قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ كىشى قىزى قازاقستاننان شامامەن 300 ميلليون دوللاردى الىپ شىققانىن The Telegraph گازەتى جازدى.

قازاقستاننىڭ ءبىرىنشى پرەزيدەنتى نۇرسۇلتان نازارباەۆتىڭ كەنجە قىزى ءاليا نازارباەۆا ەلدەن 300 ميلليون دوللارعا جۋىق اقشانى الىپ شىعىپ، لوندوننان 11,8 ميلليون دوللارعا ءزاۋلىم ءۇي، جەكە ۇشاق، شۆەيتسار بانكىنىڭ اكتسيالارىن جانە دۋبايدان ءۇي ساتىپ العان. بۇل تۋرالى بريتاندىق The Telegraph گازەتى زاڭدى قۇجاتتارعا سىلتەمە جاساي وتىرىپ مالىمدەدى.

باسىلىمنىڭ حابارلاۋىنشا، ءاليا نازارباەۆا لوندوننىڭ جوعارعى سوتىنا ەكى قارجى كەڭەسشىسىنە قارسى كوپ ميلليوندىق قارىزدى ءوندىرۋ تۋرالى ارىز-شاعىم بەرگەن. ولاردى ساتقىندىق، قاراجاتتى زاڭسىز يەمدەنۋ، الاياقتىق جاساۋ ءۇشىن قاستاندىق ۇيىمداستىرۋ بويىنشا كىنالاعان. قازىر ەكى جاق كەلىسىمگە كەلدى. الايدا وسى وقيعادان كەيىن نازارباەۆانىڭ ەلدەن الىپ كەتكەن ميلليونداعان دوللارلارى تۋرالى دەرەك شىقتى.

كەڭەسشىلەرى وعان قازاقستاندا اكتيۆتەرىن ۇستاپ تۇرۋ قاۋىپتى ەكەنىن ەسكەرتكەن سوڭ، ەلدەن 312 ميلليون دوللار جەكە قاراجاتىن شىعارعان. بۇدان باسقا، 2006 جىلى نازارباەۆا قازاقستاننىڭ بىرنەشە كومپانيالارىنىڭ اكتسيالارىنان شامامەن 325 ميلليون دوللار تابىس تاپتى. قارجى كەڭەسشىلەرى وعان قارجىنى وففشورلار ارقىلى ليحتەنشتەين مەن ۆيرگين ارالدارىنا اۋدارۋدى ۇسىنادى. نازارباەۆا شۆەيتساريالىق جەكەمەنشىك «CBH Bank» بانكىنىڭ 51 پايىزدىق اكتسياسىن الۋ ءۇشىن 108 ميلليون دوللار ينۆەستيتسيا قۇيعان.

ول لوندوننان 11,9 ملن دوللورعا ءۇي ساتىپ الدى. ال، Challenger Bombardier جەكە ۇشاعىن 25 ميلليون دوللارعا، دۋبايداعى ۆيللانى 14 ميلليون دوللارعا ساتىپ العان.

The Telegraph اتاپ وتكەندەي، ءاليا نازارباەۆانىڭ زاڭسىز بايۋى تۋرالى دەرەكتەر جوق، دەگەنمەن «ونىڭ ەلدەن الىپ شىققان اقشاسى تۋرالى جانە ىسكەرلىك وپەراتسيالاردى قالاي جۇرگىزگەنى تۋرالى» ساراپشىلاردى الاڭداتار سۇراقتار بار.

Abai.kz