جۇما, 20 مامىر 2022
اقمىلتىق 2397 3 پىكىر 2 قاراشا, 2021 ساعات 20:49

رايىمقۇلوۆا وتستاۆكاعا كەتپەيتىن بولدى

اقتوتى رايىمقۇلوۆانىڭ وتستاۆكاعا كەتۋ تۋرالى ءوتىنىشىن ۇكىمەت قابىلدامادى. نەگە؟

2021 جىلى 22 اقپاندا قر مادەنيەت جانە سپورت ۆيتسە-ءمينيسترى ساكەن مۇسايبەكوۆ «بۋكمەكەرلىك كەڭسە مەن جالپى پاترونات سالاسىنداعى مۇددەلەردى لوببيلەۋ ءۇشىن پارا الدى» دەگەن كۇدىككە ءىلىندى. ونى قر سىبايلاس جەمقورلىققا قارسى قىزمەتى نۇر-سۇلتان-دۋباي باعىتىنداعى رەيستە ۇستاعان. بۇل تۋرالى Abai.kz اقپاراتتىق پورتالى بۇعان دەيىن ەگجەي-تەگجەيلى جازعان.

2020 جىلدىڭ ناۋرىز ايىندا مەملەكەتتىك قىزمەتكەر جەمقورلىقپەن ۇستالسا، باسشىسى ءوز ەركىمەن قىزمەتتەن كەتۋى ءتيىس دەگەن زاڭ كۇشىنە ەنگەن بولاتىن. جاڭا ەرەجەگە ساي قاراماعىنداعى قىزمەتكەرى پارا العان باسشى سوت ۇكىمىنەن سوڭ 10 كۇننىڭ ىشىندە قىزمەتىن بوساتۋى كەرەك. وسىعان وراي، 2021 جىل 14 مامىردا ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا قازاقستاننىڭ مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ ورىنباسارى ساكەن مۇسايبەكوۆتىڭ پارا الۋ فاكتىسى بويىنشا قاماۋعا الىنۋىنا بايلانىستى سۇراققا جاۋاپ بەرىپ، ەگەر مۇسايبەكوۆتىڭ كىناسى دالەلدەنسە وتستاۆكاعا كەتۋگە دايىن ەكەنىن مالىمدەدى.

«مەن كونستيتۋتسياعا سايكەس كىناسىزدىك پرەزۋمپتسياسى بار ەكەنىن ايتقىم كەلەدى. ەڭ الدىمەن، كىنا دالەلدەنۋى كەرەك. ەگەر كىناسى دالەلدەنسە، وندا، ارينە، زاڭعا سايكەس مەن جۇمىستان كەتۋ تۋرالى ءوتىنىش بەرەمىن. بىراق بۇل كىنا دالەلدەنگەن جاعدايدا بولادى»، - دەدى مينيستر رايىمقۇلوۆا. بۇل كەزدە ۆيتسە-مينيسترگە قاتىستى سوتقا دەيىنگى تەرگەۋ جۇرگىزىلىپ جاتتى.

2021 جىلدىڭ 12 تامىز كۇنى الماتى قالاسىنىڭ تۇركىسىب اۋداندىق سوتى ساكەن مۇسايبەكوۆكە ۇكىم شىعارىپ ونى كىنالى دەپ تاپتى. ول 190 باپتىڭ 3-بولىگى، 1-تارماعى (اسا ءىرى كولەمدە الاياقتىق جاساۋ) بويىنشا ايىپتالعان. سوت مۇسايبەكوۆتى 2021 جىلدىڭ 18-21 اقپانى ارالىعىندا (ۆيتسە-مينيستر لاۋازىمىندا بولا وتىرىپ) مەنشىككە قاتىستى سىبايلاس جەمقورلىق قىلمىسىن جاسادى دەپ تانىعان.

كىنانى مۇسايبەكوۆتىڭ ءوزى دە مويىندادى. مۇسايبەكوۆ پەن الماتى پروكۋرورى ورىنباسارىنىڭ اراسىندا جاسالعان كىنانى مويىنداۋ تۋرالى پروتسەسسۋالدىق كەلىسىمگە سايكەس، پروكۋرور مۇسايبەكوۆكە العان پارا سوماسىنان ون ەسە كوپ مولشەردە ايىپپۇل (62 394 000) سالۋدى سۇراعان. سوت شەنەۋنىكتى كىنالى دەپ تانىپ، وعان پروكۋرور سۇراعان 62 394 000 تەڭگە كولەمىندە ايىپپۇل سالعان.

ءبىراز ۋاقىت ۇنسىزدىكتەن كەيىن قر مادەنيەت جانە سپورت ءمينيسترى ءوز ەركىمەن وتستاۆكاعا كەتۋ تۋرالى ءوتىنىش بەرەدى. بىراق ۇكىمەت ونىڭ ءوتىنىشىن قابىلداماعان ەكەن.

ۇكىمەتتىڭ جاۋاپ حاتىندا «مادەنيەت جانە سپورت مينيسترلىگىنىڭ اقپاراتى بويىنشا، مينيستر اقتوتى رايىمقۇلوۆا بۇرىنعى ۆيتسە-مينيستر س.ج. مۇسايبەكوۆكە قاتىستى سوت ۇكىمىنىڭ زاڭدى كۇشىنە ەنۋىنە بايلانىستى «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭنىڭ 60-بابىنا سايكەس، وتستاۆكاعا كەتۋ تۋرالى ءوتىنىش بەردى. ءوتىنىشتى قاراۋ ناتيجەلەرى بويىنشا وتستاۆكا قابىلدانعان جوق. زاڭنىڭ 60-بابىنىڭ 2-تارماعىنا سايكەس «وتستاۆكادان باس تارتىلعان جاعدايدا ساياسي قىزمەتشى قىزمەتتىك وكىلەتتىكتەرىن اتقارۋدى جالعاستىرۋعا ءتيىس»، دەپ جاۋاپ بەرگەن.

پرەمەر-مينيستر اسقار ءماميننىڭ اتىنا جولدانعان وتىنىشكە نەگە بۇلاي جاۋاپ بەرىلگەنى بەلگىسىز.

2020 جىلدىڭ ناۋرىز ايىندا قابىلدانعان جەمقورلىققا قاتىستى زاڭعا وراي، قاراماعىنداعى قىزمەتكەرى پارا العان باسشى سوت ۇكىمىنەن سوڭ 10 كۇننىڭ ىشىندە قىزمەتىن بوساتۋى كەرەك ەدى. بىراق نەگە ەكەنى بەلگىسىز ۇكىمەتتىڭ رايىمقۇلوۆانى ورنىنان بوساتقىسى جوق...

ايجان تەمىرحان

Abai.kz

3 پىكىر