باتىستىق باق رەسەي مەن ۋكراينا سوعىسىنا قاتىستى تىڭ دەرەكتەر مەن بولجامداردى شىعارۋدا. رەسەي اسكەرىنىڭ وزبىرلىعى، بۋچا قىرعىنى، ماريۋپول قورعانىسى مەن قالاداعى تەاتردى بومبالاۋ جانە «ازوۆستال» ايقاسى ەڭ ءبىرىنشى بولىپ باتىستىق باق-تا جازىلا باستادى. 

The New York Times جازۋى بويىنشا، اقش اسكەري بارلاۋشىلارى ۋكرايناعا باسقىنشى رەسەي اسكەرىنىڭ قيمىلدارى مەن ورنالاسقان جەرى جايلى اقپارات بەرىپ كەلگەن. ناتيجەسىندە ۋكراينا اسكەرى قارسى سوققى جاساپ، شابۋىلدى ۇدەتۋگە مۇمكىندىك العان. رەسەي اسكەرىنىڭ گەنەرالدارى اراسىنداعى شىعىندى دا وسى سەبەپپەن ءتۇسىندىرىپتى.

ۋكراينا بۇعان دەيىن رەسەيدىڭ 12 گەنەرالى قازا تاپقانىن مالىمدەگەن بولاتىن. بۇل ارينە اسكەري ساراپشىلاردى تاڭداندىرىپ وتىر. از عانا ۋاقىتتىڭ ىشىندە الەمنىڭ ەكىنشى اسكەرى سانالاتىن رەسەيدىڭ گەنەرالدارى قىرىلىپ جاتىر. بۇل بارلاۋ مەن اقپاراتتىڭ ناقتىلىعىن جانە شابۋىلدىڭ جوسپارلى، جۇيەلى بولعانىن كورسەتەدى.

بايدەن اكىمشىلىگى باسقىنشى رەسەي اسكەرىن توقتاتۋ جانە تويتارىس بەرۋ ماقساتىندا ۋكرايناعا جان جاقتى كومەكتى اياماۋدا. قارجىلاي جانە قارۋ-جاراق تۇرىندەگى كومەكتەن بولەك، اقپاراتتىق كومەك تە ارتىپ كەلەدى. ول رەسەي اسكەرىنىڭ قۇرامى، باسقىنشى اسكەردىڭ ورنالاسقان ايماعى مەن قوزعالۋى مۇمكىن بولجامدى باعىتتار، قارۋ ءتۇرى مەن اسكەردىڭ پسيحولوگيالىق سيپاتى جانە تاعى باسقا اقپاراتتاردان تۇرادى.

اقش تاراپى: «بارلىق اقپاراتتى تەك ءبىز بەرىپ وتىرمىز دەۋدەن اۋلاقپىز»، - دەيدى. ۆاشينگتون ۋكراينا بارلاۋ قىزمەتىنىڭ جۇمىسى وتە جوعارى دەڭگەيدە ەكەنىن ايتادى. سوڭعى كومەك پارتياسى بويىنشا ۋكرايناعا Switchblade سوققى جاساۋشى بارلاۋشى-درون سناريادتار كەلىپ جەتتى. بۇل تەك قانا سوققى جاساۋ ەمەس، سونىمەن قاتار اقپارات جيناۋ ماقساتىندا دا بەرىلىپ وتىرعان كومەك دەيدى اقش.

اقش اسكەري ساراپشىلارىنىڭ مالىمەتىنشە رەسەي اسكەرىنەن اقپاراتتى جيناۋ قيىندىق تۋدىرمايتىنىن ايتادى. سەبەبى اسكەردىڭ اقپاراتتىق قورعانىسى تومەن جانە پسيحولوگيالىق جاعدايى ناشار. ۇرىس دالاسىنداعى جەڭىلىستەر مەن قولعا تۇسكەن رەسەي جاۋىنگەرلەرىنىڭ كوپتىگى اقپارات جيناۋعا سەبەپكەر بولۋدا. ۆاشينگتون قانداي اقپاراتتى ۋكرايناعا بەرگەنىن ناقتىلاپ ايتپادى، سەبەبى ول رەسەي مەن اقش اراسىنداعى شيەلەنىستى ءتىپتى كۇشەيتە ءتۇسۋى بەك مۇمكىن دەيدى.

اسحات قاسەنعالي

Abai.kz