جۇما, 20 مامىر 2022
1905 4 پىكىر 21 قاڭتار, 2022 ساعات 16:06

دۋما "دنر" مەن "لنر-ءدى" مويىنداماق

كەلەسى اپتادا مەملەكەتتىك دۋما ۋكراينانىڭ شىعىسىنداعى تاۋەلسىز جىكشىل رەسپۋبليكالاردى مويىنداۋ جوباسىن قارايدى. ودان سوڭ قۇجاتتى دۋما كەڭەسى تالقىلايدى.

رەسەي پارلامەنتى تومەنگى پالاتاسىنىڭ توراعاسى ۆياچەسلاۆ ۆولودين تەلەگرام-ارناسىندا وسىلاي دەپ حابارلادى.

ونىڭ ايتۋىنشا، ۋكراينا پرەزيدەنتى ۆلاديمير زەلەنسكي مينسك كەلىسىمى شارتتارىن ورىنداعىسى كەلمەيدى، ال ناتو "ۋكراينانى باسىپ العىسى كەلەدى". "بۇل ەكەۋى دە تراگەدياعا ۇلاسادى. ءبىز بۇعان جول بەرمەيمىز", — دەيدى ۆولودين. ونىڭ مالىمدەۋىنشە، ماسكەۋ "لنر" مەن "دنر-دەگى" وتانداستارىن قورعاۋ جولدارىن ىزدەستىرۋى ءتيىس.

سارسەنبى كۇنى رفكپ فراكتسياسىنىڭ دەپۋتاتتارى، سولاردىڭ ىشىندە گەننادي زيۋگانوۆ، مەملەكەتتىك دۋماعا پالاتا قارارىنىڭ جوباسىن ۇسىندى. جوبا پرەزيدەنت ۆلاديمير پۋتينگە "لنر" مەن "دنر" تاۋەلسىزدىگىن مويىنداۋ تۋرالى رەسمي ۇسىنىس جاساۋدى قاراستىرادى.

بۇل تاقىرىپ رەسەي مەن ۋكراينا شەكاراسىنداعى جاعداي شيەلەنىسكەن تۇستا تالقىلانا باستادى. رەسەي اسكەرى شەكاراعا جاقىن ماڭعا توپتاسقانى تۋرالى مالىمەتتەر كوپ. باتىس ەلدەرىنىڭ ۇكىمەتتەرى ماسكەۋ كورشى ەلگە شابۋىلداۋى مۇمكىن دەپ سەسكەنەدى. كرەمل بۇنى جوققا شىعارىپ وتىر.

Abai.kz

4 پىكىر