بۇگىندە كيبەرسپورت الەمنىڭ كوپتەگەن ەلدەرىندە دامىپ، ءتىپتى وليمپيادالىق ويىندار قاتارىنا قوسىلۋ مۇمكىندىگىنە يە بولۋدا. كيبەرسپورتتىڭ دامۋى تەك قانا كوڭىل كوتەرۋ كونتەنتى ەمەس، سونىمەن قاتار مەملەكەتتىڭ دامۋ دەڭگەيىن دە انىقتايدى. اتاپ ايتقاندا ينتەرنەت جىلدامدىعى، ۇزدىكسىز تارالۋى مەن ارزاندىعى مەملەكەتتىڭ پوتەنتسيالىن انىقتاۋشى فاكتورلاردىڭ ءبىرى. 

كيبەرسپورت قازاقستاندا رەسمي سپورت ءتۇرى رەتىندە 2018 جىلدىڭ جازىندا مويىندالدى. سودان بەرى كيبەرسپورت يندۋسترياسى قارقىندى دامۋدا. جالپى، وسى ۋاقىت ىشىندە قازاقستان كيبەرسپورت فەدەراتسياسى 15-تەن استام باعىت بويىنشا ءارتۇرلى دەڭگەيدەگى 435-تەن استام تۋرنير ۇيىمداستىردى. سونىمەن قاتار، جاڭا اۋديتوريا تاراپىنان قىزىعۋشىلىقتىڭ ارتۋى بيزنەستىڭ اتالمىش سالاعا ەنۋىنە ىقپال ەتتى. ماسەلەن، ەلدەگى كيبەرجارىستاردىڭ جۇلدەسى 2019 جىلعى 17,3 ميلليون تەڭگەنى قۇراسا،  وتكەن جىلى رەكوردتىق 127 ميلليون تەڭگەگە دەيىن وسكەن. ال بيىلعى جىلدىڭ ون ايىندا 73 ميلليون تەڭگەدەن استام قارجىنى قۇرادى.

دەگەنمەن، سالانىڭ ءوسۋىنىڭ ماڭىزدى كورسەتكىشتەرىنىڭ ءبىرى كيبەرسپورت باعىتى بويىنشا ءبىلىم بەرۋ ۇيىمدارىنىڭ پايدا بولۋى بولماق.  ويتكەنى بۇل نارىق جاڭا مامانداردى قالىپتاستىرۋدى تالاپ ەتەدى. وسى جىلدىڭ قىركۇيەگىندە قازاقستان ەسپورت فەدەراتسياسى (QCF) جاڭا جوبا – eSportsHUB Esports Academy جوباسىن ىسكە قوستى. ەسپورت اكادەمياسى نەنى ۇيرەتەدى؟

eSports HUB — كيبەرسپورت چەمپيوندارى مەن كيبەرسپورت يندۋسترياسىنىڭ كوشباسشىلارىن وقىتۋعا ارنالعان كاسىبي ۇيىم. ءبىلىم بەرۋ ۇيىمى قازاقستاندىقتاردى كيبەرسپورتتىڭ ءارتۇرلى پاندەرى بويىنشا وقىتۋ جانە ويىن داعدىلارىن جەتىلدىرۋ بويىنشا قىزمەتتەر كورسەتەدى. ماسەلەن، وسى جىلدىڭ قازان ايىندا اكادەميادا PUBG Mobile بويىنشا پيلوتتىق كۋرس باستالدى. سونىمەن قاتار، اكادەميا بازاسىندا Bootcamp ورتالىعى مەن TCB (وقۋ لاگەرلەرى) بازاسىن ۇيىمداستىرۋ دايىندالۋدا – مۇندا كيبەرسپورتشىلارعا ارنالعان جاتتىعۋلار وتەدى. سونداي-اق، ستريمينگ، پىكىر جازۋ جانە تالداۋ مەكتەبى، وقۋ ورتالىعى، كيبەرسپورت تورەشىلەرىن، جاتتىقتىرۋشىلار مەن مەنەدجەرلەردى سەرتيفيكاتتاۋ، سپورتتىق باعدارلامالاۋ بويىنشا وقۋ ورتالىعى ىسكە قوسىلۋدا. مۇنىڭ بارلىعى قازىرگى مامانداردىڭ قۇزىرەتتىلىگىن ارتتىرۋعا، ەڭ باستىسى، كيبەرسپورت نارىعى ءۇشىن جاڭا كادرلاردى قالىپتاستىرۋعا مۇمكىندىك بەرەدى.

