«جاڭاوزەن» وقيعاسىنىڭ كۋاگەرى: «پوليتسيا ساپ تۇزەپ كەلە جاتىپ ايەل، بالا-شاعا دەمەستەن اشىقتان-اشىق وق جاۋدىردى»
«جاڭاوزەن» وقيعاسىنىڭ كۋاگەرى: «پوليتسيا ساپ تۇزەپ كەلە جاتىپ ايەل، بالا-شاعا دەمەستەن اشىقتان-اشىق وق جاۋدىردى»
جاڭاوزەن قاسىرەتىنىڭ كۋاگەرى ءارى جابىرلەنۋشى
شولپان وتەكەەۆا:
ولگەندەر مەن جارالىلاردى
كيىزگە سالىپ تاسىعاندى كوردىم
ەندى از ۋاقىتتا جاڭاوزەن قاسىرەتىنىڭ ورىن العانىنا ءبىر جىل تولادى. اقيقات بىردەن اشىلماسا دا، مەيلى سوتتا بولسىن، مەيلى قانداي دا ءبىر جيىندا بولسىن، ءار كەز ءبىر شىندىق ايتىلىپ، جۇرتشىلىققا جەتۋدە. وعان ەلدەگى وپپوزيتسيا قۇرعان قوعامدىق باقىلاۋ كوميسسياسىنىڭ ىقپالى از ەمەس. وسى جولى ۇلكەن جيىن ۇستىندە تاعى ءبىر جان تۇرشىگەرلىك ايعاقتى جۇرت كۋاگەردىڭ ءوز اۋزىنان ەستىدى. ادامداردى سەبەپسىز قاماۋ مەن ۇرىپ-سوعۋ، ءتۇرلى ءجابىر-جاپا كورسەتىپ، قورلاۋ جاعىنان جاڭاوزەندەگى قاندى قىرعىن 1986 جىلعى 16 جەلتوقساندى ەرىكسىز ەسكە سالدى. بىراق قوعام قازىرگىدەي وياۋ بولسا، جاڭاوزەن اقيقاتى جەلتوقسان سياقتى شيرەك عاسىر بويىنا جابۋلى قالمايتىنعا ۇقسايدى. جيىرما بەس جىلىڭىز نە، جاڭاوزەن قاندى قىرعىنىنىڭ اششى شىندىعى تاياۋ اراداعى بەس جىلعا دا جەتپەي اشىلاتىنعا ۇقسايدى. وسى قاندى قىرعىننىڭ ورتاسىندا بولعان كۋاگەر شولپان وتەكەەۆانىڭ ءسوزىن ءبىز وزگەرتپەستەن جاريالاپ وتىرمىز.
«جاڭاوزەن» وقيعاسىنىڭ كۋاگەرى: «پوليتسيا ساپ تۇزەپ كەلە جاتىپ ايەل، بالا-شاعا دەمەستەن اشىقتان-اشىق وق جاۋدىردى»
جاڭاوزەن قاسىرەتىنىڭ كۋاگەرى ءارى جابىرلەنۋشى
شولپان وتەكەەۆا:
ولگەندەر مەن جارالىلاردى
كيىزگە سالىپ تاسىعاندى كوردىم
ەندى از ۋاقىتتا جاڭاوزەن قاسىرەتىنىڭ ورىن العانىنا ءبىر جىل تولادى. اقيقات بىردەن اشىلماسا دا، مەيلى سوتتا بولسىن، مەيلى قانداي دا ءبىر جيىندا بولسىن، ءار كەز ءبىر شىندىق ايتىلىپ، جۇرتشىلىققا جەتۋدە. وعان ەلدەگى وپپوزيتسيا قۇرعان قوعامدىق باقىلاۋ كوميسسياسىنىڭ ىقپالى از ەمەس. وسى جولى ۇلكەن جيىن ۇستىندە تاعى ءبىر جان تۇرشىگەرلىك ايعاقتى جۇرت كۋاگەردىڭ ءوز اۋزىنان ەستىدى. ادامداردى سەبەپسىز قاماۋ مەن ۇرىپ-سوعۋ، ءتۇرلى ءجابىر-جاپا كورسەتىپ، قورلاۋ جاعىنان جاڭاوزەندەگى قاندى قىرعىن 1986 جىلعى 16 جەلتوقساندى ەرىكسىز ەسكە سالدى. بىراق قوعام قازىرگىدەي وياۋ بولسا، جاڭاوزەن اقيقاتى جەلتوقسان سياقتى شيرەك عاسىر بويىنا جابۋلى قالمايتىنعا ۇقسايدى. جيىرما بەس جىلىڭىز نە، جاڭاوزەن قاندى قىرعىنىنىڭ اششى شىندىعى تاياۋ اراداعى بەس جىلعا دا جەتپەي اشىلاتىنعا ۇقسايدى. وسى قاندى قىرعىننىڭ ورتاسىندا بولعان كۋاگەر شولپان وتەكەەۆانىڭ ءسوزىن ءبىز وزگەرتپەستەن جاريالاپ وتىرمىز.
