بەيسەنبى, 28 ناۋرىز 2024
انە، كوردىڭ بە؟ 7850 34 پىكىر 25 جەلتوقسان, 2021 ساعات 00:52

ءمينيستردى كوشىرگەن كرەملدىڭ تەكپىنى، اقوردانىڭ ەكپىنى...

قر اۋىل شارۋاشىلىعى مينيسترلىگى عيمارات اۋىستىرىپ جاتىر. استانانىڭ وڭ جاعالاۋىنداعى داۋدەي عيماراتتى بوساتىپ بەرىپ، مينيسترلىكلەر ۇيىنە قونىس تەپپەك. بۇل كوشتىڭ قۇنى – 3,5 ميلليارد تەڭگە ەكەن. قاراجاتتى ۇكىمەت ءبولىپتى. مۇنى مينيستر ەربول قاراشوكەەۆتىڭ ءوزى ايتتى.

«بارلىق مينيسترلىكتەر سول جاعالاۋدا. بارلىعى مينيسترلىكتەر ءۇيىنىڭ عيماراتىندا ورنالاسقان. وكىنىشكە وراي، وسىعان دەيىن ءبىزدىڭ ول جاققا كوشۋگە مۇمكىندىگىمىز بولمادى. قاراجات ىزدەدىك. ۇكىمەتكە راحمەت. ءبىز مينيسترلىكتەر ءۇيىنىڭ ءۇشىنشى كىرەبەرىسىنە كوشەمىز. ارينە، بىزگە قالانىڭ باسقا اۋدانىندا دا وتىرۋعا بولار ەدى. بىراق، بىزگە بارلىق مينيسترلىكتەر وتىرعان جەردە جۇمىس ىستەگەن ءجون دەپ ويلايمىن. بۇل ءوز كەزەگىندە اۋىل شارۋاشىلىعى مينيسترلىگى جۇمىسىنا دا وڭتايلى اسەر ەتەدى»، – دەدى مينيستر.

بيىل قازاقستاننىڭ باتىسى مەن قىزىلوردا وبلىسى سەكىلدى بىرقاتار ايماقتاردا قاتتى قۋاڭشىلىق بولىپ، مال قىرىلعان الاعاي دا بۇلاعاي كەزدە قر اۋىل شارۋاشىلىعى مينيسترلىگىن تىزگىندەگەن ەربول قاراشوكەەۆ باسقا شارۋانى «ىسىرىپ قويىپ»، مينيسترلىكتىڭ عيماراتىن اۋىستىرۋعا بەل شەشە كىرىسكەن ەكەن. ءمينيستردىڭ ءوزى بولسا، 3,5 ميلليارد بيۋدجەت قارجىسى جۇمسالاتىن بۇل كوشتىڭ قۋاڭشىلىقتىڭ زارداپتارىن شەشۋ، جەم-ءشوپتىڭ باعاسىن تۇراقتاندىرۋ، اۋىل شارۋاشىلىعىنىڭ وزگە دە سالالارى مەن اۋىل شارۋاشىلىعى تاۋارلارىن وندىرۋشىلەردى قولداۋ ت.ب. سەكىلدى باسقا باعدارلامالاردى جۇزەگە اسىرۋعا ەش كەدەرگىسى بولمايتىنىن ايتىپ، اقتارىلىپتى.

قارا قىستا قاراشوكەەۆتى جىلى ورنىنان قوزعاعان نە كۇش دەرسىز. قاراشوكەەۆتەن قالعان الىپ عيمارات رەسەيلىك ۋنيۆەرسيتەتتىڭ فيليالىنا بەرىلمەك. قر اشم عيماراتى لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە تارتۋ ەتىلىپتى. بۇل تۋرالى قر مەملەكەتتىك حاتشىسى قىرىمبەك كوشەرباەۆتىڭ ءوزى مالىمدەگەن. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستانداعى فيليالىنىڭ 20 جىلدىق تويىندا ايتقان.

«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ەل ۇكىمەتى لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ فيليالىنا جالپى اۋدانى 13 مىڭ شارشى مەتر بولاتىن اۋىل شارۋاشىلىعى مينيسترلىگىنىڭ 15 قاباتتى كەڭسەسىن بەرۋ تۋرالى شەشىم قابىلدادى. بۇل بىزگە رەسەيلىك ارىپتەستەرمەن بىرگە باسىمدىققا يە ماماندىقتار بويىنشا جوعارى بىلىكتى مامانداردى دايارلاۋ ءتىزىمىن كەڭەيتۋگە مۇمكىندىك بەرەدى دەپ ويلايمىن. سوندىقتان الداعى جاڭا جىلدا ءسىزدى جاعىمدى ىستەر كۇتىپ تۇر»، - دەپتى كوشەرباەۆ.

ايتا كەتەيىك، كۇنى كەشە عانا رەسەي پرەزيدەنتى ۆلاديمير پۋتين 500-گە جۋىق ءجۋرناليستى جيناپ الىپ وتكىزگەن ءباسپاسوز جيىنىندا قازاقستاندى «قاي جاعىنان السا دا ورىس ءتىلدى مەملەكەت» دەپ اتاپ، ورىس ءتىلىن وقىتاتىن مەكتەپتەر مەن جوعارعى وقۋ ورىندارىنىڭ ارتىپ كەلە جاتقانىن ايتىپ، قازاقستان باسشىلىعىنا العىس بىلدىرگەن ەدى.

ال جاڭاعى «بۇيرىق قاتتى، جان تاتتىگە» سالىپ، تابىلماي تۇرعان اقشاسى ىلدىم-جىلدىم تابىلا كەتىپ، ەدەل-جەدەل كوشتىڭ قامىنا كىرىسكەن مينيستر قاراشوكەەۆكە قازاق شارۋالارىنىڭ قاباعى قاتۋلى ەكەنى تاعى بار. قۋاڭشىلىق قىستى. مال قىرىلدى. جەم-ءشوپتىڭ جەتىسپەۋشىلىگى جانە شەشىلگەن جوق. قۇرعاق جازدان كەيىنگى كۇردەلى جاعداي ءالى دە جاقسارماي تۇر. وسىعان دەيىن، ماڭعىستاۋ وبلىسىنىڭ فەرمەرلەرى ەربول قاراشوكەەۆتەن وتستاۆكاعا كەتۋدى جانە كاسىبي باسشىعا ورىن بەرۋدى تالاپ ەتكەن بولاتىن.

سونىمەن، قاراشوكەەۆتى كوشىرگەن - اقوردانىڭ ەكپىنى، كرەملدىڭ تەكپىنى بولىپ تۇر...

نۇرگەلدى ابدىعانيۇلى

Abai.kz

34 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2254
عيبىرات

قايسار رۋحتى عازيز جان

مۇحتار قۇل-مۇحاممەد 3521