جۇما, 1 شىلدە 2022
ءبىزدىڭ شەنەۋنىك 2406 11 پىكىر 26 قازان, 2021 ساعات 11:23

ءماسىموۆ ساياساتتان جازۋشىلىققا بەت بۇردى

جۋىردا قر ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆتىڭ تاعى ءبىر كىتابى جارىق كورمەك. ۇق قىزمەتكەرلەرىنىڭ ەڭبەگى تۋرالى جازىلعان بۇل كىتاپ تاۋەلسىزدىكتىڭ 30 جىلدىعىنا ارنالعان ەكەن.

«وتاندىق ارناۋلى قىزمەتتىڭ حرونيكالارى. ادامدار، وقيعالار، فاكتىلەر تۋرالى حيكايالار»، «مەملەكەتتىك شەكارا» دەپ اتالاتىن بۇل كىتاپتا ۇلتتىق قاۋىپسىزدىكتى قامتاماسىز ەتۋ مەن مەملەكەتتىڭ شەكاراسىن قورعاۋ ىسىنە لايىقتى ۇلەس قوسقان جەدەل قىزمەتكەرلەر مەن شەكاراشىلاردىڭ قىزمەتى تۋرالى جازىلىپتى.

«باسىلىمدارعا قازىرگى ۋاقىتتا قۇپياسىزداندىرۋعا بولاتىن جايتتار عانا ەنگىزىلدى. ونىڭ نەگىزىندە – ناقتى ادامدار، وقيعالار مەن فاكتىلەر، وعان تىكەلەي قاتىسۋشىلاردىڭ ەموتسياسىن جەتكىزەتىن قاتاڭ دەرەكتى ستيلدە مازمۇندالعان»، - دەلىنگەن قر ۇقك حابارلاماسىندا.

ال، ءماسىموۆتىڭ ءوزىنىڭ ايتۋىنشا، ازاماتتاردىڭ بەيبىت ءومىرى ءۇشىن كۇرەسىپ جۇرگەن ۇقك قىزمەتكەرلەرى تۋرالى حالىق از بىلەدى. ول وسى ولقىلىقتىڭ ورنىن تولتىرۋ ءۇشىن قولىنا قالام الىپتى.

ءبىر جارىم مينۋتقا جۋىق ۆيدەو ۇندەۋدە كارىم قاجىمقانۇلى قازاقشاعا ءتىلى كۇرمەلىپ تۇرىپ بىلاي دەيدى:

- قۇرمەتتى وقىرماندار! تاۋەلسىزدىكتىڭ 30 جىلدىعى قارساڭىندا ۇلتتىق قاۋىپسىزدىك كوميتەتىنىڭ باسشىلارىمەن بىرگە ەلىمىزدىڭ بارلىق ايماقتارىن جانە مەملەكەتتىك شەكارانى ارالادىق. جۇمىس ساپارى اياسىندا جەدەل قىزمەتكەر مەن شەكاراشىنىڭ ەرەن ەڭبەگى تۋرالى حالىقتىڭ از بىلەتىنىن بايقادىم. سوندىقتان، بورىشىن ءمىنسىز ورىنداپ جۇرگەن جاندار تۋرالى ايتاتىن ۋاقىت كەلدى دەپ ويلادىم.

نەگىزىن ەلباسى نۇرسۇلتان نازارباەۆ قالاعان، نىعايتۋ باعىتىن پرەزيدەنتىمىز قاسىم-جومارت توقاەۆ جالعاستىرىپ كەلە جاتقان مەملەكەت ەگەمەندىگىنە ولاردىڭ قوسقان ۇلەسىن ايتقىمىز كەلدى.

ازاماتتاردىڭ بەيبىت ءومىرى ءۇشىن ءبىزدىڭ قىزمەتكەرلەر كۇنى-ءتۇنى، ىستىق-سۋىققا قاراماي قىزمەت اتقارادى. ولار - ءبىزدىڭ باتىرلارىمىز! بۇل كىتاپ سولار تۋرالى جازىلعان. ونىڭ نەگىزىندە ناقتى ادامدار، قۇپياسى اشىلعان وقيعالار مەن دەرەكتەر بار. كىتاپ ءوز وقىرمانىن تابادى دەپ سەنەمىن.

بۇل ءماسىموۆ مىرزانىڭ بيىلدىققا شىعارىپ جاتقان ەكىنشى كىتابى. ناۋرىز ايىندا ونىڭ «كەلەشەكتىڭ ءامىرشىسى جاساندى ينتەللەكت» اتتى كىتابى شىققان.

كىتاپ مۇقاباسىندا ونىڭ اتا-بابالارى تۋعان اقسۋ جەرى كورسەتىلگەن. ال، اتالعان تۋىندىنى جازۋعا نۇرسۇلتان نازارباەۆ شابىتتاندىرعانىن ايتقان بولاتىن.

ال 2019 جىلى ءوزىنىڭ اكەسى، مارقۇم قاجىمقان ءماسىموۆ تۋرالى كىتاپ شىعارعان. كىتاپ «تامىر» دەپ اتالادى. وعان العىسوزدى مىرزاتاي جولداسبەكوۆ جازعان.

«ءوزىڭىز بىلەسىز، قازاق حالقى شەجىرەگە كوپ ءمان بەرەدى. اتا-باباڭ كىم، اكە-شەشەڭ قانداي بولعان؟ بۇل بالالارعا امانات بولىپ قالادى. سونىڭ ىشىندە اكەگە ساعىنىش بار. سوندىقتان اۋلەتتىڭ تاريحىن تەرەڭ جالعايتىن كىتاپ «تامىر» دەپ اتالادى»، - دەيدى اۆتور.

ايتا كەتەيىك، ءماسىموۆ 1999 جىلى «قازاقستان رەسپۋبليكاسىنىڭ ونەركاسىبىن قۇرۋ پروبلەمالارى جانە ونى شەشۋ جولدارى (تەوريا جانە پراكتيكا)» اتتى دوكتورلىق ديسسەرتاتسيا قورعاعان. ەكونوميكا عىلىمدارىنىڭ دوكتورى. حالىقارالىق قۇقىق مامانى.

قازاق، ۇيعىر، ورىس، اعىلشىن، قىتاي جانە اراب تىلدەرىن مەڭگەرگەن.

ول ەكى مارتە قازاقستان ۇكىمەتىن باسقاردى. ال، 2016 جىلى ەكس-پرەزيدەنت نازارباەۆتىڭ جارلىعىمەن قازاقستان رەسپۋبليكاسى ۇقك توراعاسى بولىپ تاعايىندالدى.

نۇربيكە بەكسۇلتانقىزى

Abai.kz

11 پىكىر

ۇزدىك ماتەريالدار

اقمىلتىق

«قيالشىلدار كلۋبى»

ءامىرجان قوسان 368
انىق-قانىعى

كىمنىڭ كىم ەكەنىن بىلە ءجۇرسىن دەپ...

اۋىت مۇقيبەك 302