قر مەملەكەتتىك حاتشىسى قىرىمبەك كوشەرباەۆتىڭ توراعالىعىمەن جامبىل جاباەۆتىڭ 175 جىلدىعىن اتاپ ءوتۋ جونىندەگى مەملەكەتتىك كوميسسياسىنىڭ كەزەكتى وتىرىسى ءوتتى، دەپ حابارلايدى قازاقپارات اقورداعا سىلتەمە جاساپ.

مەملەكەتتىك حاتشى ءوز سوزىندە جامبىل جاباەۆتىڭ 175 جىلدىعى ەلدىگىمىزدى ايشىقتاپ، بىرلىگىمىزدى كورسەتەتىن ايتۋلى وقيعا ەكەنىن، الداعى جوسپارلانعان ءىس-شارالاردى جوعارى دەڭگەيدە وتكىزۋ قاجەتتىگىن ايتتى.

– اقىننىڭ مەرەيتويى جاس ۇرپاقتى تاربيەلەيتىن، ۇلتىمىزدى ۇيىستىراتىن، جۇرتشىلىققا وي سالاتىن تاعىلىمى مول، ءتالىمى زور، تاربيەلىك ءمانى باي شارا بولۋى ءتيىس، – دەدى قىرىمبەك كوشەرباەۆ.

كوميسسيا وتىرىسىندا مادەنيەت جانە سپورت ءمينيسترى اقتوتى رايىمقۇلوۆا، اقپارات جانە قوعامدىق دامۋ ءمينيسترى ايدا بالاەۆا، ءبىلىم جانە عىلىم ءمينيسترى اسحات ايماعامبەتوۆ سونىمەن قاتار، الماتى وبلىسىنىڭ اكىمى اماندىق باتالوۆ پەن جامبىل وبلىسىنىڭ اكىمى بەردىبەك ساپارباەۆ اقىن مەرەيتويىن اتاپ وتۋگە قاتىستى جوسپاردىڭ ورىندالۋ بارىسى جونىندە باياندادى.

جيىن سوڭىندا مەملەكەتتىك حاتشى جامبىل جاباەۆتىڭ 175 جىلدىق مەرەيتويىن دايىنداۋ جانە وتكىزۋ جونىندەگى جالپى رەسپۋبليكالىق جوسپاردى ورىنداۋ جونىندەگى جۇمىستى جالعاستىرۋدى جانە بەلگىلەنگەن ءىس-شارالاردىڭ ساپالى وتكىزىلۋىن قامتاماسىز ەتۋدى تاپسىردى.

Abai.kz