جۇما, 20 مامىر 2022
ايقاي 1898 13 پىكىر 19 قاڭتار, 2022 ساعات 11:39

ءوزىمىزدى ءوزىمىز تونادىق پا؟..

مىنە، وسى قاڭتار ايىنىڭ باسىندا وتكەن حالىقتىڭ جاپپاي نارازىلىعىنىڭ سەبەپ-سالدارىن اشىپ، مۇندايعا كەلەشەكتە جول بەرمەۋدىڭ جولىن قاراستىرىپ، ناقتى ساباق الۋ - بۇگىنگى كۇننىڭ اسا وزەكتى ماسەلەسى. ەڭ باستىسى، حالىقتىڭ گاز بەن باسقا دا تاۋارلار باعاسىنىڭ شارىقتاپ ءوسىپ كەتۋىنە دەگەن قارسىلىعىنىڭ بۇكىلحالىقتىق سيپاتقا يە بولۋىن بيلىكتىڭ مۇلدەم كۇتپەگەندىگى.

باياعى ەسكى سارىنمەن «ە، نە بولار دەيسىڭ، ايقايلاپ-ايقايلاپ قويار» دەگەن جالعان ۇمىتپەن، وزدەرىن-وزدەرى جۇباتىپ، قالىڭ ۇيقىسىنان ويانا قويمادى. مۇنىڭ الدىن الىپ، ناقتى شارالار قولدانۋعا  ۇكىمەتتىڭ دە، ونىڭ سوڭىنىڭ جاپپاي بۇلىنشىلىككە، ءتىپتى، ادام ولىمىنە دەيىن جەتۋىنە جول بەرمەۋگە، كنب دەگەن انشەيىندە جۇرتتىڭ زارەسىن ۇشىراتىن قۇدىرەتتى ورگانسىماقتىڭ دا قاۋقارى جەتپەدى. ارميا گەنەرالدارىنىڭ دا كاسىبي دارەجەسىنىڭ ابدەن قۇلدىراپ، قارۋلى كۇشتەردى قالاي باسقارۋدى مۇلدەم بىلمەيتىندىگى دە ايداي الەمگە بەلگىلى بولدى. الماتى قالاسىندا عيماراتتاردى جاپپاي ورتەۋ مەن دۇكەندەردى توناۋ سەكىلدى مەملەكەتكە اسا قاۋىپتى جاعداي بايقالعاندا قاتارداعى پوليتسەيلەردىڭ ولارعا توقتاۋ سالۋعا ءالى كەلمەيتىندىگى انىق بايقالدى ەمەس پە؟.. ەندەشە اسا شالت قيمىلداپ، وتار سەكىلدى، ودان دا باسقا جاقىن جەردەگى اسكەري بازالارداعى مۇنداي بۇلىكتى باسۋعا قاۋقارى جەتەتىن دەسانتتىق اسكەردى نەگە قالاعا جەدەل ەنگىزىپ، قارۋلى توپتاردى ءبىرجوتالاتا جويىپ جىبەرمەسكە؟.. باسقاسى-باسقا قالاداعى قويان-قولتىق شايقاسقا كىرىپ كەتكەن قارۋلى بانديتتەر مەن لاڭكەستىك توپتاردى مىنە، وسىلار تاۋبەسىنە كەلتىرەر ەدى عوي. ويتكەنى ءدال وسى دەسانتشىلار عانا قويان-قولتىق شايقاسىپ، بىردەن بۇعالاۋعا  ارنايى دايىندالادى.

مىنە، گەنەراليتەتتىڭ وسىنداي دارمەنسىزدىگىنەن ۇقشۇ (ودكب) دەگەن ۇيىمنان كومەك سۇراۋدان باسقا امال قالمادى. ارينە، شەتەلدىك اسكەردى ەلگە كىرگىزۋ جايلى ەلدە ءارتۇرلى پىكىرلەردىڭ بار ەكەنى دە راس. مۇمكىن، ولاردى دا تۇسىنۋگە بولار. الايدا، مەنىڭشە، پرەزيدەنتىمىزدىڭ بۇدان باسقا جاسار امالى قالمادى ما دەگەن ويدامىن. ارينە، بۇل مەنىڭ جەكە پىكىرىم.

