الماتى وبلىسىندا اكىمدىكتەن ۇدايى كومەك سۇراپ كەلگەن انالار كاسىپكە بەت بۇرىپ، ىستەرىن دوڭگەلەتە باستادى، ماسەلەن، تالدىقورعاندا «اسىل انالار» قوعامدىق قورى قۇرىلدى. ول جەردە كوپبالالى جانە مۇگەدەك بالالارى بار انالار تىگىن تسەحىن اشىپ، ءوز ىستەرىمەن اينالىسىپ جاتىر.

ومىرلەرىن 100 پايىزعا وزگەرتىپ جاتقان بۇل جاندار بارلىعىنا ۇكىمەتتىك ەمەس ۇيىم ارقىلى قول جەتكىزگەنىن ايتۋدا. «اكىمدىككە بارىپ، بىزگە ءۇي كەرەك، ازىق-تۇلىك كەرەك دەپ سۇراپ جۇرەتىنبىز. سودان كەيىن تۇسىندىك، قاشانعا دەيىن بىرەۋگە قول جايىپ، كومەك سۇرايمىز. سول سەبەپتى وبلىس باسشىسىنا ءوز تىگىن تسەحىمىزدى اشىپ، جۇمىس ىستەسەك دەگەن ۇسىنىسىمىزدى بىلدىردىك. ءبىزدى قولداپ، وسىنداي تىگىن تسەحىن اشىپ بەردى. قازىر سول جەردە 23 انا جۇمىس ىستەيدى. ۇكىمەتتىك ەمەس ۇيىم اشىپ، قۇرال-جابدىقتاردى ليزينگكە الىپ بەردى. قازىر ءتۇرلى زاتتاردى تىگۋگە تاپسىرىس الىپ، جۇمىسىمىزدى ىستەپ جاتىرمىز»، - دەدى ۇكىمەتتىك ەمەس ۇيىمدار اراسىندا وتكەن بايقاۋدىڭ جەڭىمپازى ايگەرىم جولامانوۆا.

بۇگىندە جاقسى ناتيجە كورسەتىپ ۇلگەرگەن «اسىل انالار» تىگىن تسەحى ۇكىمەتتىك ەمەس ۇيىمداردىڭ ىشىندە ۇزدىك جوبا دەپ تانىلدى. «قوعام مەن مەملەكەتتىڭ ورنىقتى دامۋ مۇددەسىندەگى ارىپتەستىگىنىڭ 30 جىلى» اتتى فورۋمدا وزگە دە ۇكىمەتتىك ەمەس ۇيىمدار ماراپاتتالدى. «الماتى وبلىسى بويىنشا 920 مەملەكەتتىك ەمەس ۇيىم بار. بىراق سونىڭ ءبارى بەلسەندى جۇمىس ىستەپ جاتىر دەپ ايتا المايمىز. دەگەنمەن، 500-دەن ارتىعى تاۋەلسىزدىكتىڭ العاشقى جىلدارىنان باستاپ، وزدەرىنىڭ ءورىسىن كەڭەيتىپ، جۇمىستارىمەن تانىلىپ جاتىر»، - دەدى الماتى وبلىستىق ىشكى ساياسات باسقارماسىنىڭ باسشىسى راحمەت ەسداۋلەتوۆ.

ۇكىمەتتىك ەمەس ۇيىمدارعا الماتى وبلىسىندا قولداۋ كوپ. ماسەلەن، بيىل مەملەكەتتىك الەۋمەتتىك تاپسىرىس ءۇشىن 350 ميلليون تەڭگەگە جۋىق قارجى بولىنگەن. ودان بولەك ءتۇرلى گرانتتارعا دا قارجى بەرىلەدى. ۇكىمەتتىك ەمەس ۇيىم جايلى بەيحابار جاندار ءۇشىن ارنايى عيمارات سالىنىپ، ول جەردە باعىت-باعدار بەرەتىن ماماندار دا وتىر.

Abai.kz