دۇيسەنبى, 25 قازان 2021
بيلىك 783 0 پىكىر 22 قىركۇيەك, 2021 ساعات 11:29

اۋىلدىق جەرلەردە مەديتسينا ماماندارى جەتىسپەيدى

قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «Nur Otan» پارتياسى فراكتسياسىنىڭ مۇشەلەرى س.ناقپاەۆتىڭ  قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى  ە.ل. توعجانوۆقا دەپۋتاتتىق ساۋالى

قۇرمەتتى ەرالى لۇقپانۇلى!

ءبىز، پارلامەنت ءماجىلىسىنىڭ VII شاقىرىلىمىنىڭ دەپۋتاتتارى، «Nur Otan» پارتياسى فراكتسياسىنىڭ مۇشەلەرى سىزدەن ەلىمىزدەگى اۋىلدىق ەلدى مەكەندەردەگى مەديتسينالىق تار شەڭبەردەگى مامانداردىڭ جەتىسپەۋشىلىگى ماسەلەسىن شەشۋدى سۇرايمىز.

سوڭعى كەزدە مينيسترلىك، وبلىس اكىمدىكتەرى تاراپىنان اۋىلدىق ەلدى مەكەندەرگە مەديتسينا ماماندارىن تارتۋعا بىرقاتار جۇمىستار جاسالىندى جانە اتقارىلۋدا. مامانداردى اۋىلدىق جەرلەرگە تارتۋ ءۇشىن «ديپلوممەن اۋىلعا» باعدارلاماسى جۇمىس جاساۋدا. جەرگىلىكتى اكىمدىكتەردەن كوتەرمە جاردەماقى بەرىلۋدە. سوعان قاراماستان، وبلىستاردا، سونىڭ ىشىندە شالعاي اۋدانداردا كەيبىر دارىگەر ماماندار ءالى دە جەتىسپەيدى. مىسالى، كەز-كەلگەن مەديتسينالىق وتالاردا وتە قاجەتتى انەستەزيولوگ-رەانيماتولوگ، سول سياقتى ينفەكتسيونيست، تراۆماتولوگ، پۋلمانولوگ، ەندوكرينولوگ سياقتى ماماندار كوپتەگەن اۋدانداردا جەتىسپەيدى. COVID-19 سياقتى اۋىر ناۋقاستان جازىلعان ادامدارعا رەابيليتولوگ قاجەت. ول مۇلدەم جوقتىڭ قاسى. ولاردى ايتپاعاندا، اكۋشەر-گينەكولوگ، حيرۋرگ،  فتيزياتور    سياقتى ماماندار دا شالعاي اۋدانداردا جەتپەي جاتىر. الىس اۋدانداردا وسىنداي كادر جەتىسپەۋىنە بايلانىستى وزدەرىنە كەلىپ تۇسكەن اۋرۋلاردى سانيتارلىق-اۆياتسيا شاقىرتىپ، وبلىس ورتالىقتارىنا جىبەرۋدى جيىلەتكەن. بۇنىڭ بارىنە بيۋدجەتتەن قاراجات كەرەك.

بۇل قازاقستان رەسپۋبليكاسىنىڭ بارلىق وبلىستارىنا ءتان پروبلەما. سونىڭ ىشىندە اتىراۋ وبلىسى بويىنشا بارلىعى 219, ونىڭ ىشىندە اۋىلدىق جەرلەرگە 63 مامان جەتىسپەسە، ماڭعىستاۋ وبلىسى بويىنشا بارلىعى 221, ونىڭ ىشىندە اۋىلدىق جەرلەرگە 53 مامان جەتىسپەيدى. سول سياقتى  باتىس قازاقستان وبلىسى بويىنشا بارلىعى 267 مامان كەرەك بولسا، اۋىلدىق جەرلەرگە 140 مامان كەرەك ەكەن.

