ەكس-پرەزيدەنت نۇرسۇلتان نازارباەۆتىڭ كۇيەۋ بالاسى تيمۋر قۇلىباەۆ باسقاراتىن ۇلتتىق وليمپيادا كوميتەتى الداعى ۋاقىتتا سپورتقا بولىنەتىن قارجىنى يگەرمەيتىن بولدى. بۇعان سەبەپ پرەزيدەنت قاسىم-جومارت توقاەۆتىڭ «تاپسىرماسىمەن» مادەنيەت جانە سپورت مينيسترلىگىندەگى سپورت كوميتەتىنىڭ ۇوك-پەن اراداعى كەلىسىم-شارتتى جويۋى بولىپ وتىر. 28 قاڭتاردا ۇوك-گە رەسمي جولدانعان حاتتا ەكى تاراپتىڭ ساۋىردەن باستاپ كەلىسىم-شارتتى ۇزەتىنى جازىلعان.

«كەلىسىم-شارت ۇزىلەتىن ۋاقىتقا دەيىن ەڭبەكاقى تولەۋ، كەلىسىم-شارت بويىنشا تولەمدەر، كەڭسە مەن قويمانى جالعا الۋعا قارجى، بانك قىزمەتتەرى، فەدەراتسيالارىنىڭ قىزمەتىنە كەتكەن قارجى، شەتەلگە شىعۋ شىعىنى تولەنەدى. قازىرگە دەيىن كوميتەت كەلىسىم-شارتقا ساي [ۇوك-كە] 800 ملن تەڭگە الدىن الا تولەم جىبەردى. قالعان شىعىندى اتقارىلعان جۇمىس اكتىسىن جىبەرگەن سوڭ بەرىلەدى»، - دەپ جازىلعان. حاتقا سپورت كوميتەتىنىڭ توراعاسى سامات ەرعاليەۆ قول قويعان.

تاقىرىپقى تۇزدىق رەتىندە ايتا كەتەيىك، ءدال قازىر ءوتىپ جاتقان بەيجىڭ قىسقى وليمپياداسىنا اتتانعان سپورتشىلارىمىز كۇنى بۇگىنگە دەيىن ەل قورجىنىنا بىردە-ءبىر مەدال سالا المادى. شورت-ترەك بويىنشا ءتورتىنشى ورىنعا شىققان ابزال اجىعاليەۆتىڭ ناتيجەسىن جۇبانىش قىلىپ وتىرمىز. بۇعان كىم كىنالى؟

تاقىرىپقا تۇزدىق رەتىندە ايتا كەتەيىك، ءبىز وسىعان دەيىن قازاق سپورتىنىڭ قوجاسى - مينيسترلەر مەن ميلليونەرلەر ەكەنىن بىرنەشە مارتە جازدىق.  سونىمەن، قازاق سپورتىنا باسشىلىق ەتىپ وتىرعاندار كىمدەر؟ قاراڭىز، رەت-رەتىمەن جازايىق...

ۇلتتىق وليمپيادا كوميتەتىن باسقارىپ وتىرعاندار:

ۇوك پرەزيدەنتى – تيمۋر اسقارۇلى قۇلىباەۆ. ونىڭ ۆيتسە-پرەزيدەنتتەرى: دانيار ابىلعازين، قايرات بورانباەۆ، ادىلبەك جاقسىبەكوۆ، اسقار مامين، ءۇمىت شاياحمەتوۆا.

كونكيشىلەردىڭ ۇلتتىق فەدەراتسياسىن – بولات جامىشەۆ باسقارادى. ونىڭ قۇرامىنا كونكيمەن جۇيىتكۋ سپورتى، مانەرلەپ سىرعاناۋ سپورتى مەن شورت-ترەك سپورتى كىرەدى.

شاڭعى سپورت تۇرلەرى فەدەراتسياسىن – دياس سۇلەيمەنوۆ دەيتىن كاسىپكەر باسقارادى ەكەن. ونىڭ قۇرامىنا شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، سنوۋبورد، فريستايل كىرەدى.

