە 13-ءشى ورىنعا جايعاسىپتى. ونىڭ كاسىبى – 584 ملن دوللارعا باعالانعان.

(سۋرەتتە بولات نازارباەۆ)

2. نۇربول نازارباەۆ. بولات نازارباەۆتىڭ ۇلى ەكەن. 38 جاستاعى نۇربول نازارباەۆتىڭ كاپيتالى – 160 ملن دوللار دەپ كورسەتىلگەن. وعان تيەسىلى بيزنەستەر: «Prime Capital Invest» جشس مەن «كورپوراتسيا ءۇش قوڭىر ينۆەست» جشس. سونىمەن قاتار، «PLS ينۆەستيتسيالىق-قۇرىلىس كومپانياسى» جشس-عا جانە «PLS-TM» جشس-عا يەلىك ەتەدى ەكەن.

«قاماۋداعى قۇدا» قايرات بورانباەۆ

ەسەسىنە، بيىل قازاقستان اۋقاتتىلارىنىڭ تىزىمىنەن «قاماۋداعى قۇدا» قايرات بورانباەۆ شىعىپ قالىپتى.  وزىن «ەكس-قۇدامىن» دەپ ەسەپتەيتىن قايرات بورانباەۆ بىلتىرعا دەيىن اۋقاتتىلار تىزىمىندەگى العاشقى وندىقتان، ىقپالدىلار تىزىمىندەگى العاشقى بەستىكتەن تۇسپەي كەلگەن ەدى.

«قاڭتار وقيعاسىنان» كەيىن قولىنا كىسەن سالىنىپ، سوت شەشىمىمەن ۋاقىتشا قاماۋعا الىنعان. ونى الماتىدا قارجى مونيتورينگى اگەنتتىگىنىڭ قىزمەتكەرلەرى 15 ناۋرىزدا ۇستادى.

قايرات ساتىبالدى دا تىزىمدە جوق

تىزىمنەن شەتتەتىلگەندەردىڭ ءبىرى ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدى. قايرات ساتىبالدى اراگىدىك اۋقاتتىلار تىزىمىنە ەنىپ تۇراتىن. ول دا «قاڭتاردان» كەيىن قامالعانداردىڭ ءبىرى.  13 ناۋرىز كۇنى ۇستالدى. سوت شەشىمىمەن ۋاقىتشا قاماۋعا الىندى. قايرات ساتىبالدى ەلباسى اۋلەتىندەگى ەڭ ىقپالدى تۇلعالاردىڭ ءبىرى سانالادى. ونىڭ قاڭتار وقيعالارانا تىكەلەي قاتىسى بولۋى مۇمكىن دەگەن اقپاراتتى سان ءتۇرلى باق كوزدەرى جازۋدا. ال ۇزاق جىلدار بويى ساتىبالدى ەلىمىزدەگى راديكاليزمگە تىكەلەي قاتىسى بار ادام رەتىندە اتالىپ كەلەدى. قايرات ساتىبالدىعا تيەسىلى فيرمالاردىڭ يەلىگىندە بولعان «قازاقتەلەكوم» اق-نىڭ 28 پايىز اكتسياسى مەملەكەت مەنشىگىنە قايتارىلعانى تۋرالى بەلگىلى بولدى. مۇنى ۇكىمەتتىڭ ءوزى سۇيىنشىلەپ حابارلاعان.

قىسقاسى وسى...

نۇرگەلدى ابدىعانيۇلى

Abai.kz