بەيسەنبى, 28 ناۋرىز 2024
3466 5 پىكىر 2 جەلتوقسان, 2021 ساعات 16:29

ايماعامبەتوۆ: ۋرالسك ەمەس، ورال!

پارلامەنت سەناتى كورنەكى اقپارات جانە ءدىني قىزمەت ماسەلەلەرى تۋرالى زاڭ جوباسىن ەكى وقىلىمدا قارادى. 

ءبىلىم جانە عىلىم ءمينيسترى اسحات ايعامابەتوۆتىڭ ايتۋىنشا، زاڭ جوباسىنىڭ نەگىزگى ماقساتى – دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا ساي جانە ماتىندەردىڭ تۇپنۇسقاسىنا سايكەستىگىن ساقتاۋ ارقىلى قاتەسىز جازۋ.

جوبادا ەلدەگى اكىمشىلىك-اۋماقتىق بىرلىكتەردىڭ، فيزيكا-گەوگرافيالىق وبەكتىلەردىڭ اتاۋىن جازۋعا قاتىستى نورمالار قاراستىرىلدى. الايدا ورىس نەمەسە باسقا تىلدەردە اتالاتىن ەلدى مەكەندەردىڭ اتاۋلارى وزگەرمەيدى، سول كۇيىندە جازىلادى.

“مىسالى، ميچۋرينو اۋىلى سول كۇيى قالادى، قازىرگىدەي ميچۋرين اۋىلى دەپ وزگەرتىلمەيدى. اندرەەۆكا اۋىلى اندرەەۆ دەپ جازىلمايدى. موناستىرسكايا كوشەسى موناستىر كوشەسى دەپ اۋدارىلىپ ءجۇر، ەندى ول موناستىرسكايا دەپ وزگەرىسسىز قالادى.

ماسەلەن، اققۋلى دەگەن اۋىل بولسا، ونى لەبياجە دەپ اۋدارماي، سول كۇيى اققۋلى دەپ جازامىز. ورال قالاسى “ۋرالسك” ەمەس، ورال قالاسى رەتىندە تۇپنۇسقامەن جازىلادى”، – دەدى ايماعامبەتوۆ.

سونداي-اق، ونىڭ ايتۋىنشا، جول بەلگىلەرى دە، قازاقستان راتيفيكاتسيالاعان حالىقارالىق شارتتاردا وزگەشە كوزدەلمەگەن جاعدايدا مەملەكەتتىك تىلدە عانا جازىلادى.

“مىسالى، قىزىلورداداعى كىشىگىرىم اۋىلدا اينالما جول دەگەن بەلگى تۇرسا، قولدانىستاعى زاڭ بويىنشا ونى مىندەتتى تۇردە “اينالما جول”، “وبەزد” دەپ جازۋ كەرەك. ەندى حالىقارالىق جول بولماسا، تۋريستەر كەلمەسە، تەك قانا قازاقتار تۇراتىن شاعىن اۋىلدا تەك ءبىر تىلدە جازۋعا مۇمكىندىك بەرىلىپ وتىر. ال ەگەر حالىقارالىق جول بولسا، وندا باسقا تىلدەردە جازۋ مۇمكىندىگى قالادى”، – دەپ ءتۇسىندىردى ۆەدومستۆو باسشىسى.

بۇدان بولەك، مەملەكەتتىك ەمەس ۇيىمداردىڭ بلانكىلەرى مەن ماڭدايشالارى مەملەكەتتىك تىلدە جازىلادى. قاجەت بولعان كەزدە باسقا تىلدەردە جازۋعا مۇمكىندىك بەرىلەدى.

مۇنداي نورما حابارلاندىرۋ، جارناما، پرەسكۋرانتتار، باعا كورسەتكىشتەرى، اس مازىرلەرى، باسقا دا كورنەكى اقپاراتتارعا قاتىستى.

“زاڭ جوباسىندا ەنگىزىلگەن وزگەرىستەر مەملەكەتتىك ءتىلدىڭ قولدانىس اياسىن كەڭەيتۋگە جانە كورنەكى اقپاراتتارعا قاتىستى قاتەلەردى بولدىرماۋعا، ونى الدىن الۋعا سەپتىگىن تيگىزەدى دەپ ويلايمىز”، – دەدى ايماعامبەتوۆ.

پارلامەنت سەناتى زاڭ جوباسىنا كورنەكى اقپاراتقا قاتىستى ەنگىزىلگەن تۇزەتۋلەردى ماقۇلدادى. الايدا قۇجاتتىڭ ءدىني قىزمەتكە ارنالعان بولىگىنە بىرقاتار وزگەرىس ەنگىزىپ، زاڭ جوباسىن ماجىلىسكە كەرى قايتاردى.

Abai.kz

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3509