- ءسالاماتسىزدار ما، قۇرمەتتى ازاماتتار مەن ازاماتشالار! مەن بۇگىن جاڭاوزەننەن كەلىپ وتىرمىن. مۇنايشىنىڭ زايىبىمىن. زايىبىم دۇيسەن رۇستەمبەكوۆ. ءوزىم 2011 جىلى 15-16-17 جەلتوقسان كۇندەرىندە كوزىممەن كورگەن وقيعالاردى ايتقىم كەلىپ وتىر.
15 جەلتوقسان كۇنى جاڭاوزەندەگى الاڭدا كيىز ۇيلەر تىگىلدى. كيىز ۇيلەر جاقىن جەردەگى ەلدى مەكەندەردەن اكەلىندى. قالانىڭ وزىندە كيىز ۇيلەر جوق. الاڭعا كيىز ۇيلەر تىگىلىپ جاتقاندا، مەن اپالاردىڭ جانىنا بارىپ: «سىزدەر بۇل جەرگە قالاي كيىز ءۇي تىگەسىزدەر؟ الاڭدا جەتى ايدان بەرى مۇنايشىلار تۇر ەمەس پە؟ قالاي داتتەرىڭىز بارادى؟» - دەدىم. ولارمەن سويلەسكەندە مەنىڭ بىلگەنىم - ول ۇلكەن كىسىلەر مۇنايشىلاردىڭ ءالى دە الاڭدا تۇرعانىن بىلمەگەن! ولار ماشينامەن جەتكىزىلگەن كيىز ۇيلەرىن تۇسىرگىلەرى كەلمەي: «مىناۋىمىز وبال بولار» دەپ، كيىز ۇيلەرىن تىككىلەرى كەلمەدى. ءسويتىپ ولار كەرى قايتاتىن بولدى. سول كەزدە ءار كيىز ءۇيدىڭ اينالاسىنا جيىرما شاقتىدان پوليتسيا قويىلدى. ولار كيىز ۇيلەردى تۇسىرتكىزدى. الاڭنان كەتكىسى كەلگەندەر كەتە المادى. تەك ءبىر ماشينا عانا الاڭنان شىعىپ كەتە الدى. جيىرما شاقتى كيىز ءۇي الاڭنىڭ ورتاسىنا تىگىلدى. الاڭدا ءبىر نارسە بولاتىنى تۋرالى ءتيدى-قاشتى اڭگىمەلەر بولدى. بىراق نە بولاتىنىن ەشكىم بىلگەن جوق، سەزگەندەرى بولماسا... كيىز ۇيلەردىڭ يەلەرىن سول ساتىندە قالا اكىمى ساربوپەەۆ شاقىرىپ الىپ: «ەرتەڭ، 16 جەلتوقسان كۇنى سەندەردىڭ كيىز ۇيلەرىڭە ءبىر نارسە بولسا، ءار كيىز ۇيگە ەكى ميلليوننان اقى تولەيمىن»، - دەپتى، ءتىپتى قولحات تا بەرگەن...
ءسويتىپ ۇلكەن ايعاي-شۋمەن كيىز ۇيلەر تىگىلدى. مەن قاتتى اشۋلانىپ، رەنجىپ، الاڭنان كەتىپ قالدىم. مۇنايشىلار دا تارادى. ولار: «ەگەر الاڭدا ەرتەڭ، 16 جەلتوقسان كۇنى قانداي دا ءبىر جاعداي ورىن السا، ءبىز وعان جاۋاپتى ەمەسپىز» دەگەن قولحاتتارىن دا تاپسىرىپ تاستادى.
