ەلدەگى جاپپاي تارتىپسىزدىكتەر كەزىندە ادامداردىڭ قايتىس بولۋىنا بايلانىستى قر پرەزيدەنتى قاسىم-جومارت توقاەۆ 10 قاڭتاردى جالپىۇلتتىق ازا تۇتۋ كۇنى دەپ جاريالادى.

«تەرروريستىك اكتىلەردىڭ سالدارىنان ادامداردىڭ قازاعا ۇشىراۋىنا بايلانىستى قازاقستان رەسپۋبليكاسىندا جالپىۇلتتىق ازا تۇتۋ جاريالاۋ تۋرالى 2022 جىلعى 08 قاڭتار قازاقستان رەسپۋبليكاسىندا جاسالعان تەرروريستىك اكتىلەردىڭ سالدارىنان ادامداردىڭ قازا بولۋىنا بايلانىستى قازاقستان رەسپۋبليكاسىندا 2022 جىلعى 10 قاڭتاردا جالپىۇلتتىق ازا تۇتۋ جاريالانسىن»،- دەلىنگەن مەملەكەت باسشىسىنىڭ جارلىعىندا.

ازا تۇتۋ كۇنىنە بايلانىستى قازاقستان بويىنشا بارلىق مەملەكەتتىك تۋلار تومەن تۇسىرىلەدى. وسىلايشا بۇلىك كەزىندە قازا تاپقان بەيبىت تۇرعىندار مەن اسكەريلەر، پوليتسيا وكىلدەرى مەن قۇقىق قورعاۋ قىزمەتكەرلەرىنە قۇرمەت كورسەتىلەدى.

ايتا كەتەيىك، پرەزيدەنت سوڭعى ۋاقىتتا بولعان قاقتىعىستار كەزىندە قايتىس بولعان ازاماتتاردىڭ تۋعان-تۋىسقاندارى مەن وتباسىلارىنا كوڭىل ايتقان بولاتىن.

«الماتىدا سودىر-لاڭكەستەردىڭ قولىنان اكىمشىلىك عيماراتتار عانا ەمەس، بەيبىت تۇرعىنداردىڭ مۇلكىنە دە زالال كەلدى. سونداي-اق جۇزدەگەن بەيبىت تۇرعىن مەن اسكەري قىزمەتشىنىڭ دەنساۋلىعى مەن ومىرىنە قاتەر ءتوندى. وسى تراگەديالار كەزىندە قايتىس بولعانداردىڭ وتباسىنا كوڭىل ايتامىن»، - دەدى پرەزيدەنت.

سونداي-اق ول  قاسكويلىككە بارعان ادامداردىڭ ءبارى قاتاڭ جازالاناتىنىن ايتقان

«ءبىزدىڭ تاريحىمىزداعى وسى ءبىر قيىندىقتى تەز ارادا ەڭسەرەتىنىمىزگە ەشقانداي كۇمان جوق. ەڭ باستىسى، بولاشاقتا مۇنداي وقيعالاردىڭ قايتالانۋىنا جول بەرمەۋ كەرەك. مەن قۇرعان ۆەدومستۆوارالىق توپ سودىرلار مەن لاڭكەستەردى ىزدەۋمەن جانە ولاردى ۇستاۋمەن اينالىسادى. ولاردىڭ ءبارى قاتاڭ قىلمىستىق جاۋاپكەرشىلىككە تارتىلادى دەپ ازاماتتارىمىزعا ۋادە بەرەمىن. بارشا قازاقستاندىقتان وتىنەرىم، ساقتىق تانىتىپ، بارىنشا قىراعى بولىڭىزدار. كۇماندى ادامداردىڭ قانداي دا ءبىر كۇدىك تۋدىراتىن بەلسەندى ارەكەتىن بايقاساڭىز، قۇقىق قورعاۋ ورگاندارى مەن جەدەل جەلىلەرگە حابارلاڭىزدار»، - دەدى ق.توقاەۆ.

Abai.kz