بيلىكتەگى ايقىن باسىمدىققا يە – «نۇر وتان» پارتياسىنىڭ كەزەكتەن تىس XXII سيەزى باستالدى. وعان پارتيا توراعاسى ءھام پرەزيدەنت قاسىم-جومارت توقاەۆ توراعالىق جاساۋدا. سيەز ونلاين فورماتتا وتۋدە. بۇل جولى پارتيا جۇمىسىن مودەرنيزاتسيالاۋ ماسەلەسى قارالماق.

وسىعان دەيىن پارتيا حاتشىسى اسحات ورالوۆ سيەزگە 399 دەلەگات قاتىساتىنىن مالىمدەگەن ەدى.

«جىل باسىندا ەل بولاشاعىنا قاۋىپ توندىرگەن اۋىر كۇندەردى باستان وتكەردىك. بىراق، بىرلىگىمىزدى كورسەتىپ، ەلىمىز بەن تاۋەلسىزدىگىمىزدى ساقتاپ قالدىق. سول كۇندەرى مەملەكەت باسشىسى قاسىم-جومارت كەمەلۇلى حالىقتى بىرلىككە شاقىرىپ، جاڭا قازاقستان قۇرۋعا ۇندەۋى ۇلت تاريحىنداعى تاعى ءبىر بەلەسكە جول اشتى. بۇل ورايدا «نۇر وتان» پارتياسى كوشتىڭ الدىندا، وزگەرىستەردىڭ باسىندا تۇرۋى ءتيىس»، - دەيدى پارتيا حاتشىسى اسحات ورالوۆ.

ءماجىلىستىڭ ەكس-توراعاسى نۇرلان نىعماتۋلين پارتيانىڭ ساياسي كەڭەسىنىن شىعارىلدى.

ءماجىلىستىڭ سپيكەرى ەرلان قوشانوۆ «نۇر وتان» پارتياسىنىڭ اتاۋىن «امانات» دەپ وزگەرتۋدى ۇسىندى. ال پرەزيدەنت توقاەۆ بۇل ۇسىنىستى قابىل الدى.

«پارتيا بارلىق رەفورماعا ۇيىتقى بولۋعا ءتيىس. ول ءۇشىن وزگەرىستى الدىمەن وزىمىزدەن باستاۋىمىز كەرەك. سوندىقتان بۇگىنگى كۇنتارتىبىندەگى نەگىزگى ماسەلە - پارتيانى جاڭعىرتۋ. زامان، قوعام، ادام وزگەرىپ جاتقاندا پارتيانىڭ وزگەرۋى زاڭدىلىق. بۇل - ۋاقىت تالابى. وسىعان وراي جاڭا عانا ايتىلعانداي، ساياسي ۇيىمنىڭ اتاۋىن «امانات» دەپ وزگەرتۋ ۇسىنىلدى.

جاسىراتىن ەشتەڭە جوق، مەن دە بۇل ماسەلەگە بايلانىستى پىكىرتالاسقا قاتىستىم. بىرنەشە ۇسىنىس بولدى. سونىڭ ىشىنەن «امانات» دەگەن اتاۋعا توقتالدىق. بۇل ەلىمىز ءۇشىن دە، ۇلتىمىز ءۇشىن دە ايرىقشا ءمانى بار كيەلى ۇعىم.

مەملەكەتتىلىك، ءداستۇر جالعاستىعى، ۇرپاق ساباقتاستىعى دەگەنىمىز مىنە وسى. حالقىمىز ەشقاشان اماناتقا قيانات جاساماعان. پارتيا بۇل قاعيداتتى بەرىك ۇستانادى»، - دەدى پرەزيدەنت توقاەۆ.

Abai.kz