جۇما, 30 قىركۇيەك 2022
قوعام 8725 3 پىكىر 4 مامىر, 2022 ساعات 14:09

التىن بۇرىشتار مەن جەتىم بۇرىشتار

نۇر-سۇلتان قالاسىنىڭ اكىمى
التاي كولگىنوۆ مىرزانىڭ نازارىنا:

باس شاھار – استانامىزدىڭ ارتىپ تۇرعان اجارى، كوركەم كەلبەتى، قولايلى  ينفاقۇرلىمى اۋەلى قالا تۇرعىندارى ءۇشىن اۋاداي قاجەت-اق. ارينە، تۇتاس ءبىر مەملەكەتتىڭ اقىلدى قالا مادەنيەتىنە تىكەلەي ىقپال جاسايتىن بۇل ماڭىزدى  تەتىكتەر، ءتىپتى وتاندىق تۋريزمگە مىقتاپ دەن قويعان وسى شاقتا ەل ءىشى جانە جات ەلدەن كەلەتىن سان ءتۇرلى سيپاتتاعى قوناقتار ءۇشىن دە اسا وزەكتى ەكەنى داۋسىز.

بۇرىنعى استانا قالاسىنىڭ قازىرگى اكىمى التاي مىرزا ءسىز: "ەلوردانى ەڭ الدىمەن جاياۋ جۇرگىنشىلەرگە ىڭعايلى بولۋ ءۇشىن دامىتىپ جاتىرمىز. وسى ماقساتتا اباتتاندىرىلعان قوعامدىق كەڭىستىكتەر سانىن جىل وتكەن سايىن ەسەلەپ ارتتىرامىز. بۇل دەمالۋعا، سەرۋەندەۋگە جانە سپورتپەن شۇعىلدانۋعا مۇمكىندىك بەرەدى", - دەدىڭىز بىرنەشە كۇن بۇرىن عانا. وتە كادەلى قۇپتارلىق قام-قارەكەت. الايدا، وكىنىشكە وراي قالانىڭ كوركىن كەتىرىپ، اياققا ورالىپ جاتقان تۇرپاتسىز، تۇرلاۋسىز قالتارىس تۇستار از ەمەس. ايتايىق، شاماسى 20 جىلداي قوراش قورشالىپ اقىلى اۆتوتۇراق رەتىندە پايدالانىپ كەلگەن ق.ساتپاەۆ كوشەسى "ەۋرازيا ساۋدا ورتالىعى 1" جانىندا جاياۋ جۇرگىنشىلەر جولى مەن سول ۇلكەن جولدىڭ ورتاسىنداعى اباتتاندىرىلۋعا ەرتەدە-اق سۇرانىپ تۇرعان الاڭقاي ورىن بىرەر ايدان بەرى جات ەلدىڭ قاڭسىعى تاڭسىق بولىپ، بالالار مەن جاستاردىڭ دەنساۋلىعىنا اسا اۋىر زيان كەلتىرەتىن "ماكدونالدسقا" ايلانىپ شىعا كەلدى (1فوتو).

مەملەكەتتىڭ جەرىن سۋ تەگىن پايدالانىپ 20 جىلدان بەرگى قوجاسى "بەلگىسىز" اقىلى اۆتوتۇراقتان تاپقان، تىققان ميلليوندار حالىقتىڭ باستان-كوزدەن ساداقاسى! ونى قاۋزايىن دا، سۇرايىن دەپ تۇرعان ەشكىم جوق. الايدا ايتپاعىمىز، اراعا نەشە جىل، قانشا ۋاقىت سالىپ سونىڭ ەتەگىندەگى مىنا "جاۋ شاقىرعان" بوس جاتقان جەردى ەندى بالالار مەن جاستاردىڭ "ناعاشى" اتاسىنداي بولىپ كەتكەن "KFC" سارىشال شارۋشىلىق قورا-قوتان سالىپ الماس پا ەكەن دەگەن الاڭ كوڭىل (2 فوتو ).

ال ونىڭ قارسى جاعى ەۋرازيا رايونىنا ەرتەدەن ماشقۇر "كەمپىرلەر بازارى" اتالىپ كەتكەن جەتىم بۇرىش تا ءدال سولاي (3 فوتو). باعزىدان بەرى بىرەۋ قورشاپ العان، بوس جاتتى. حالىقتىڭ ۇلتاراقتاي جەرىنە ءبىر تال شىبىق تا شانشىلمادى. ارادا الاقانداي عانا الاڭ اقىلى كولىكتۇراق تا بولدى. ەندى سىزدەردىڭ قولعا العان "نۇر-سۇلتان - جايلى قالا" ماستەر-جوسپار اياسىندا گۇلزار ەمەس، شاعىن سپورت الاڭقايى دا ەمەس، مىنە، اتى جوق قۇرلىس ءجۇرىپ جاتىر.

