قۋانىپ وتىرمىز. قىزىلجاردىڭ ءبىر توپ ازاماتتارى ءبىرىمىزدى-ءبىرىمىز قۇتتىقتاپ ءماز بولدىق. رەسپۋبليكادا «موراتوري» بولىپ جاتسا دا، سولتۇستىك قازاقستان وبلىستىق ونوماستيكا كوميسسياسىنىڭ مۇشەلەرى باس قوسىپ، قىزىلجارداعى بىرنەشە مەكتەپكە ات قويدى.

الاشتىڭ كوسەمى ءاليحان بوكەيحان اتامىزدىڭ، ۇلت ۇستازى احمەت بايتۇرسىنۇلىنىڭ، الاشتىڭ جاس جولبارىسى سماعۇل سادۋاقاسۇلىنىڭ  ارداقتى ەسىمدەرىن ورتا مەكتەپتەرگە بەردىك. وسىناۋ تاريحي وقيعاعا قاتىسىمىز بولعانىنا قۋاندىق. الەم چەمپيونى قاجىمۇقان اتامىزعا ۇلتتىق سپورت مەكتەبىن بەرۋگە ۇيعاردىق.

وبلىستىق ونوماستيكا كوميسسياسىن باسقارىپ وتىرعان، وبلىس اكىمىنىڭ ورىنباسارى عاني ساقتاعانۇلى وسى ۇسىنىستى ورتاعا سالعاندا، البەتتە ءبىراۋىزدان داۋىس بەرگەندەر ىشىندە كىم بولدى دەيسىز عوي: ءسابيت مۇقانوۆ اتىنداعى وبلىستىق قازاق تەاترىنىڭ ديرەكتورى ءارى ءانشى ءبىرجان باۋىرىمىز، وبلىستىق ءارحيۆتىڭ ديرەكتورى، عىلىم كانديداتى ساۋلە مالىكوۆا، وبلىستىڭ قۇرمەتتى ازاماتى جۋرناليست جاراسباي سۇلەيمەنوۆ، جۋرناليست جاقسىباي سامرات تاعى باسقالارى باستاعان ەلدىڭ يگى جاقسىلارى. ارينە، رەسپۋبليكا ۇكىمەتى قولدايدى، پرەمەر-مينيستر قول قويادى دەگەن ءۇمىتىمىز كامىل.

«اتتارىن بەردىك، مەكتەپتەرىمىز سول اتتارىنا لايىق بولسىن دەيىك. الاشتىڭ قاسيەتتى ۇلدارىنىڭ اتىنداعى مەكتەپتەردى ماقتان قىلايىق، ەسكەرتكىشتەرىن ورناتىپ، ماڭايىن كوركەيتەيىك!»، دەپ تاراستىق.

زارقىن تايشىباي،

قازاقستاننىڭ ەڭبەك سىڭىرگەن قايراتكەرى
«Abai.kz» سايتىنىڭ تۇراقتى وقىرمانى ءارى اۆتورى

Abai.kz