مادەنيەت مينيسترلىگى الىبەك دىنىشەۆتىڭ 70 جىلدىق مەرەيتويىن 35,8 ميلليون تەڭگەگە اتاپ وتپەك. بۇل تۋرالى azattyq-ruhy سايتى مالىمدەدى. 

8 قازان كۇنى مەملەكەتتىك ساتىپ الۋ پورتالىندا «وپەراليا» حالىقارالىق فەستيۆالىن وتكىزۋگە ارنالعان كونكۋرسقا قۇجات قابىلداۋ اياقتالدى. كونكۋرىس 1 قازاندا جاريالانعان. ءبىر لوتتىڭ قۇنىن كونكۋرستى ۇيىمداستىرۋشى، ياعني قر مادەنيەت جانە سپورت مينيسترلىگى 35 ملن 834 مىڭ تەڭگەگە باعالاعان.

ءبىر قاراعاندا، كونكۋرس «وپەراليا» حالىقارالىق فەستيۆالىن ۇيىمداستىرۋ ءۇشىن جاريالانعان بولىپ كورىنەدى. ۇتىپ العان تاراپ 2021 جىلدىڭ 20 قاراشاسىنا دەيىن قىزمەت كورسەتىپ، ياعني، فەستيۆالدى تولىق وتكىزىپ ۇلگەرۋى كەرەك. شارا مىندەتتى تۇردە نۇر-سۇلتان قالاسىندا ءوتۋى ءتيىس.

ال، لوتتىڭ تەحنيكالىق سيپاتتاماسىن اشىپ قاراساق، بۇل فەستيۆال حالىق ءارتىسى الىبەك دىنىشەۆتىڭ 70 جىلدىعىن تويلاۋعا ارنالعانى انىق جازىلعان.

«فەستيۆالدىڭ ماقساتى – كسرو حالىق ءارتىسى الىبەك دىنىشەۆتىڭ 70 جىلدىعى اياسىندا الىبەك دىنىشەۆتىڭ شىعارماشىلىق مۇراسىن ناسيحاتتاۋ جانە ەلگە تانىتۋ، سونداي-اق، ۇزدىك شەتەلدىك ۇجىمدارمەن شىعارماشىلىق بايلانىستى نىعايتۋ»، - دەپ جازىلعان كونكۋرستىڭ تەحنيكالىق سيپاتتاماسىندا.

ال، فەستيۆال ءۇشىن 36 ملن تەڭگەگە جۋىق قاراجات ءبولىپ وتىرعان مادەنيەت مينيسترلىگى ىقتيمال جەڭىمپازعا كوپ تالاپ قويىپ وتىر. ەڭ الدىمەن، جەڭىمپاز فەستۆالدىڭ ستسەناريىن بۇگە-شۇگەسىنە دەيىن تاپسىرىس بەرۋشىمەن، ياعني مادەنيەت مينيسترلىگىمەن كەلىسۋى كەرەك.

«قىزمەت كورسەتۋشى كونتسەرتتىڭ ستسەناريىن تاپسىرىس بەرۋشىمەن اقىلداسىپ، وعان تاپسىرىس بەرۋشىنىڭ بارلىق تىلەگىن ەنگىزۋى كەرەك. حالىقارالىق فەستيۆالدىڭ ستسەناريىن ازىرلەگەن كەزدە جەڭىمپاز الىبەك دىنىشەۆتىڭ، شەتەلدىك جانە قازاقستاندىق ۇجىمداردىڭ قاتىسۋىمەن 16 نومىردەن كەم ەمەس كونتسەرتتىك باعدارلامانىڭ كونتسەپتسياسىن دايىنداۋ كەرەك»، - دەپ جازىلعان تالاپتا.

سونداي-اق، جەڭىمپاز اۋماعى 250 شارشى مەتردەن كىشى ەمەس، كەمى 1200 ادام سياتىن زال تاۋىپ، وعان باراتىن جولدى، اۆتوتۇراقتى ىڭعايلاپ قويۋعا مىندەتتەلەدى. ب تالاپتاردىڭ ءبىرى – كونتسەرت وتەتىن جەردىڭ سىرتى دا، ءىشى دە كوزدىڭ جاۋىن الاتىنداي ادەمى بولۋى شارت.

بۇدان وزگە، مادەنيەت مينيسترلىگى وسى 36 ملن تەڭگە اياسىندا كونتسەرتكە قاتىساتىنداردىڭ جولاقىسىن، جاتاتىن ورنىن، قالاماقىسىن تولەپ بەرۋدى دە تالاپ ەتىپ وتىر. ياعني، حالىق ءارتىسى قالتاسىنان ءبىر تيىن شىعارماي نۇر-سۇلتان قالاسىندا جەتپىس جىلدىعىن وسىنداي ەرەكشە جاعدايدا اتاپ وتەدى.

مادەنيەت ءمينيسترىنىڭ اتىنان الىناتىن شوق گۇلدەر دە، كورەرمەندەردى تەكسەرەتىن «اشىق» قوسىمشاسىنىڭ QR-كودى دا وسى سوما اياسىندا دايىندالۋ كەرەك.

مەمساتىپ الۋ جانە دىنىشەۆتىڭ جەتپىس جاسى: ءانشىنىڭ ءوزى نەگە پىكىر بىلدىرمەدى؟

ماتەريال دايىندالىپ جاتقاندا، Azattyq-ruhy ءتىلشىسى حالىق ءارتىسى الىبەك دىنىشەۆتىڭ وزىنە حابارلاسىپ، بۇل كونكۋرس تۋرالى حابارى بار ما، بۇنداي لوت جاريالاماس بۇرىن مادەنيەت مينيسترلىگى ول كىسىنى حاباردار ەتتى مە دەگەن بىرنەشە سۇراقتىڭ جاۋابىن الۋعا تىرىستى. الايدا، وپەرا ءانشىسىنىڭ ۇيالى تەلەفونى قوڭىراۋ قابىلداي المادى.

كەيىن، بىرقاتار باق-تاعى اقپاراتتاردان الىبەك دىنىشەۆ شەتەلدە گاسترولدىك ساپاردا جۇرگەنىن بىلدىك. ناقتىراق ايتساق، دىنىشەۆ قازاقستاننىڭ قىرعىز رەسپۋبليكاسىنداعى مادەني كۇندەرىنە قاتىسىپ جاتىر.

7 قازان كۇنى الىبەك دىنىشەۆ روزا رىمباەۆا، نۇرجامال ۇسەنباەۆا، التىنبەك قورازباەۆ، مايرا مۇحامەدقىزى سياقتى ارىپتەستەرىمەن بىرگە قىرعىزدىڭ ۇلتتىق فيلارمونياسىندا كونتسەرت بەردى. قازاقستاننىڭ قىرعىز ەلىندەگى مادەني كۇندەرى كەشە اياقتالىپ، ۇجىم گاسترولدىك ساپاردان ورالۋى ءتيىس.

Abai.kz