سارسەنبى, 18 مامىر 2022
جاڭالىقتار 1310 0 پىكىر 30 قاراشا, 2021 ساعات 19:38

«ءتۋريزمدى قازاقشا سويلەتەيىك» رەسپۋبليكالىق بايقاۋىنىڭ ماراپاتتاۋ ءراسىمى ءوتتى

2021 جىلعى 30 قاراشادا نۇر-سۇلتان قالاسىندا قازاقستان رەسپۋبليكاسى ءبىلىم جانە عىلىم مينيسترلىگى ءتىل ساياساتى كوميتەتى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى مەملەكەتتىك تاپسىرما اياسىندا «ءتۋريزمدى قازاقشا سويلەتەيىك» رەسپۋبليكالىق بايقاۋىنىڭ ماراپاتتاۋ ءراسىمىن وتكىزدى.

تۋريزم سالاسى بويىنشا زاماناۋي تەرميندەردى تاڭداۋ، تەرمينجاسام ءادىس-تاسىلدەرى مەن قاعيداتتارىن ساقتاي وتىرىپ تەرميندەردىڭ ساپاسىن ارتتىرۋعا ۇمتىلۋ باستى تالاپ رەتىندە الىنعان بۇل بايقاۋعا تۋريزم سالاسىنىڭ ماماندارى، تەرمينتانۋشى ماماندار، جوعارى وقۋ ورنىنىڭ ستۋدەنتتەرى، ىزدەنۋشىلەر مەن ءتىل جاناشىرلارى قاتىستى.

«تەرميندەر سويلەيدى»، «تۋعان ولكەم – قانداي كوركەم!»، «تەرمينتۇزەر» تاقىرىبىنداعى ءۇش كەزەڭنەن تۇراتىن بايقاۋدىڭ ءوز مارەسىنە جەتۋ راسىمىنە بايقاۋدىڭ قازىلار القاسى، بايقاۋ جەڭىمپازدارى مەن قاتىسۋشىلارى، ءتىل جاناشىرلارى، ءتىل ساياساتى كوميتەتىنىڭ، «ءتىل-قازىنا» ۇلتتىق عىلىمي-پراكتيكالىق ورتالىعىنىڭ قىزمەتكەرلەرى قاتىستى.

بايقاۋ قورىتىندىسى بويىنشا ءى ورىندى «مەمقالاقۇرىلىسكاداسترى» رەسپۋبليكالىق مەملەكەتتىك كاسىپورنىنىڭ مەملەكەتتىك ءتىلدى دامىتۋ جونىندەگى جەتەكشى مامانى وشاەۆا كامشات شوقانقىزى جەڭىپ الدى. ءىى ورىن نۇر-سۇلتان قالاسى اكىمدىگى «Astana Invest» تۋريستىك ينفراقۇرىلىمدى دامىتۋ دەپارتامەنتىنىڭ مەنەدجەرى قامىسباەۆ بازاربەك تەمىرۇلىنا بۇيىردى. ال احمەت بايتۇرسىنۇلى اتىنداعى ءتىل ءبىلىمى ينستيتۋتى ءتىل تاريحى ءبولىمىنىڭ اعا عىلىمي قىزمەتكەرى، ف.ع.ك. كوبدەنوۆا گۇلجيھان بايعازىقىزى، الەۋمەتتىك لينگۆيستيكا ءبولىمىنىڭ عىلىمي قىزمەتكەرى دۇيسەنوۆ قۋاتبەك قونىسبايۇلى، "تس عىلىمي-تەحنيكالىق كومپانياسى" جشس رەداكتورى وماروۆا اياگۇل دانيارقىزى ءىىى ورىندى ەنشىلەدى.

بايقاۋ بارىسىندا وي ۇشقىرلىعى مەن ىزدەنىمپازدىعىن تانىتقان پاۆلودار پەداگوگيكالىق ۋنيۆەرسيتەتىنىڭ مامانى اسىلبەكوۆ ەربولات كالىمجانۇلىنا، باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ 2-كۋرس ماگيسترانتى ەرجىگىتوۆا گۇلدەن كايراتقىزىنا جانە وسى ۋنيۆەرسيتەتتىڭ 4-كۋرس ستۋدەنتى قىستاۋباەۆا اياجان مۇراتقىزىنا، نارحوز ۋنيۆەرسيتەتىنىڭ «تۋريزم» ماماندىعىنىڭ 3-كۋرس ستۋدەنتى ورداباەۆا ايگەرىم مۇراتقىزىنا ىنتالاندىرۋ سىيلىعى تابىس ەتىلدى.

بايقاۋ قورىتىندىسى بويىنشا انىقتالعان ۇزدىك تەرميندەر قر ۇكىمەتى جانىنداعى رەسپۋبليكالىق تەرمينولوگيا كوميسسياسىنىڭ قاراۋىنا ۇسىنىلاتىن بولادى.

Abai.kz

0 پىكىر