15 جەلتوقسان كۇنى جەرگىلىكتى باسشى اتاۋلى كيىز ۇيلەرگە جينالىپ، قوناقاسىن اسقىزىپ، بىلگەندەرىن جاسادى. 16 جەلتوقسان كۇنى مۇنايشىلار الاڭعا قايتادان كەلدى. مەنىڭ جوعارى سىنىپتا وقيتىن قىزىما مەكتەپ مۇعالىمدەرى: «ەرتەڭ جىلى كيىنىپ، الاڭعا كەلىڭدەر» دەپ تاپسىرما بەرەدى. ستۋدەنتتەرگە دە سونداي تاپسىرما بەرىلگەن. ستۋدەنتتەردىڭ، مەكتەپ وقۋشىلارىنىڭ قولدارىنا جالاۋشالار دا تاراتادى. تاۋەلسىزدىك مەرەكەسى دەپ بۇكىل قالا حالقىن الاڭعا جينايدى. ءسويتىپ، ەر-ازامات، بالا-شاعا، ايەلدەر ءبارىمىز الاڭدا بولدىق.
ءبارى اياق استىنان بولدى. «حالىقتىڭ اۋزى - قازىنا» دەيدى عوي، حالىق ءبىر-بىرىنەن ەستىپ، ءبارىن ءبىلىپ وتىر. ماسەلەن، كيىز ۇيدە ەت جەپ وتىرعان ءبىر باسشى ءبىر سۇيەكتى الىپ، تسەللوفان قالتاعا سالىپ: «جەتى ايدان بەرى اش تۇرعان مۇنايشىلارعا اپارىپ بەرىڭدەر!» دەگەن. مۇنى ءوز كوزىمەن كورگەن ءبىر اعامىز ايتتى. باسقا كيىز ۇيدەگىلەر دە سولاي جاساعان. «وزەنمۇنايگازدىڭ» ديرەكتورى كيىكباي ەشمانوۆ 20-30 جاسوسپىرىمدەرگە قالىڭ كۇپايكە كيگىزىپ، ارانداتۋشى توپتى دايىنداعان. ولار ساحناعا شىعىپ، قۇرال-جابدىقتاردى، الاڭداعى شىرشانى قۇلاتادى. اۆتوبۋسقا شابۋىلدايدى. مۇنىڭ ءبارى جەتى ايدان بەرى نەشەتۇرلى ادىلەتسىزدىك پەن مورالدىق قىسىم كورىپ تۇرعان مۇنايشىلارلىڭ قارسى ارەكەتىن تۋعىزادى. ءبارى وسى جەردەن باستالدى.
شىرشا قۇلاپ، ءبىر جەڭىل اۆتوكولىك قۇلاپ، اۆتوبۋس ورتەنىپ جاتىر. الاڭداعى ادامدار قايشىلاسىپ، ءارلى-بەرلى جۇگىرىپ كەتتى. بىرەۋلەر كيىز ۇيلەرىن جيناۋعا كىرىستى، بىرەۋلەر بالاسىن، بىرەۋلەر مەن سياقتى كۇيەۋىن ىزدەپ، حالىق ساپىرىلىسىپ كەتتى. وسى كەزدە ەشبىر ەسكەرتۋسىز الاڭعا قاراي پوليتسيا ساپ تۇزەپ كەلە جاتىپ وق اتتى! كادىمگىدەي ادامداردى الاڭنىڭ ورتاسىنا ءۇيىرىپ قويىپ، ايەل، بالا-شاعا دەمەستەن اشىقتان-اشىق وق جاۋدىردى! مەن الاڭنىڭ شەت جاعىندا ەسىمدى جيا الماي تۇرىپ قالدىم: پوليتسيا ساپ تۇزەپ، ادامدارعا قاراتا ءدال ءبىر فاشيستەر سياقتى وق جاۋدىرىپ كەلە جاتتى! وسى كەزدە ولاردان كەرى قاراي جۇگىرگەن ازاماتتار ءبىر-ءبىرىن قۇشاقتاپ، جەتەكتەپ جۇگىرەدى! ويتكەنى وق اركىمنىڭ ءار جەرىنە ءتيىپ جاتقان! ءبارى وسىلاي بولدى...