جاعدايدىڭ بۇلايشا ۋشىعۋىنا گرانت بويىنشا وقىعان مەديتسينالىق جوعارى وقۋ ورىندارىنىڭ كەيبىر تۇلەكتەرىنىڭ مىندەتتى ءبولۋ ادىسىنە باعىنباي، وزدەرى بولىنگەن بولاشاق جۇمىس ورىندارىنا بارماي قالۋلارى دا سەبەپتەرىن تيگىزۋدە.

سونىمەن قاتار، مەديتسينالىق جوعارى وقۋ ورىندارى ءۇشىن بولىنەتىن گرانت سانى تۇسىنىكسىز سەبەپتەرمەن 2020 جىلى ازايىپ كەتكەن (2019 ج-4685, 2020 ج-4638 گرانت).

ەل پرەزيدەنتى قاسىم-جومارت كەمەلۇلى توقاەۆتىڭ 2021 جىلى 1 قىركۇيەكتەگى قازاقستان حالقىنا جاساعان جولداۋىندا دەنساۋلىق ساقتاۋ جۇيەسىنىڭ تيىمدىلىگىن كوتەرۋ تۋرالى جاقسى ايتىلدى. مەديتسينا سالاسىنا ينفراسترۋكتۋرا، كادر، ءدارى-دارمەكپەن قامتۋ ماسەلەسىنە قوماقتى قارجى ءبولۋ كەرەكتىگى كورسەتىلدى.

جالپى، مەديتسيناداعى كادر جەتىسپەۋشىلىگى ماسەلەلەرى بۇعان دەيىن دە ايتىلىپ ءجۇر. سوعان قاراماستان سايلاۋشىلارمەن كەزدەسكەندە شالعاي اۋداندارداعى دارىگەرلەر وسى پروبلەمانى رەنىشپەن كوتەرىپ، بىزدەن ىقپال ەتۋگە كومەك سۇراپ وتىر.

جالعىز COVID-19 پاندەمياسىنا ەمەس، جالپى دەنساۋلىق ساقتاۋ ماسەلەسىندە الدىمەن مامان تاپشىلىعىن جويۋ كەرەك.

وسى ايتىلعانداردى قورىتا كەلە، تومەندەگى كورسەتىلگەن  پروبلەمالاردى شەشۋدى سۇرايمىز:

1. «Nur Otan» پارتياسىنىڭ 2025 جىلعا دەيىنگى سايلاۋالدى باعدارلاماسى جول كارتاسىنىڭ ورىندالۋىنا سايكەس، كوزدەلىپ وتىرعان 2021 جىلدان باستاپ مەديتسينالىق جوعارى وقۋ ورىندارىنا گرانتتار سانىن تيىسىنشە 2021 جىلعى 4685-تەن 2025 جىلعى 5185-كە دەيىن ۇلعايتۋدى ۇتىمدى پايدالانىپ، كادر جەتىسپەۋ ماسەلەسىن شەشۋ;

2. گرانتپەن وقىعان تۇلەكتەردىڭ وزدەرىنىڭ بولاشاق جۇمىس ورىندارىنا سەبەپسىز بارماي قالۋلارىن توقتاتۋ;

3. گرانت بولگەندە مەديتسينالىق ماماندار جەتىسپەيتىن ايماقتارعا كۆوتا سانىن كوبەيتۋ;

4. اۋىلدىق ەلدى مەكەندەردەگى جالپى پراكتيكا دارىگەرلەرىن بىلىكتىلىگىن ارتتىرۋ كۋرستارىنا جىبەرۋ ارقىلى اۋىلدىق جەرگە كەرەكتى مەديتسينالىق ماماندىقتاردى الۋعا مۇمكىنشىلىك قاراستىرۋ.

دەپۋتاتتىق ساۋالىمىزدا كوتەرىلگەن سۇراقتارعا زاڭنامادا كورسەتىلگەن مەرزىمدە جازباشا تۇردە جاۋاپ بەرۋىڭىزدى سۇرايمىز.

Abai.kz

0 پىكىر