جۇما, 28 قاڭتار 2022
دەي سالدىم-اۋ 2797 3 پىكىر 29 قاراشا, 2021 ساعات 16:39

بوزىمباەۆ ءھام اەس قۇرىلىسى

«قانات بوزىمباەۆ الماتى وبلىسىنا اكىم بولىپ سايلانۋىنىڭ اەس سالۋ جوسپارىنا قاتىسى بار ما?» بۇل سۇراققا ساراپشىلار جاۋاپ بەرىپتى. «Orda.kz» سايتى جازادى.

الماتى وبلىسىنىڭ اكىمى اماندىق باتالوۆتىڭ ورنىنا 24 قاراشا كۇنى قانات بوزىمباەۆ سايلاندى. ول بۇرىن جامبىل مەن پاۆلودار وبلىستارىنىڭ اكىمى قىزمەتىمەن قاتار، ەنەرگەتيكا ءمينيسترى، «KEGOC» اق ءبىرىنشى ۆيتسە-پرەزيدەنتى جانە باسقارما توراعاسى قىزمەتتەرىن اتقارعان.

وتكەن اپتادا پرەزيدەنت قاسىم-جومارت توقاەۆ الماتىعا ساپارى كەزىندە ەلەكتر ەنەرگياسىنىڭ تاپشىلىعىن ءسوز ەتىپ، قازاقستاندا اتوم ەلەكتر ستانتسياسىنىڭ سالىنۋى مۇمكىن ەكەنىن ايتقان بولاتىن.

«قازاقستاندا ەلەكتر ەنەرگياسىنىڭ تاپشىلىعىنىڭ العاشقى بەلگىلەرى قازىردىڭ وزىندە بايقالادى. ارينە، ەلەكتر قۋاتىنىڭ جاپپاي جەتىسپەۋشىلىگى تۋىنداعان جوق. ازىرگە تەپە-تەڭدىك بار. الايدا العاشقى بەلگىلەرى بىلىنۋدە. سوندىقتان، بولاشاقتى ويلاساق، ءبىز اتوم ستانتسياسىنىڭ قۇرىلىسىنا قاتىستى ناقتى شەشىم قابىلداۋىمىز كەرەك. باسشىنىڭ مىندەتى دە ءتيىمدى شەشىم قابىلداۋ»، - دەپ مالىمدەگەن پرەزيدەنت.

الماتى وبلىسىنىڭ اكىمى قىزمەتىنە كەلگەن قانات بوزىمباەۆ اەس قۇرىلىسىنا جەتەكشىلىك ەتۋگە قۇلىقتى ما؟

ساياسي شولۋشى عازيز ابىشەۆ اتوم ستانتسياسىن سالۋ تۋرالى شەشىم باياعىدان قابىلدانىپ قويىلعان، ال بوزىمباەۆتىڭ جاڭا قىزمەتى وسىعان قاتىستى بولۋى مۇمكىن دەپ ەسەپتەيدى.

«ەلەكتر ستانتسياسىن سالۋ تۋرالى شەشىم قابىلدانعانى بەلگىلى، بىراق كىمنىڭ ستانتسياسىن سالۋ تۋرالى شەشىم ءالى قابىلدانبادى. بۇل تەك رەسەي بولۋى مىندەتتى ەمەس، فرانتسيا، قىتاي نەمەسە امەريكالىق ستانتسيا. كورەيالىق ستانتسيا دا قاراستىرىلىپ جاتىر. قۇرىلىستى كىم جۇرگىزەتىنى الداعى كەلىسسوزدەرگە بايلانىستى بولماق.

ءبىز بوزىمباەۆتىڭ  «KEGOC» ءبىرىنشى ۆيتسە-پرەزيدەنتى، ەنەرگەتيكا ءمينيسترى، ەكى وبلىستىڭ اكىمى، سوڭعى ەكى جىلدا توقاەۆتىڭ كومەكشىسى بولىپ جۇمىس ىستەگەنىن بىلەمىز. توقاەۆتىڭ اتوم ەنەرگەتيكاسى تۋرالى ايتقانى بوزىمباەۆتىڭ ءوزى جاساعان ساراپتاماسى بولۋى كەرەك. ەگەر ونى سول جەرگە جىبەرسە، بۇل اەس قۇرىلىسىنا بايلانىستى بولۋى ابدەن مۇمكىن»، - دەيدى عازيز ابىشەۆ.

ساياساتتانۋشى ورازعالي سەلتاەۆ بۇل تاقىرىپقا ناقتى جاۋاپ بەرمەگەن، بىراق بوزىمباەۆتىڭ باسشىلىق داعدىسىن جوعارى باعالايدى.