پوليتسيا كەيىن شەگىنگەن بولادى دا، قايتا العا ءجۇرىپ، قايتادان وق جاۋدىرادى! ولار بۇل ارەكەتتى ەكى-ءۇش قايتارا قايتالادى. ءبىز ورنىمىزدان قوزعالا الماي قاراپ قالىپپىز... ءبىر كەزدە ماعان جاقىنداۋ جەردە ءبىر جىگىت شالقاسىنان قۇلادى. مەن شىدامسىزداۋ اداممىن، جۇگىرىپ الگى جىگىتكە كەلىپ، ونى دەمەپ جىبەرگىم كەلدى. ول شالقاسىنان جاتىر ەكەن، جانارلارى جارتىلاي اشىق قالىپتى. «ءتىرىسىڭ بە؟» دەپ بەتىنەن ۇرىپ، موينىنداعى كۇرە تامىرىن ۇستادىم. ول ءبىر جۇتىندى دا، ءوڭى قاشىپ كەتتى... قاراسام، وق قاق ماڭدايىنان تيگەن ەكەن! مەن قولىمداعى ورامالمەن جىگىتتىڭ ماڭدايىن تاڭىپ، جاقىن ماڭداعى ادامدارعا: «كومەكتەسىڭدەر!» دەپ ايعايلادىم. بىراق مەن ول جىگىتكە شىن وق ءتيدى دەپ ويلاعان جوقپىن، انشەيىن جاراقاتتايتىن رەزەڭكە وق دەپ ويلاپ ءجۇرمىن! ادامدار كومەككە كەلگەنشە، بىزگە قاراي وق جاۋدىرىپ كەلە جاتقاندارعا ارقامدى بەرىپ، جىگىتتىڭ جانىندا وتىردىم. «رەزەڭكە وق تيسە، ارقاما ءتيسىن» دەپ ويلادىم... وقتىڭ داۋسى ەستىلىپ جاتىر، مەن ونى رەزەڭكە وق دەپ ويلادىم، ءسويتىپ ولارعا تۋ سىرتىمدى بەرىپ وتىرا بەردىم. وسى كەزدە مەنىڭ داۋسىما جەتى-سەگىز جىگىت جۇگىرىپ كەلىپ، جىگىتتى كوتەرىپ الا جونەلدى. مەن ولارعا: «وق باسىنان تيگەن، باسىن ۇستاڭدار!» دەپ جاتىرمىن. جىگىتتەر الگى بالانى جاقىن تۇرعان ءۇيدىڭ ار جاعىنا جەتكىزىپ، جەرگە جاتقىزدى دا، ءبارى تۇرعان ورىندارىندا تۇرىپ قالدى: بالا جان تاپسىرعان ەكەن! بالانىڭ باس كيىمى مەنىڭ قولىمدا قالىپ قويدى. باس كيىمنىڭ جەلكە جاعى كادىمگى ادامنىڭ قانىنا بىلعانعان! باس كيىمدى قىسىپ ۇستاپ، شىرشا تۇرعان ورتاعا قاراي جۇگىردىم. كۇيەۋىمدى، قىزىمدى ىزدەپ جۇگىردىم. ءبارىمىز سول الاڭدا ءجۇرمىز عوي... بىراق ادامداردىڭ ءبىر-ءبىرىن تابۋى، تانۋى مۇمكىن ەمەس! ءبىر قاراسام، كيىز ۇيلەردىڭ ىشىندەگى تاماق جاسالعان الاسا ۇستەلدەردى قالقالاپ، جىگىتتەردىڭ تۇرعانىن كوردىم. پوليتسيا ءالى دە بولسا وق اتىپ، اكىمدىكتىڭ ۇيىنە قاراي جاقىنداپ كەلەدى. ەكىنشى جاققا قاراسام، جاراقات العانداردى كيىز ءۇيدىڭ ىشىنەن الىنعان الاشالارعا سالىپ، اكەتىپ جاتىر ەكەن! ولاردى ساحنانىڭ ارتىنا قاراي تاسىپ اكەتىپ جاتتى... وسى كەزدە ماعان ءبىر اپاي ۇيالى تەلەفونعا قوڭىراۋ شالىپ: «شولپان قايداسىڭ؟» دەي بەردى. بايلانىس سول كەزدىڭ وزىندە بىردە ەستىلىپ، بىردە ەستىلمەي تۇردى. الگى اپايدىڭ ماعان: «ساحناعا قاراي... دۇيسەن.. اياعى...» - دەگەن سوزدەرى