بوكستان وزبەكستان ۇلتتىق قۇراماسىنىڭ جاتتىقتىرۋشىسى راحماتجون رۋزياحۋنوۆ 2021 جىلعى الەم چەمپيوناتىندا جەتەكشىلىگىندەگى سپورتشىسى حاسانبوي دۋسماتوۆتىڭ قازاقستاندىق ساكەن بيبوسىنوۆتان جەڭىلىسكە ۇشىراعانىنا پىكىر ءبىلدىرىپ، اپەللياتسيالىق شاعىم تۇسىرگەنىن ايتتى. بۇل تۋرالى Sports.uz -كە سىلتەمە جاساپ، Vesti.kz سايتى جازدى.

قارسىلاستار ءتۋرنيردىڭ ءبىرىنشى اينالىمىندا 51 كەلىگە دەيىنگى سالماق دارەجەسىندە كەزدەسىپ، تورەشىلەر ءبىراۋىزدان جەڭىستى بيبوسىنوۆقا بەردى. وسىدان كەيىن جالجال ورىن الا باستادى.

«حاسانبويدىڭ كاسىپقوي بوكسپەن اينالىسقانىنا ەكى جىل بولدى. سوندىقتان ونىڭ سوققى سانىنا قاراعاندا، كۇشى ارتقان. نىساناعا ءدال تيگەن اۋىر سوققىلاردى ەسكەرسەك، ول قازاقستاندىق قارسىلاسىن جەڭدى دەۋگە بولادى. جەكپە-جەكتەن كەيىن ءبىز راۋندتاردى قاراپ شىعىپ، ءوز ەسەبىمىزدى جۇرگىزدىك. ولاردىڭ بارلىعىنان حاسانبويدىڭ كوپ سوققىلار جۇمساعانىن بايقادىق. ءبىز جەكپە-جەككە ەمونيونالدى ەمەس، بەيتاراپ تۇردە قارادىق. سودان كەيىن اپەللياتسيالىق شاعىم تۇسىردىك. ۇرىستى كورگەن تورەشىلەر بوكسشىمىزدىڭ ەكىنشى راۋندتا جەڭىسكە جەتكەنىن حابارلادى. ەگەر جەكپە-جەك كەزىندە ءدال وسى ناتيجە ايتىلعاندا، ءۇشىنشى راۋندتا دۋسماتوۆ الدەقايدا سابىرلى تۇردە ارەكەت ەتەتىن ەدى. ناتيجەسىندە، سوڭعى راۋندتى بوكسشىمىز قورقىنىش پەن تاۋەكەلمەن وتكىزدى. قازاقستان قۇراماسىنىڭ باپكەرلەرى مول تاجىريبەگە يە. سول سەبەپتى ولاردىڭ ءوز بوكسشىلارىنا ءۇشىنشى راۋندتا اباي بولۋدى ەسكەرتكەندەرى انىق»، – دەدى وزبەكستان قۇراماسىنىڭ جاتتىقتىرۋشىسى.

وزبەكستان قۇراماسىنىڭ وسى الەم چەمپيوناتىندا بەس بوكسشىسىنىڭ جارىستان شىعىپ قالعانىن ايتا كەتەيىك.

Abai.kz