دۇيسەنبى, 3 قازان 2022
ادەبيەت 2261 1 پىكىر 25 ناۋرىز, 2022 ساعات 14:42

ءشامشى تۋرالى جاڭا كىتاپ شىقتى

نۇر-سۇلتان قالاسىندا جازۋشى ەركىنباي اكىمقۇلوۆتىڭ «ءشامشى قالداياقوۆ – ءان پاتشاسى» اتتى جاڭا تۋىندىنىڭ سالتاناتتى تانىستىرىلىمى ءوتتى.

اتالعان تۋىندى العاش رەت 2012 جىلى جارىق كورگەن، اراعا جىلدار سالىپ ەكىنشى باسىلىم شىعىپ وتىر. اۆتور رومان-ەسسە ستيلىندە جازىلعان تۋىندىسىندا ءشامشى قالداياقوۆتىڭ جاستىق شاعى، ومىردەگى ايتۋلى ساتتەرى مەن تۇلعالىق قاسيەتى تۋرالى جازعان. سونداي-اق، كىتاپتىڭ العى سوزىندە جازىلعانداي شىعارما باستان-اياق ءشامشىنىڭ ءوز اتىنان ءوربيدى، دەپ جازادى qazradio.fm.

«ناۋرىز مەيرامىمەن قاتار كەلگەن بۇگىنگى تۋىندىنىڭ تۇساۋكەسەرى قۇتتى بولسىن! ويلاماعان جەردەن وسى كىتاپتىڭ العىسوزىن جازۋ ماعان بۇيىرىپتى. ەركىنباي اكىمقۇلوۆ اعامىزدى بۇرىننان تانيمىن. بىزدەر جۋرناليست بولساق ەكەن دەپ ارمانداپ جۇرگەندە، ەركىنباي اعامىزدىڭ «لەنينشىل جاس» گازەتىنە ماقالالارى بىرىنەن سوڭ ءبىرى شىعىپ جاتاتىن. وسىلايشا اعالارىمىزعا بوي تۇزەپ وستىك. كەيىن تاعدىردىڭ جازۋىمەن اعامىزبەن تىكەلەي تانىسىپ، ارالاسۋدىڭ ءساتى ءتۇستى. تالاي اڭگىمە-دۇكەن قۇرىپ جاقىن سىيلاستىقتا بولدىق. ەرەكەڭ ىزدەنىپماز جان ەدى، بىرنارسەنى بىلگىسى كەلەدى دە جۇرەتىن. باسقا تۋىندىلارىن ايتپاعاننىڭ وزىندە ول كىسىنىڭ 2 كىتابى كوپكە ۇلگى. ءبىرى وزبەكالى جانىبەكوۆ، ەكىنشىسى ءشامشى قالداياقوۆقا ارنالعان. قازاقتىڭ وسى 2 تۇلعاسىن ەرەكشە قۇرمەتتەيمىن، - دەدى ساياساتكەر، مەملەكەتتىك قايراتكەر قۋانىش سۇلتانوۆ.

كىتاپتىڭ تيراجى 12 مىڭ دانا. وقىرماندار جاڭا تۋىندىنى ەلىمىزدىڭ وبلىستىق، قالالىق جانە اۋداندىق كىتاپحانالارىنان وقي الادى.

«بۇل كىتاپتىڭ تاريحى ەرەكشە. اتالعان تۋىندى العاش رەت 2012 جىلى جارىق كوردى. قوعامنىڭ سۇرانىسى بويىنشا مىنە ەكىنشى باسىلىمى شىعىپ وتىر. ءشامشى قالداياقوۆتى بىلمەيتىن قازاق جوق. ول كوپتەگەن تانىمال اندەردىڭ اۆتورى عانا ەمەس، ەلىمىزدىڭ ءانۇرانى اۆتورلارىنىڭ ءبىرى. ەركىنباي اعامىز ءشامشى قالداياقوۆپەن زامانداس بولىپ، دوس، شىعارماشىل تۇلعا رەتىندە جاقىن ارالاسقان. بۇل كىتاپتا تۋىپ-وسكەن اۋىلىنان باستاپ، ونەرگە شىڭىنا جەتكەن ساتىنە دەيىنگى كەزەڭ باياندالعان. جالپى ەركىنباي اعامىز وزىندىك جازۋ ءستيلى بار ەرەكشە جازۋشى. وكىنىشكە قاراي، اعامىز 2019 جىلى باقيلىق بولدى. بۇگىن اعامىزدىڭ رۋحىن ەسكە الىپ، كىتاپتىڭ تۇساۋكەسەرىن ۇيىمداستىرىپ وتىرمىز. جاڭا تۋىندى ءوز وقىرمانىن تاباتىنىنا سەنىمدىمىن»، - دەدى قر پارلامەنتى ءماجىلىسىنىڭ دەپۋتاتى دارحان مىڭباي.

سونداي-اق، ايتۋلى شارادا ەركىنباي اكىمقۇلوۆتىڭ قىزى قۇرالاي اكىمقۇلوۆا ءوز ەستەلىگىمەن ءبولىستى.

«كىتاپ العاش رەت 2012 جىلى شىقتى. سول جىلى قازاقستان جازۋشىلار وداعى تۋىندىنى مەملەكەتتىك سىيلىققا ۇسىندى. بۇگىن ەكىنشى رەت باسىلىپ جارىق كورۋدە. وسى ورايدا وسى ىسكە ۇيىتقى بولعان قر پارلامەنتىنىڭ دەپۋتاتتارى مەن مادەنيەت جانە سپورت مينيسترلىگىنە العىسىمدى بىلدىرەمىن. مەنىڭ اكەم ءشامشى قالداياقوۆپەن ستۋدەنت كەزىنەن جاقىن ارالاسىپ، ءومىرىنىڭ سوڭىنا دەيىن دوس بولعان. ءبىراز جىلدار جاقىن ارالاسقاندىقتان مەنىڭ اكەم ءشامشىنى تەك شىعارماشىل تۇلعا رەتىندە عانا ەمەس، ازامات رەتىندە جاقسى تانىدى. سوندىقتان كىتابىندا قازاقتىڭ ۇلى كومپوزيتورىن باسقا قىرىنان كورسەتتى دەسەم بولادى. سونىمەن قاتار تۋىندى دا شامشىدەن بولەك، سول زاماندا ونەردە جۇرگەن تانىمال تۇلعالار تۋرالى دا ەستەلىك بار. ەسىمدە، بالا كۇنىمىزدە ءشامشى قالداياقوۆ ءبىزدىڭ ۇيگە قوناققا ءجيى كەلەتىن. ءبىز «ءشامشى اعا» دەيتىنبىز. وتە كوڭىلدى كىسى ەدى»، - دەدى ق. اكىمقۇلوۆا.

كىتاپتىڭ تۇساۋكەسەر سالتاناتى ەلورداداعى ۇلتتىق اكادەميالىق كىتاپحانادا ءوتتى. وعان بەلگىلى مەملەكەت جانە قوعام قايراتكەرلەرى، سەنات جانە ءماجىلىس دەپۋتاتتارى مەن اۆتوردىڭ جاقىندارى قاتىستى.

1 پىكىر