بەيسەنبى, 19 مامىر 2022
بۇ نە مازاق؟ 4203 29 پىكىر 16 جەلتوقسان, 2021 ساعات 19:13

الماتى اكىمدىگى تاۋەلسىزدىك كۇنىنەن نەگە قورقادى؟

الماتى ازاتتىقتىڭ كۋاگەرى، بوزداقتاردىڭ قانىن كورگەن قاسيەتتى قالا. جەلتوقسان دەسە ەسىمىزگە بىردەن الماتىنىڭ الاڭى تۇسەتىنى دە سودان. تاۋەلسىزدىك كۇنىن اتاپ وتۋدە الماتى الدا بولۋى ءتيىس ەدى، الايدا ولاي بولمادى. بۇگىن «جەلتوقسان وقيعاسىنىڭ» 35 جىلدىعى مەن تاۋەلسىزدىكتىڭ 30 جىلدىعىندا قالا اكىمدىگى تاۋەلسىزدىككە ارنالعان شارانى الاڭدا ىم-جىمسىز, تەز وتكەرۋدى ءجون كوردى. 

ءىس-شارا باستالماي تۇرىپ، الاڭدى اكىمدىك قورشاپ تاستادى. باس الاڭعا جول جابىلدى، ال وعان بارۋ ءۇشىن كولىكتى كەمى جارتى شاقىرىم جەرگە قويىپ كەتۋىڭىزگە تۋرا كەلەدى. الاڭعا بارار جولدىڭ بارلىعىندا پوليتسيا قىزمەتكەرلەرى تۇردى.

الاڭداعى باس شارا بيىل ەرەكشە سالتاناتپەن وتەدى دەپ كۇتىلگەن بولاتىن. ولاي بولمادى. ادەتتەگىدەي، انىعى جەتىم قىزدىڭ تويىنداي ءوتتى. جەلتوقسان قۇرباندارىن ەسكە الىپ، مونۋمەنتكە گۇل شوعىن قويۋ راسىمىنە قالا تۇرعىندارى از كەلدى. الاڭدا ۇكىمەتتىك ەمەس ۇيىم مۇشەلەرى، مەملەكەتتىك ورگان قىزمەتكەرلەرى مەن اۋعان سوعىسىنا قاتىسقاندار جانە ارينە، جەلتوقسانشىلار بولدى. بارلىعى 200-250 ادام. ودان بولەك بۇرىش-بۇرىشتا ساربازدار توبى مەن كولىكتەردە ارنايى قىزمەت وكىلدەرى وتىردى. ولاردىڭ سانى الاڭعا جينالعان قاۋىمنان كوپ بولماسا، از ەمەس.

گۇل شوقتارىن قويۋ راسىمىنە قالا اكىمى باقىتجان ساعىنتاەۆ قاتىستى. ول تەز ارادا گۇل شوقتارىن قويىپ، الاڭنان كەتىپ قالدى. ەڭ باستى مەرەكەدە، ەڭ باستى الاڭدا  حالىقپەن بىرگە نەگە كوبىرەك بولماعانى تۇسىنىكسىز. جالپى مەملەكەتتىك ورگان قىزمەتكەرلەرى بۇل كۇندى بەلگىسىز «ۇرەي» سەزىمىمەن قارسى الادى. قالادا قاۋىپسىزدىك شارالارى كۇشەيتىلەدى، ستۋدەنتتەردى جاتاقحانادان شىقپاۋعا شاقىرادى، ال باس الاڭداردا ينتەرنەت وشىرىلەدى. تۋرا ءبىر تاۋەلسىزدىك كۇنى ەمەس، توڭكەرىسكە دايىندالىپ جاتقانداي بولادى.

گۇل شوقتارىن قويۋ راسىمىنەن كەيىن، الاڭداعى سالتاناتتى شارا تەز اياقتالدى. اكىمدىك قىزمەتكەرلەرى حالىق كەتپەسە دا، ارنايى شىعارىلعان باننەرلەردى جيناپ جاتتى. ال الاڭنىڭ ارعى بەتىندە «جاڭا جىلعا مەنى قاشان بەزەندىرەسىڭ» دەگەندەي شىرشا ورالىپ تۇردى.

ارتىنشا الاڭدا جانبولات ماماي باستاعان بەلسەندىلەر مەن «ويان، قازاقستان» جاستارى ميتينگ وتكىزىپ، «جەلتوقسان مەن جاڭاوزەن» قۇرباندارىن ەسكە الدى. وسىلايشا تاۋەلسىزدىك كۇنى وتە شىقتى. اكىمدىك تاراپىنان نە ءان، نە كۇي، نە مەرەكەلىك كونتسەرت بولعان جوق. الاڭداعى حالىقپەن بىرلەسىپ وتتى جىرلار دا وقىلمادى. اكىمدىك تىلىمەن ايتساق «دليا گالوچكي» جاسالعان شاراداي بولدى دا قالدى...

Abai.kz

29 پىكىر