كەرلينگ فەدەراتسياسىن – امانتاي كۇرەڭبەكوۆ دەيتىن گەنەرال، مەملەكەتتىك كۇزەت قىزمەتىنىڭ ەكس-باستىعى باسقارادى ەكەن. مەملەكەتتىك قاۋىپسىزدىك كوميتەتىندە ىستەگەن. پرەزيدەنت كۇزەتىن باسقارعان. ءىىم-دە ۆيتسە-مينيستر بولعان. قازىر زەينەتتە.

بياتلونشىلار وداعىن – ەرمەك قيزاتوۆ دەيتىن ادام باسقارادى ەكەن. ول استانا اكىمى التاي كولگىنوۆتىڭ ورىنباسارى.

شايبالى حوككەي فەدەراتسياسىن – اسقار مامين تىزگىندەگەن.

بۇل قىسقى سپورت تۇرلەرى. ال جازعى سپورت تۇرلەرىنەن فەدەراتسيالار مەن وداقتاردى تومەندەگى ازاماتتار تىزگىندەپ وتىر:

قايىق فەدەراتسياسىن – قايرات ايتەكەنوۆ باسقارادى. قۇرامىنا اكادەميالىق ەسۋ; بايداركا مەن كانوە ەسۋ; سلالومدىق ەسۋ سپورت تۇرلەرى كىرەدى.

گاندبول فەدەراتسياسىن – گۇلنار تۇرلىحانوۆا باسقارادى.

اۋىر اتلەتيكا فەدەراتسياسى – جانات تۇسىپبەكوۆتىڭ باسقارۋىندا.

ۆەلوسيپەد سپورتى فەدەراتسياسىن – نۇرلان سماعۇلوۆ باسقارادى.

گرەك-ريم، ەركىن جانە ايەلدەر كۇرەسى فەدەراتسياسىنىڭ – پرەزيدەنتى داۋلەت تۇرلىحانوۆ.

كاراتە (wkf) فەدەراتسياسىن – ەۆگەني پاك باسقارادى.

بوكس فەدەراتسياسىنا – كەڭەس راقىشەۆ باسشىلىق جاساپ وتىر.

جەڭىل اتلەتيكا فەدەراتسياسىن – دانيال احمەتوۆ باسقارادى.

ترياتلون فەدەراتسياسىن – الديار قازتاەۆ تىزگىندەگەن.

سۋ سپورتى تۇرلەرى فەدەراتسياسىنا – اندرەي كريۋكوۆ دەيتىن ادام باسشى. وعان سۋ پولوسى، ءجۇزۋ، مانەرلەپ ءجۇزۋ، سۋعا سەكىرۋ سپورت تۇرلەرى كىرەدى.

قازىرگى بەسسايىس فەدەراتسياسى – بەرىك يماشەۆتىڭ ەنشىسىنە ءتيتىپتى.

سپورتقا ءۇش قايناسا سورپاسى قوسىلمايتىن وسى ازاماتتار (شەندىلەر) وزدەرى باسقارىپ وتىرعان فەدەراتسيانىڭ دامۋى ءۇشىن قانشالىقتى ۇلەس قوستى؟ ۇزاق جىلداردەن بەرى ءتۇرلى مەملەكەتتىك لاۋازىمدى قىزمەتتەردى اتقارعان، اتقارىپ كەلە جاتقان دانيال احمەتوۆ، اسقار مامين، ادىلبەك جاقسىبەكوۆ، بەرىك يماشەۆ، بولات جامىشەۆ ت.ب. ازاماتتار وزدەرى باسشىلىق ەتىپ وتىرعان سپورت سالاسىنىڭ ناعىز ماماندارى دەۋ قيىن. ءدال وسى جايت قازاق سپورتىنىڭ دامۋىنا تۇساۋ بولىپ كەلەدى. بۇعان قوسا، سپورت سالاسىنداعى جەڭ ۇشىنان جالعاسقان جەمقورلىققا دا وسى مينيستر-ميلليونەرلەردىڭ جاۋاپكەرشىلىگى بار...

Abai.kz