جۇما, 22 قازان 2021
ارىلۋ 4720 20 پىكىر 13 قىركۇيەك, 2021 ساعات 19:10

جاۋاپ بەرىڭىز، مۋسين مىرزا!

قازاقستان ۇكىمەتى «ەلەكتروندى ۇكىمەت» (eGov) پلاتفورماسىن جاساۋ ءۇشىن رەسەيدىڭ سبەر كومپانيالار توبىمەن مەموراندۋمعا قول قويعانى بەلگىلى. بۇل كەلىسىمگە ەكى ەل پرەزيدەنتتەرىنىڭ، قاسىم-جومارت توقاەۆ پەن ۆلاديمير ءپۋتيننىڭ كوزىنشە قول قويىلعان.

قر تسيفرلىق دامۋ، يننوۆاتسيا جانە اەروعارىش ءوندىرىسى ءمينيسترى باعدات ءمۋسيننىڭ ءوزى مالىمدەگەن.  «Atameken Business» ارناسىنىڭ ەفيرىنەن نەگە رەسەيلىك كومپانيا قىزمەتىنە جۇگىنگەنىن تۇسىندىرۋگە تىرىسقان مينيستر مۋسين ەكى تاراپتىڭ قۇقىق-قۇزىرەتتەرى تۇگەل جازىلاتىن اتالعان كەلىسىمگە كەلەسى جىلدىڭ ناۋرىز-ءساۋىر ايلارىندا قول قويۋ جوسپارلانعانىن ايتقان. ءمينيستردىڭ ايتۋىنشا، جوبا 5 جىلعا جوسپارلانعان. قۇنى – 500 ميلليون دوللاردى قۇرايدى. ءبىز بۇل تۋرالى Abai.kz اقپاراتتىق پورتالىندا ەگجەي-تەگجەيلى جازدىق.

بۇگىن ءماجىلىس دەپۋتاتى ەرلان سايروۆ مىرزا، اتالعان ماسەلەگە قاتىستى  وزەكتى ماسەلەلەردى قامتىپ، مينيستر باعدات ءمۋسيننىڭ اتىنا دەپۋتاتتىق ساۋال قويىپتى. ءبىز دەپۋتات ساۋالىن Abai.kz وقىرماندارىنىڭ تالقىسىنا ۇسىنعاندى ءجون كوردىك.


قازاقستان رەسپۋبليكاسىنىڭ
تسيفرلىق دامۋ، يننوۆاتسيا، اەروعارىش ونەركاسىبى
ءمينيسترى ب.ب. مۋسينگە

قۇرمەتتى باعدات باتىربەكۇلى!

قوعامدا eGov پورتالىن الماستىرۋ جانە رەسەيدىڭ «سبەر-ىمەن» وسى ماسەلە بويىنشا مەموراندۋمعا قول قويۋ ءار-الۋان پىكىر تۋعىزۋدا.

مەملەكەتتىك قىزمەت كورسەتۋدىڭ ساندىق تەحنولوگياعا كوشىپ، وسى سالانىڭ شاپشاعدىعى ارتىپ، تيىمدىلىگى ارتقاندىعى دۇرىس، قۇپتارلىق قادام.

ساراپشىلاردىڭ ايتۋىنشا، تەحنولوگيالىق دارەجەسى جوعارى سەرىكتەسسىز بۇل ماسەلەنى شەشۋ مۇمكىن ەمەس ەكەندىگىن انىق.

دەگەنمەن، قوعام وكىلدەرىن قازاقستاندىقتاردىڭ جەكە دەرەكتەرىنىڭ ساقتالۋى مەن قاۋىپسىزدىگى ماسەلەسى وتە الاڭداتىپ وتىر.

بۇگىندە، بارلىق دەڭگەيدە ازاماتتار وسى ماسەلەنى قىزۋ تالقىلاۋدا.

Nur Otan پارتياسى ەلىمىزدىڭ تسيفرلاندىرۋ سالاسى مەملەكەت دامۋىنا ءوزىنىڭ ناقتى ۇلەسىن قوسۋى ءتيىس دەپ ەسەپتەيدى!

وسى پروبلەماعا بايلانىستى كەلەسى سۇراقتارعا جاۋاپ بەرۋىڭىزدى وتىنەمىن!

1. نەلىكتەن قازاقستان رەسپۋبليكاسىنىڭ ساندىق ترانسفورماتسياسى سالاسىنداعى جۇمىسقا «سبەربانك» سەرىكتەستىگىمەن مەموراندۋمعا قول قويىلدى؟

1.1. نەلىكتەن، بانك توراعاسى قول قويعان مۇنداي قۇجاتقا قازاقستان رەسپۋبليكاسىنىڭ پرەمەر-ءمينيسترى قول قويۋى ءتيىس؟ مينيستر نەمەسە «ازاماتتارعا ارنالعان ۇكىمەت» باسشىسىنىڭ دەڭگەيى ەمەس پە؟

2. وسى ماسەلە بويىنشا قازاقستان رەسپۋبليكاسى سەرىكتەس بولۋ ءۇشىن جاھاندىق دەڭگەيدە ليدەر ءىرى كومپانيالارمەن كەلىسسوزدەر جۇرگىزىلدى مە؟

3. اتالعان جوبا ءىس-جۇزىنە اسقان كەزدە، اقپاراتتىق قاۋىپسىزدىك نورمالارى قالاي قاداعالانادى، ازاماتتاردىڭ دەرەكتەر بازاسى قاي جەردە ساقتالادى، بۇل بازاعا شەت ەل ازاماتتارىنىڭ كىرۋ، كورۋ ەركىندىگى بولا ما؟

4. التى جىلدا مەملەكەتتىك «ۇلتتىق اقپاراتتىق تەحنولوگيا» اق 860 ملرد استام قارجى بولىنگەن. سونىمەن بىرگە، بارلىق مەملەكەتتىك ورگاندار، كۆازي مەملەكەتتىك سەكتور، ەشقانداي قىزمەتىن كورمەسەدە، وسى كومپانيامەن كەلىسىم-شارتقا وتىرۋى ءتيىس دەگەن اقپاراتتا بار. وسىنشاما قارجى بولىنە وتىرىپ نەلىكتەن ازاماتتار سىرتقى-ىشكى قولدانۋشى رەتىندە، ءۇزىلىسسىز، كەدەرگىسىز جۇمىس ىستەيتىن ۇلتتىق سەرۆيس الاڭىن جاساي المادىق ؟

5. ارحيۆ سالاسىن تسيفرلاندىرۋعا 1,2 ملرد تەڭگە بولىنگەن ەكەن، وسى شارۋا نەگە اياقسىز قالعان، قارجى قايدا؟ ازاماتتار ەڭ كوپ قولداناتىن جەردىك كاداستر سالاسى نەلىكتەن ءالى كۇنگە دەيىن تسيفرلاندىرىلماعان؟

ءبىزدىڭ ويىمىزشا، حالىق، قوعام الدىندا تسيفروۆيزاتسيا سالاسىنداعى جاڭداي جونىندە ەسەپ بەرەتىن ۋاقىت جەتتى!

قۇرمەتپەن،
ءماجىلىس دەپۋتاتى،
Nur Otan پارتياسى فراكتسياسى مۇشەسى

ەرلان سايروۆ

Abai.kz

20 پىكىر