ال، ودان ب.مايلين كوشەسىنە قاراي الگىندە ايتىلعان "بوس جاتقان" جەردەن ءجۇرىپ ءوتىپ كەلە جاتساڭىز توبەسى وپىرىلىپ ورتاسىنا تۇسكەن جازدىق رەستوران سوعىستان سوڭعى قيراندى سياقتى سۇلىق جاتىر (4 فوتو). كوز بولسا كورەتىن سۇمدىق كوپ ەكەن قالامىزدا. ارى قاراي ادامداردىڭ دەمالىس جانە سپورتتىق ورىندارى سىندى قوعامدىق كەڭىستىكتەردىڭ ءدال ۇستىنەن سالىنعان "تسەنتر پلوۆا-ۆوستوچنايا كۋحنيا" "كەلىڭ، كەلىڭ" دەپ قارسى الادى (4 فوتو).

ونىڭ جانىندا جانە دە بەلگىسىز قۇرىلىس جاسىرىن سياقتى ءجۇرىپ جاتقانىن قايتەسىز (5 فوتو)?!.

ال، اناۋ فوتو (6), تۋرا ب.مومىشۇلى مەن ق.ساتپاەۆتىڭ قيلىسى. بۇل وسىلاي قاڭىراپ جاتقالى 15 جىلدان اسپاسا، كەم بولعان جوق. بىرەۋگە قورشالعان، ەسكىرگەن ەسكەركىش سياقتى مىزعىمايدى، قىبىرسىز. تىرشىلىك جوق، ءۇن جوق. يەسىزدەي قورعانسىزدىڭ كۇيىن كەشكەن ناعىز جەتىم بۇرىش وسى بولسا كەرەك. قىسقاسى، بۇل الاقانداي بۇرىشتار جالپىحالىق ارلى-بەرلى كوپ جۇرەتىن ۇلكەن جولدىڭ بويىندا تۇرعاسىن دا قالا تۇرعىندارىنا ارناپ شاعىن، جيناقى دەمالىس ورنى ەتىپ، جەلەكجولدار جاسالىپ، لايىقتى اباتتاندىرىپ، سۋ بۇرقاق ورناتىپ، ورىندىقتار قويسا قۇپ جارار ەدى. حالىق رازى دا بولار ەدى. مۇنداي كوزگە شىققان سۇيەل سياقتى ءتۇل جەتىم بۇرىشتىڭ بىرەۋى سان جىلدان بەرگى كۇيشى دينا كوشەسى 25 ءۇيدىڭ جانىندا، ۇلكەن جولدىڭ بويىندا تۇر تۇمشالانىپ. ءبارىن ايتتا، ءبىرىن ايتار بولساق، قالا ءىشى جول بويى جاياۋ جۇرگىنشىلەرگە بارىنشا قولايلى بولسىن دەسەڭىز، اتالعان جەتىم - التىن بۇرىش اشىق ورىندارعا دا كىسىنى  وزىنە ەرىكسىز باۋرايتىن سپورتتىق دەنە شىنىقتىرۋ قۇرىلعىلارىن ورناتىپ، شىعىن ۆولەيبول، باسكەتول الاڭدارىن سالسا نەمەسە بارلىق ماسەلەلەردى ەسكەرە وتىرىپ گۇلزار ورناتىپ، ءتۇرلى اعاشتار وتىرعىزىپ،  شاعىن ادەمى ساياباقتار سالىپ تاستاسا استانا شىنىمەن دە ەسىرتكىسىز قالا بولۋعا ءبىر نەشە قادام جىلجىر دا ەدى. ال، مىنا 7- فوتولارعا نە دەيسىز؟

ءوزىڭىز اشالاپ ايتقان جاياۋ جۇرگىنشىلەرگە وتە قاۋىپتى كەدەرگى بولعان جارىق باعانالارى جولدىڭ حاق ورتاسىندا تۇر عوي...مۇنداي بەيباس باعانالاردىڭ تاعى بىرەۋى م.جۇماباەۆ پەن ك.دينا ك-ءسىنىڭ قيلىسىندا جالعىز كوزدى اۋليەنىڭ ماڭدايىنداعى وتكىر كوزىندەي كوككە جارىق شاشىپ قازديىپ تۇر. تىم ەرسى. ءبىز تەك كوزىمىزگە تۇسكەندەرىن عانا تىلگە تيەك ەتتىك. ال، ەلەۋسىز، ەسكەرۋسىز، ايتىلماعاندارى قانشاما!

قۇرمەتتى باس شاھاردىڭ باستىعى التاي سەيدىرۇلى،

قۇدايىم قالاسا كەلەسى كەزەكتى قالانى ارالاۋ-تەكسەرۋدە كوپتىڭ كوز الدىندا توزىپ كەتكەن نەمەسە كوزگە شىققان شور سۇيەلدەي تۇرلاۋسىز تۇرعان "التىن بۇرىشتار مەن جەتىم بۇرىشتاردى" دا ءبىر ارالاپ، زەر سالۋىڭىزدى ءوز قالاسىن جاقسى كورەتىن، ءارى، سىزگە جاناشىر ازامات رەتىندە ەرەكشە وتىنەمىز.

ءسىز باسقارىپ وتىرعان ەلوردا تۇرعىندارىنىڭ وي-ۇسىنىستارى دا وسىعان سايادى.

دۋمان امانۇلى،

"مۇرات جولى" مادەنيەت قوعامدىق بىرلەستىگىنىڭ توراعاسى

Abai.kz

3 پىكىر