جەكسەنبى, 26 ماۋسىم 2022
عىلىم-ءبىلىم 1499 0 پىكىر 1 قاراشا, 2021 ساعات 17:37

ۆيرتۋال شىندىققا ءبىر قادام. Meta دەگەن نە؟

Facebook كومپانياسى ەندى «Meta» دەپ اتالادى. كومپانيا اتىن Meta-عا اۋىستىرسا دا، Facebook الەۋمەتتىك جەلىسى ءوز اتىمەن قالا بەرمەك.

2004 جىلى Facebook پايدا بولعاننان كەيىن، Instagram مەن WhatsApp قوسىمشالارىن دا وزىنە قوستى جانە باسقا دا تەحنولوگيا قۇرالدارىنا ينۆەستيتسيا قۇيدى. ماسەلەن، «Novi» ساندىق ءاميانى، «Portal» ۆيدەو قوڭىراۋ قۇرالى، «Oculus» ۆيرتۋالدى شىندىق جۇيەسى.

Meta ەندىگى كەزەكتە الەمدەگى ەڭ كۇشتى الەۋمەتتىك جەلىلەردى بىرىكتىرەتىن ۇلكەن كومپانيانىڭ اتاۋى بولماق.

گرەك-ريم تاريحىنا كوپتەن قىزىققان مارك تسۋكەربەرگ «meta» گرەك تىلىندە «شەكتەن تىس»، «ارى قاراي» دەگەن ماعىنا بەرەتىنىن بايقاعان ەكەن.

Facebook يەسى «نيل ستيۆەنسوننىڭ 1992 جىلى شىققان عىلىمي-فانتاستيكالىق رومانى «قار كوشكىنىنەن» باستاۋ الاتىن تسيفرلى-تەوريا الەمىنە سىلتەي وتىرىپ، Facebook كومپانياسىن «مەتاعالام» بولاتىنىنا ءۇمىتى بار ەكەنىن ايتقان».

مەتاعالامدا ادامدار فيزيكالىق تۇرعىدا ءار جەردە بولسا دا، ۆيرتۋالدى بىرگە بولا الادى. ۆيرتۋالدى الەمدە جۇمىس ىستەپ، ساۋدا جاساپ، ۆيرتۋالدى شىندىق الاڭىندا ويىن وينايدى.

ستيۆەنسوننىڭ كىتابىندا مەتاعالام – ينتەرنەتتىڭ ۆيرتۋالدى شىندىققا قۇرىلعان ءىزباسارى رەتىندە سۋرەتتەلەدى.

«ءسىز قيالداعان كەز-كەلگەن دۇنيە شىندىققا اينالا الادى. ءبىر سىلتەمەنى عانا باسۋ ارقىلى ءسىز مەتاعالامدا تەلەپورتاتسيا جاساي الاسىز»، - دەيدى تسۋكەربەرگ.

كومپانيانىڭ كوممەرتسيالىق ديرەكتورى مارن لەۆين بولسا، Meta-نىڭ قولدانۋشىسى قاجەت بولسا، كونە ريم سياقتى تاريحي كەزەڭدەرگە تاپ بولا الاتىنىن ايتتى. «ەلەستەتىپ كورىڭىزشى، ءسىز 2000 جىل بۇرىنعى ەسكى كوشەدە ءجۇرسىز، بازارلاردى ارالاپ، سول كەزدىڭ ءومىرىن سەزىنەسىز»، -, دەيدى ول.

«ءدال قازىر ءبىزدىڭ برەند ءبىر عانا الەۋمەتتىك جەلى اتاۋىمەن تىعىز بايلانىستى. ال، بولاشاقتا ىسكە اساتىن دۇنيەلەر وتە كوپ، سوندىقتان ءبىر عانا Facebook-تىڭ وعان قاۋقارى جوق.

ۋاقىت وتە ءبىزدى ادامدار «مەتاعالام كومپانيا» رەتىندە قابىلدايدى دەپ سەنەمىن. بار كۇش-جىگەرىمىزدى ءوزىمىز ۇمتىلعان ماقساتقا جۇمساعىمىز كەلەدى.

ءبىز قازىر بيزنەسىمىزدى ەكى سەگمەنتكە ءبولىپ قاراستىرامىز: بىرەۋى قازىرگى بار قوسىمشالار توبى دەسەك، ەكىنشىسى كەلەشەكتە پايدا بولاتىن پلاتفورمالار.

ەندى ءبىزدىڭ قولىمىزدا مەتاعالامدى تىرىلتەتىن «سولتۇستىك جۇلدىزى» بار، بولاشاقتا ىسكە اسىرعىمىز كەلەتىن بارلىق ءىستىڭ ماڭىزىن كورسەتەتىن جاڭا اتىمىز بار. ءبىز ەندى Facebook قانا ەمەس، مەتاعالام بولامىز»، - دەدى  تسۋكەربەرگ جىل سايىن وتەتىن Connect كونفەرەنتسياسىندا.

«سونىمەن قاتار كومپانيانىڭ باسقا قىزمەتتەرىن پايدالانۋ ءۇشىن بۇرىنعىداي Facebook-كە تىركەلۋدىڭ قاجەتى بولمايدى»، - دەيدى ول.

ايجان تەمىرحان

Abai.kz

0 پىكىر