«مەن ونى تاجىريبەلى باسقارۋشى، پرەزيدەنت جوعارى باعالايتىن, ءوز ءىسىنىڭ شەبەرى دەپ ايتا الامىن. سوندىقتان، وسىنداي ماڭىزدى ايماققا تاعايىندالۋى ابدەن قيسىنعا كەلەدى», - دەدى ساياساتتانۋشى.

ەربول ەدىلوۆ اەس قۇرىلىسى مەن بوزىمباەۆتىڭ ايماق اكىمى بولىپ تاعايىندالۋى اراسىنداعى بايلانىستى تەك بولجام دەپ سانايدى.

«اەس تاقىرىبى بويىنشا ماسەلە ءالى شەشىلگەن جوق. حالىقتىڭ پىكىرى تىڭدالادى دەپ ايتىلعان بولاتىن», - دەيدى ەرلان ەدىلوۆ.

قازاقستاندا اەس سالىنا ما؟ ول تۋرالى نە بىلەمىز؟

2019 جىلى رەسەي پرەزيدەنتى ۆلاديمير پۋتين اتوم ەلەكتر ستانتسياسىن سالۋدا ارىپتەس بولۋعا شاقىرعان. پرەزيدەنت توقاەۆ اۋەلى حالىق پىكىرىن ءبىلىپ بارىپ، جوبانى ويلاستىرۋعا بولاتىنىن ايتقان. بىراق الماتى وبلىسىنداعى ۇلكەن ەلدى مەكەنىندە اتوم ەلەكتر ستانتسياسىن سالۋعا ورىن ءبولىنىپ قويىلعان. بۇل قوعامنىڭ اشۋىن تۋعىزىپ، اەس سالۋعا قارسى ميتينگتەر ۇيىمداستىرىلدى. الايدا، اۋداندىق اكىمدىك ەشقانداي قارسىلىقتىڭ بولماعانىن جەتكىزەدى.

2021 جىلى مامىردا قاسىم-جومارت توقاەۆ اتوم ەلەكتر ستانتسياسىنا قاتىستى تاقىرىپتى مۇلدە جاۋىپ تاستاۋ ەرتە ءارى قاتە شەشىم ەكەنىن ايتتى.

«بۇكىل دامىعان الەم اتوم ەنەرگياسىنا سۇيەنەدى. ودان قورقۋ ورىنسىز. بىراق ازاماتتار اراسىندا تۇراقتى ءتۇسىندىرۋ جۇمىستارىن جۇرگىزۋ كەرەك. ءبىز اتوم ستانتسيالارىن سالۋعا اسىقپايمىز، بىراق بۇل ىسكە كەشىكپەۋىمىز كەرەك»، - دەدى پرەزيدەنت.

2021 جىلدىڭ جازىندا بۇرىنعى ەنەرگەتيكا ءمينيسترى نۇرلان نوعاەۆ ۇكىمەت ەلەكتر ستانتسياسىن سالۋ تۋرالى حالىقپەن پىكىرلەسەتىنىن مالىمدەدى.

«حالىقتان ساۋالنامالار الىنادى، سەمينارلار مەن دوڭگەلەك ۇستەلدەر ۇيىمداستىرىلادى. قوعام بەلسەندىلەرى مەن بلوگەرلەر تارتىلادى. الدىمىزدا «جاسىل ەكونوميكاعا» كوشۋ جوسپارى بار. سوندىقتان ەلدىڭ قالاي قارايتىنىن ءبىلۋىمىز كەرەك», - دەگەن ەدى نوعاەۆ.

پرەزيدەنت قاسىم-جومارت توقاەۆتىڭ 1 قىركۇيەكتەگى قازاقستان حالقىنا جولداۋىندا ۇكىمەت پەن «سامۇرىق-قازىناعا» قاۋىپسىز ەكولوگيالىق ەنەرگەتيكانى دامىتۋ مۇمكىندىگىن زەردەلەۋدى تاپسىردى. سونداي-اق، پرەزيدەنت ۇكىمەتكە «جاسىل سۋتەگى» جانە سۋتەگى ەنەرگەتيكاسىن ءوندىرۋ بويىنشا ۇسىنىستار دايىنداۋدى مىندەتتەدى.

30 قىركۇيەكتە قازاقستان مەن رەسەيدىڭ «وڭىرارالىق ىنتىماقتاستىق فورۋمى» اياسىنداعى بەينەكونفەرەنتسيادا پۋتين اەس قۇرىلىسىنا تاعى دا قولداۋ كورسەتەتىنىن ەسكە سالدى.

Abai.kz

3 پىكىر