قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ تۇركىمەنستانعا مەملەكەتتىك ساپارمەن باردى. تاراپتار ەكى ەل اراسىنداعى ستراتەگيالىق ارىپتەستىكتى دامىتۋ مەن ايماقتىق قاۋىپسىزدىك ماسەلەسىن، ساۋدا قاتىناستارىن تالقىلادى. 

تۇركىمەنستانعا مەملەكەتتىك ساپارمەن كەلگەن قاسىم-جومارت توقاەۆ پرەزيدەنت گۋربانگۋلى بەردىمۇحامەدوۆپەن بىرگە احالتەكە جىلقىسىنا ارنالعان كەشەننىڭ يپپودرومىن ارالاپ كوردى. مەملەكەت باسشىسىنا تۇركىمەنستان پرەزيدەنتىنىڭ ارعىماق اتتارى كورسەتىلدى. ءىس-شارا بارىسىندا قۇرمەتتى قوناقتار شاباندوزداردىڭ ونەرىن تاماشالادى.

شارادان كەيىن تۇركىمەنستان باسشىسى توقاەۆقا احالتەكە تۇلپارىن سىيعا تارتتى.

«وسى ءبىر تاماشا سىيلىعىڭىز ءۇشىن وزىڭىزگە العىس بىلدىرگىم كەلەدى، ارينە بۇل باۋىرلاس تۇركىمەن حالقىنىڭ دوستىعىنىڭ كورىنىسى. مەن بۇل جىلقىنى ءوزىم بارىپ كورىپ، جاعدايىن ءبىلىپ تۇرامىن. ارينە ءسىزدىڭ سىيلىعىڭىزدى بارىنشا جاقسى قارايتىن بولامىز», - دەدى توقاەۆ.

Cونىمەن قاتار تۇركىمەنستان باسشىسى توقاەۆقا تۇركىمەن تازىسىن دا سىيعا بەردى.

تاراپتار اراسىندا قانداي كەلىسىم جاسالعانى بەلگىسىز. الايدا تۇركىمەنستانداعى ەكونوميكالىق جانە الەۋمەتتىك جاعدايدىڭ ناشارلىعىنا قاراپ، ساۋدا قاتىناسى مەن ەكونوميكالىق جوبالار تالقىلاندى دەۋگە نەگىز بار. تۇركىمەنستاندا ازىق-تۇلىك تاپشىلىعى ارتۋدا، ال رەسمي كوروناۆيرۋس جوق بولسا دا، بەيرەسمي اقپاراتتار بويىنشا ۆيرۋستان كوز جۇمعاندار سانى 25 مىڭ ادامنان اسقان. بۇل ورتالىق ازياداعى ەڭ جوعارى كورسەتكىش بولۋى مۇمكىن. سوندىقتان كوروناۆيرۋس بويىنشا بىرلەسە كۇرەسۋ ماسەلەسى دە جابىق ەسىك فورماتىندا ءوتتى دەپ بولجام جاساۋعا بولادى.

ارينە، اۋعانستانداعى جاعداي دا كۇن تارتىبىندە. تۇركىمەنستانمەن تىكەلەي شەكاراسى بار اۋعانستاننىڭ ايماقتىق قاۋىپسىزدىككە توندىرەتىن قاۋپى مەن قاتەرى، وعان بىرلەسە قارسى تۇرۋ ماسەلەسى دە ايتىلعان بولۋى كەرەك.

اسحات قاسەنعالي

Abai.kz