ءۇزىلىپ-ءۇزىلىپ ەستىلدى. مەن سولاي قاراي جۇگىردىم. ساحنانىڭ سىرتىندا تۇرعان اپاي اناداي جەردە تۇرعان ۋازيكتى كورسەتتى: «كۇيەۋىڭنىڭ اياعىنا وق ءتيدى» دەدى. جۇگىرىپ ماشيناعا كەلدىم. كەلسەم، ماشينانىڭ ىشىنە ادامداردى ءبىرىنىڭ ۇستىنە ءبىرىن سالىپ، تيەپ تاستاعان. ارتقى جاعىندا مەنىڭ كۇيەۋىم جاتىر: وڭ اياعىنان وق ءتيىپ، سۇيەگىن شاشىپ جىبەرگەنى سونشا، اياعى تەرىس قاراپ قالعان! كادىمگى اسكەري اۆتوماتتان اتىلعان وق! 1-8 سانتيمەتردەي سۇيەگى ورنىندا جوق! جارالى ادامداردى ءالى تيەپ جاتىر. ەندى ماشينا جۇرەر كەزدە: «ءبىر ايەل ادام ءمىنسىن!» - دەدى بىرەۋ. «مەنىڭ كۇيەۋىم وسىندا، مەن بارايىن»، - دەپ كولىككە ازەر قىستىرىلىپ ءمىندىم. اياق باساتىن جەر جوق. ايتا كەتەيىن، الاڭدا جەدەل جاردەم دەگەن بولعان جوق. الدىڭعى جاقتا مۇنايشىلاردان نۇرلىبەك دەگەن جىگىتتى كوردىم. وق كەڭىردەگىنەن ءتيىپ، يىعى ارقىلى جاۋىرىنىنان شىققان! تاعى ءبىر جىگىت: «قارىنداس، مەن مۇنايشى ەمەسپىن، بىراق ماعان ەكى جەردەن وق ءتيدى»، - دەپ سويلەپ جاتتى، وزگەلەرىندە ءۇن جوق، ءبارى سۇلق تۇسكەن، قان كەتىپ جاتىر...
وق اتىلىپ جاتقان جەردەن اينالىپ ءوتىپ، تاسا-تاسامەن ەمحاناعا جەتتىك. ماشينادان سەكىرىپ ءتۇسىپ: «كومەكتەسىڭدەر! مۇندا ادام كوپ. نوسيلكا كەرەك!» - دەسەم، ەمحانانىڭ الدى قاراقۇرىم ادام ەكەن. بىزگە دەيىن دە جارالانعاندار اكەلىنىپتى. نوسيلكا جەتىسپەيدى. ءسويتىپ، ادامداردى الاشامەن ءتۇسىرىپ، تاسي باستادى. ءبىز كەلگەن كولىككە كەلگەن فەلدشەر مە، بىرەۋ ەكى ادامنىڭ تامىرىن ۇستاپ كورىپ: «مىنا ەكەۋىن مورگقا!» - دەدى... سوندا بىزبەن بىرگە ەكى ولىك بارعان. ءسويتىپ مەنىڭ كوز الدىمدا ءۇش ادام ءولدى!
ءۇش قاباتتى ەمحانانىڭ بارلىق قاباتىنداعى دالىزدەردىڭ بارىندە جاراقات العان ادامدار جاتتى!
پالاتالارداعى جۇرە الاتىن ناۋقاستاردى تەز ۇيلەرىنە قايتارىپ، جارالىلاردى ورنالاستىرىپ جاتتى. ءبىز ورنالاسقان پالاتاعا قوسىمشا توسەكتەر قويىلدى، كەيبىر پالاتادا ادامدار ەدەندە دە جاتتى. دارىگەرلەردىڭ وزدەرى كىمگە نە ىستەرلەرىن بىلمەي، ەستەرى شىعىپ كەتتى. وزدەرى جەتىسپەي دە جاتىر... جاراقاتتارى جانىنا باتىپ ايعايلاعان ادامدار... بۇل - 16 جەلتوقسان كۇنى ەمحانادا ورىن العان جاعداي... كەشكە قاراي اقتاۋدان جەتى-سەگىز جەدەل جاردەم جەتتى. جولعا جارامايتىندار قالىپ، جول جۇرۋگە جارايتىنداردىڭ تىزىمىنە ىلىگىپ، اقتاۋعا كەتتىك. كۇيەۋىمنەن قان كوپ كەتىپ، ءتۇرى كوگەرىپ كەتتى...