ء"بىز بۇل جوبانى ىسكە قوستىق، ويتكەنى ءبىز جوعارى ساپالى كادرلارسىز، حالىقارالىق دەڭگەيدەگى مامانداردى دايىندايتىن بىرىڭعاي ورتالىقسىز سالا دامي المايتىنىن تۇسىنەمىز. سالانى دامىتۋدىڭ ءبىلىم بەرۋ بازاسىن قالىپتاستىرۋعا قاتىستى فەدەراتسيانىڭ 2025 جىلعا دەيىنگى دامۋ ستراتەگياسى بار. eSports HUB جوباسى الەمدەگى ەڭ جاقسى كيبەرسپورت ۇيىمدارىنىڭ دەڭگەيىندە. اكادەمياعا قوسىلىڭىز جانە كيبەرسپورت تەك ويىنشىلارعا عانا ەمەس ەكەنىن ەستە ساقتاڭىز. مىڭداعان ادامدار سالادا ءوز مانسابىن ويىنشى رەتىندە عانا ەمەس، سونىمەن قاتار ءوز سالالارىنداعى مىقتى مامان رەتىندە قالىپتاستىرادى. وندا سالا بويىنشا تۇسىنىكتەمە بەرۋدەن SMM-گە دەيىنگى قىزمەتتەر جەتەرلىك ", - دەپ تۇيىندەيدى  قازاقستان رەسپۋبليكاسى كيبەرسپورت فەدەراتسياسىنىڭ اتقارۋشى ديرەكتورى قازبەك جانعازيەۆ

"قازاقستانداعى كيبەرسپورت ءوزىنىڭ "كامەلەتتىك جاسىنا" جەتىپ، كاسىبي قىزمەتتىڭ ماڭىزدى تۇرىنە اينالدى. ءبىز "كاسىبي قىزمەت" دەگەن ءسوز تىركەسىن ەرەكشە اتاپ وتكىمىز كەلەدى. وسىدان 20 جىل، ءتىپتى 10 جىل بۇرىن ول ءالى دە جاسوسپىرىمدەردىڭ ويىنشىعى بولاتىن، ال قازىر ولاي ەمەس. بۇل Dota 2 كيبەرسپورت ديستسيپليناسى بويىنشا حالىقارالىق جارىستا رەسەي قۇراماسىنىڭ جاس جىگىتتەرىنىڭ جەڭىسىمەن راستالىپ، ولار 18 ميلليون اقش دوللارى كولەمىندە كەرەمەت اقشالاي سىيلىق الدى. كاسىبي كيبەرسپورتشىلار، جاتتىقتىرۋشىلار، تورەشىلەر، كوممەنتاتورلار جانە كيبەرسپورت مەنەدجەرلەرى كەرەك. وسىعان بايلانىستى QCF وسى ماسەلەلەردى جۇيەلى تۇردە شەشۋ ءۇشىن كيبەرسپورت اكادەمياسىن اشۋ تۋرالى شەشىم قابىلدادى", - دەيدى eSports HUB ديرەكتورى تالانت رامازانوۆ. .

رامازانوۆ سونىمەن قاتار كومپيۋتەر نەمەسە ءموبيلدى ويىنداردى ويناۋ كيبەرسپورت ەمەس ەكەنىن ءتۇسىنۋ كەرەك ەكەنىن اتاپ ءوتتى. ونىڭ پىكىرىنشە، كيبەرسپورت – بۇل ناقتى ادىستەمە، داعدىلاردى دامىتۋ، العا قويعان ماقساتقا جەتۋ، بۇل كۇردەلى ينتەللەكتۋالدىق دامۋ، جەڭىسكە جەتۋ جولىن (ويىندا عانا ەمەس، ومىردە دە) ۇيرەنۋ، سالاۋاتتى ءومىر سالتى داعدىلارىن مىندەتتى تۇردە تاربيەلەۋ. كيبەرسپورت اكادەمياسىنىڭ الدىنا كيبەرسپورتشىلاردى دايارلاۋ سالاسىندا جاڭا بيىك بەلەستەردى ورناتۋ جانە قازاقستاننىڭ كوك بايراعى استىندا الەمدىك وربيتاعا جاڭا ەسپورت جۇلدىزدارىن شىعارۋ ءۇشىن بازا قۇرۋ ماقساتىن قويىپ وتىر.

Abai.kz