قازاقستان ۇكىمەتى بۇرىنعى بريتاندىق ساياساتكەر، جازۋشى دجوناتان ايتكەنگە نۇرسۇلتان نازارباەۆ رەسپۋبليكا پرەزيدەنتى بولىپ تۇرعان كەزدە ول تۋرالى كىتاپ جازۋ ءۇشىن 166 مىڭ فۋنت ستەرلينگ تولەدى، دەپ جازادى حالىقارالىق جوباعا قاتىسۋشى Guardian گازەتى.

بۇعان دەيىن دجوردج سوروس قورلارىنىڭ ءبىرى قارجىلاندىرعان جۋرناليست-زەرتتەۋشىلەردىڭ حالىقارالىق كونسورتسيۋمى (ICIJ) بىرقاتار الەمدىك كوشباسشىلاردىڭ وففشورلىق سحەمالارعا قاتىسۋى تۋرالى «پاندورا قۇجاتتارىن» جاريالاعان ەدى. وندا 35-تەن استام قازىرگى جانە بۇرىنعى ساياساتكەر، سونداي-اق 100-گە جۋىق ەلدىڭ 300-دەن استام شەنەۋنىگى بار. جۋرناليستەر كونسورتسيۋمىنىڭ جۇرگىزگەن زەرتتەۋلەرى اقش-تى ەڭ ۇلكەن سالىقتىق باسپانا دەپ اتادى.

ايتكەن – ۇلىبريتانيا پارلامەنتى مەن مينيسترلەر كابينەتىنىڭ بۇرىنعى مۇشەسى. ونىڭ ساياسي مانسابى 1996 جىلى پاريجدەگى Ritz Hotel قوناقۇيىندە تۇرعان اقىسىن كىم تولەگەنى تۋرالى سوتتا وتىرىك ايتقان كەزدە كۇرت اياقتالدى (راسىندا بۇل ساۋد ارابياسى كورولىنىڭ ۇلى بولاتىن). مۇنى جاريالاعانى ءۇشىن ايتكەن Guardian گازەتىن سوتقا بەردى، بىراق جالعان كۋاگەرلىگى سەبەپتى تۇرمەگە قامالدى. وسىعان قاراماستان، ايتكەن ىقپالدى قوعام قايراتكەرى بولىپ قالا بەرەدى. ۇلكەن ساياساتتان كەتكەننەن كەيىن ول الەمدىك تاريحتاعى ايگىلى تۇلعالاردىڭ ءومىربايانىن زەرتتەي باستادى.

«2010 جىلدىڭ ساۋىرىندە دجوناتان ايتكەن ۆاشينگتونعا ءوزىنىڭ جاڭا كىتابىنىڭ – قازاقستان پرەزيدەنتى نۇرسۇلتان نازارباەۆتىڭ ماقتاۋلى ءومىربايانىنىڭ تۇساۋكەسەرىنە ۇشىپ باردى... الايدا ول ءوز سوزىندە ءبىر ماڭىزدى ماسەلەنى – قازاقستان ۇكىمەتىنە جۇمىس ىستەگەن PR-كومپانيانىڭ جاسىرىن تۇردە كىتاپقا تاپسىرىس بەرىپ، اقىسىن تولەگەنىن ايتۋدى ۇمىتىپ كەتتى. «پاندورا قۇجاتتارى» بويىنشا ايتكەن ءوزىنىڭ ادەبي شىعارمالارى ءۇشىن 166 مىڭ فۋنت الدى»، - دەپ جازادى گازەت.

زەرتتەۋ اۆتورلارى گونكونگتا ورنالاسقان ءارى پانامادا تىركەلگەن World PR كومپانياسى گونكونگ جانە بريتاندىق ۆيرگين ارالدارى ارقىلى ايتكەننىڭ Aitken Consultancy & Research Services Limited كومپانياسىنا اقشا اۋدارعان دەپ مالىمدەيدى. «پاندورا قۇجاتتارىنىڭ» دەرەكتەرىنە سۇيەنسەك، كومپانيا ايتكەننىڭ كىتاپتىڭ تۇساۋكەسەرىنە بارعان ۆاشينگتون ساپارىنا اقى تولەگەن. وندا ساياساتكەر اق ۇيگە جاقىن جەردەگى Capital Hilton قوناق ۇيىنە ايالداعان.

بۇعان دەيىن ايتكەن قازاقستان ۇكىمەتىنەن كىتاپ جازعانى ءۇشىن اقشا الماعانىن مالىمدەگەن بولاتىن.

نازەركە التايقىزى

Abai.kz