جارايدى، «بولارى بولدى، بوياۋى ءسىڭدى» دەگەندەي، وتكەنگە سالاۋات. ءومىر بىرتە-بىرتە قالپىنا كەلەر. مۇمكىن ەلدىڭ بايلىعىن ءبىر ءوزىنىڭ ۋىسىندا ۇستاعان ايگىلى وتباسىنىڭ وليگارحيالىق باسقارۋ جۇيەسىنىڭ تاس-تالقانى شىعىپ، شىن مانىندەگى نارىقتىق قاتىناستارعا كوشەرمىز. سول وتباسىنا جاقىندىعىن پايدالانىپ، حالىقتىڭ قازىناسىنا «قول سالىپ، قول سالعاندا مول سالدىپ»، ابدەن بايىپ، قۇدايىن ۇمىتقان بايشىكەشتەر دە جاۋاپقا تراتىلار. بۇعان توقاەۆ مىرزانىڭ باتىلدىعى جەتەر دەپ ويلايمىز. ويتكەنى بۇل - ادىلەتتىك ءۇشىن شەيىت بولعانداردىڭ الدىنداعى ازاماتتىق قارىزى دەسەك، ارتىق ايتقاندىق بولماس.

مەنى تاعى ءبىر ويلاندىرعان ماسەلە، الماتىداعى جاپپاي باسسىزدىق كەزىندە دۇكەندەر تونالىپ جاتقاندا، انشەيىندە قوي اۋزىنان ءشوپ المايتىن ازاماتتاردىڭ الگىندەي نيەتى بۇزىق ادامدارعا بىردەن قوسىلىپ كەتكەندىگى بولدى. ءتىپتى، ينتەرنەتتە ءبىر ايەل ادامنىڭ دۇكەننەن ءبىر قۇشاق زاتتى كوتەرىپ الىپ، ءماز-ءمايرام بولىپ، شىعىپ بارا جاتقانى قازىرگى تىلمەن ايتقاندا ەرەكشە «مەمگە» اينالىپ، شارتاراپقا تاراپ كەتتى. ونىڭ سوڭىنان ءبىر جاس جىگىت تە ۇرلانىپ شىعىپ بارادى. ونى ايتاسىز، كەيبىر ءباسپاسوز قۇرالدارى مۇندايلاردىڭ اراسىندا اياعى اۋىر ايەلدەردىڭ دە كەزدەسكەندىگىن جازدى.

سوندا ءبىز قانداي ەل بولدىق؟ اتامىز قازاقتىڭ «بۇلىنگەن جەردەن بۇلدىرگى الما» دەگەنى قايدا؟ ەڭ بولماسا، اناۋ جاپون جۇرتىنان ۇلگى الساق قايتەدى؟ اتاقتى فۋكۋسيما اتوم ستانتسياسى سىر بەرگەندە، سونداعى تۇراتىن جۇرتتىڭ بارلىعى ءۇي-جايى مەن دۇنيە-مۇلكىن تاستاي قاشقان. سوندا قاراپايىم جاپوندار نە ىستەدى دەيسىزدەر عوي... ولار كوشەدە شالىلىپ جاتقان دۇنيەنى جيناستىرىپ، اقشاسى مەن قۇجاتتارى بار ءاميانداردى ارنايى اپارىپ پوليتسياعا تاپسىرعان. كۇنى ەرتەڭ ولاردىڭ يەسى ەڭ بولماسا جوعالعان قۇجاتتارىن قالپىنا كەلتىرەم دەپ بوسقا اۋرە بولىپ،  اسىل ۋاقىتتارىن جوعالتپاسىن دەگەن جاناشىرلىعى ەدى. ال ءبىز بولساق..

ە، قايسى ءبىرىن ايتا بەرەسىڭ...ەندى جۇرتقا نىساپ پەن قايىرىمدىلىق بەرسىن دەلىك.

جايبەرگەن بولاتوۆ

Abai.kz

13 پىكىر