ءوزىم بىلەتىن مۇنايشىلارعا تيگەن وقتىڭ ءبارى كىلەڭ اۆتوماتتىڭ وعى بولىپ شىقتى. تاپانشادان اتىلعان وق تۇرىپ قالادى ەكەن. وقتى الۋعا بولمايدى. وق جۇلىنىنا تۇرىپ قالعان سانسىزباي دەگەن جىگىت قازىر مۇگەدەك. تاعى ءبىر جىگىتتىڭ سان ەتىنە كىرگەن وق كۇرە تامىرعا تۇرىپ قالعان، ءالى كۇنگە دەيىن الدىرا الماي ءجۇر، الماتىعا قانشا رەت بارىپ كەلدى. قايرات، امانقوس دەگەن جىگىتتەردىڭ ومىرىنە بالتا شابىلدى. ەكەۋى دە جاس جىگىتتەر!
17 جەلتوقسان كۇنى دە جامان بولدى. 17-ءسى كۇنى ۇكىمەتتىڭ ادامدارى بانكوماتتى تونادى، ماگازيندى تونادى. ۇكىمەتتىڭ ادامدارى دەگەنىمىز - پوليتسيالار عوي جۇرگەن! قالا تاس قاراڭعى، جارىق جوق، تەلەفون جوق، ۇيالى تەلەفوندار ءوشىرىلىپ تاستالعان! وسى كەزدە توناۋ ءجۇرىپ جاتقان. ال كوشەدە بەيساۋىت كەتىپ بارا جاتقان ادام بولسا، ول ايەل مە، بالا ما، قىز با قاراماستان، قولىن قايىرىپ ماشيناعا سالىپ، پودۆالعا قاماي بەرگەن!
پودۆالعا قاتىستى ءسوز ءوز الدىنا: ونداعى ايەل بولسىن، قىز بولسىن شەشىندىرىپ، بىلگەندەرىن جاساعان! ءجاسوسپىرىم بالالاردى گاراجعا قاماپ، ايازدى كۇنى شەشىندىرىپ، سۋىق سۋ شاشىپ، ولارعا دا دۋبينكامەن بىلگەنلەرىن جاساعان! ءسويتىپ ابدەن قورلاپ، ۇيلەرىنە جىبەرگەن. سولاردىڭ اراسىندا بولعان بازارباي دەگەن جىگىت بار. مىنە، بار قورلىقتى كورىپ جاتقان تەك قاراپايىم حالىق، بىزدەرمىز. بۇگىن جاڭاوزەندە ەشنارسە وزگەرگەن جوق. ءالى كۇنگە قىسىم كورىپ وتىرمىز، ءالى دە قۋدالاپ جاتىر. كەشە كۋاگەر بولعان جاس بالانى ءولتىرىپ تاستادى. ونىڭ نە جازىعى بار؟ ارانداتۋشى توپ ءالى جۇمىس جاساپ جاتىر. ارانداتۋدى ۇيىمداستىرعان جەرگىلىكتى قالالىق، وبلىستىق باسشىلار جانە قۇزىرلى ورگاندار! الاڭدا تۇرعان مۇنايشىلار ولاردىڭ كوزىنە شىققان سۇيەلدەي بولدى. ولاردى الاڭنان قالاي كەتىرۋدىڭ جولىن ىزدەدى! وسىنىڭ ءبارىن ۇيىمداستىرعان - كومپانيا باسشىلارى: جوعارىدان تومەن قاراي، تەگىس... كەلدى دە، حالىقتى تەك قىرىپ كەتتى! «بايلانىستى قوسسىن، جاڭاوزەندەگى اتىستى توقتاتسىن!» - دەگەندەرى ءۇشىن شەتپەدە دە ءدال وسىنى قايتالادى! شەتپەدە جاراقات العاندار ءالى تيەسىلى تولەماقىسىن دا العان جوق! مۇگەدەك بولىپ قالعاندار قاراۋسىز قالدى!
ءبىزدىڭ سۇرايتىنىمىز - دۇرىس قوعامدىق كوميسسيا قۇرىلىپ، وسىلاردىڭ ءبارىن ارالاپ شىعۋ كەرەك! قاماۋدا جازىقسىز وتىرعانداردىڭ شىعۋىنا قول ۇشىن بەرىڭىزدەر! ءبىزدى تۇسىنەتىن ۇكىمەت جوق!
دايىنداعان -
گۇلميرا تويبولدينا
«وبششەستۆەننايا پوزيتسيا»
(پروەكت «DAT» № 38-39 (166-167) 25 قازان 2012 جىل
