جۇما, 29 ناۋرىز 2024
بيلىك 3138 3 پىكىر 27 تامىز, 2021 ساعات 15:46

پرەزيدەنت شۇعىل جينالىس وتكىزدى

مەملەكەت باسشىسى جامبىل وبلىسىندا بولعان جارىلىستارعا بايلانىستى شۇعىل جينالىس وتكىزدى.

جيىنعا پرەمەر-مينيستر، قۇقىق قورعاۋ، قورعانىس، قاۋىپسىزدىك جانە باسقا دا كۇشتىك قۇرىلىمداردىڭ باسشىلارى قاتىستى.

قاسىم-جومارت توقاەۆ جامبىل وبلىسىندا بولعان توتەنشە وقيعا سالدارىنان قازا تاپقان ازاماتتاردىڭ وتباسىلارىنا كوڭىل ايتىپ، زارداپ شەككەن ادامداردىڭ تەزىرەك ساۋىعىپ كەتۋىنە تىلەكتەستىك ءبىلدىردى.

كەشە جامبىل وبلىسىنىڭ بايزاق اۋدانىندا توتەنشە وقيعا بولدى. قارۋلى كۇشتەرىمىزدىڭ وق-ءدارىسى ساقتالاتىن قويمانىڭ بىرىنەن ءورت شىقتى. ارتىنان بىرنەشە جارىلىس بولدى. جەرگىلىكتى تۇرعىندار امان-ەسەن. وكىنىشكە قاراي، اسكەري قىزمەتشىلەر مەن قۇتقارۋشىلار اراسىندا ادام شىعىنى بار. ولار قىزمەتتىك مىندەتىن اتقارۋ بارىسىندا ەرلىكپەن قازا تاپتى. قايتىس بولعان ازاماتتاردىڭ وتباسىنا قايعىلارىنا ورتاقتاسىپ، كوڭىل ايتامىن. جاراقات العان ادامداردىڭ تەزىرەك ساۋىعىپ كەتۋىن تىلەيمىن، – دەدى مەملەكەت باسشىسى.

پرەزيدەنت قازا تاپقان ازاماتتاردىڭ وتباسىلارىنا كومەك كورسەتۋ بويىنشا ناقتى تاپسىرمالار بەردى.

– مەملەكەتتىك ۋاكىلەتتى ورگاندار قازا تاپقان ازاماتتاردىڭ وتباسىلارىنا كومەك كورسەتۋدىڭ بارلىق شارالارىن قابىلداۋى قاجەت. جۇمىلدىرىلعان بارلىق سالا ماماندارىنىڭ جانكەشتىلىگىنىڭ ارقاسىندا جاعداي باقىلاۋعا الىنىپ، ودان دا كوپ شىعىنعا جول بەرىلمەدى. قۇتقارۋشىلارعا، دارىگەرلەرگە، پوليتسيا، پروكۋراتۋرا جانە اكىمدىك قىزمەتكەرلەرىنە العىس ايتامىن. دەگەنمەن ءورتتىڭ سالدارى قيىنعا سوقتى. ادامدار زارداپ شەكتى. كوپتەگەن ازامات باسپاناسىن تاستاپ كەتۋگە ءماجبۇر بولدى. ەلدى مەكەندەردىڭ ينفراقۇرىلىمىنا زاقىم كەلىپ، بىرقاتار عيماراتتار قيراپ قالدى. وسىعان بايلانىستى شۇعىل شارالار قابىلداندى. بىراق ءالى دە كوپ قالپىنا كەلتىرۋ جۇمىستارىن جۇرگىزۋ كەرەك، – دەدى قاسىم-جومارت توقاەۆ.

پرەزيدەنت ورتالىق جانە جەرگىلىكتى ورگانداردىڭ جۇمىسىن دۇرىس ۇيلەستىرۋ كەرەك ەكەنىن ايتتى. قاجەتسىز كەدەرگىلەردى جويىپ، ۋاقىت ۇتتىرماي جەدەل قيمىلاۋدى، ەڭ ءبىرىنشى كەزەكتە اۋىل تۇرعىندارىن ءوز ۇيلەرىنە قايتارۋ شارالارىن قولعا الۋدى تاپسىردى.

تاعى ءبىر ماڭىزدى ماسەلە رەتىندە اپاتتىڭ سەبەپتەرىن انىقتاۋ قاجەت ەكەنىن ايتتى. بۇنداي جاعدايلاردىڭ الدىن الۋ بويىنشا ناقتى شارالار قابىلداۋدى تاپسىردى.

مەملەكەت باسشىسى ەكى جىل بۇرىن ارىستا بولعان جارىلىستى ەسكە الىپ، قارۋ-جاراق قويمالارىندا ءالى دە شەشىلمەگەن ءتۇيىندى ماسەلەلەردىڭ بار ەكەنىن ايتتى. پرەزيدەنت ارىس وقيعاسىنان كەيىن ارنايى تاپسىرما بەرگەنىن، ەندى وسى باعىتتاعى جۇمىستاردى جەدەلدەتىپ اياقتاۋعا تاپسىرما بەردى.

قاسىم-جومارت توقاەۆ جامبىل وبلىسىنداعى توتەنشە وقيعاعا بايلانىستى بىرقاتار شارالاردى شۇعىل قولعا الۋدى تاپسىردى.

– ءبىرىنشى. توتەنشە جاعدايدىڭ سالدارىن جويۋ ءۇشىن ۆەدومستۆوارالىق مەملەكەتتىك كوميسسيا قۇرىلسىن. وعان پرەمەر-ءمينيستردىڭ ورىنباسارى رومان ۆاسيلەۆيچ سكليار باسشىلىق ەتسىن. رومان ۆاسيلەۆيچ، سىزگە قازىر جينالىس اياقتالعان سوڭ جامبىل وڭىرىنە شۇعىل بارۋدى تاپسىرامىن. جۇمىستىڭ باسى-قاسىندا بولىپ، بارلىق شارالاردى وقيعا ورنىنان ۇيىمداستىرىڭىز. ەكىنشى. قازا بولعان ازاماتتاردىڭ وتباسىن الەۋمەتتىك قورعاۋ جانە زارداپ شەككەن تۇرعىندارعا كومەك كورسەتۋ ءۇشىن بارلىق قاجەتتى شارالار قابىلدانسىن. ءۇشىنشى. دەنساۋلىق ساقتاۋ مينيسترلىگى توتەنشە وقيعا سالدارىنان جاراقات العان ازاماتتارعا جان-جاقتى مەديتسينالىق كومەك كورسەتۋدى ۇيىمداستىرسىن، – دەدى مەملەكەت باسشىسى.

سونداي-اق باس پروكۋراتۋرا مەن ىشكى ىستەر مينيسترلىگىنە وقىس وقيعانىڭ ءمان-جايىن جانە كىنالىلەردى انىقتاۋ ءۇشىن سوتقا دەيىنگى تەرگەۋ امالدارىنىڭ مۇقيات جۇرگىزۋدى قامتاماسىز ەتۋدى، ىشكى ىستەر مينيسترلىگى مۇددەلى مەملەكەتتىك ورگاندارمەن بىرلەسىپ، قوعامدىق ءتارتىپتى، ازاماتتاردىڭ قاۋىپسىزدىگى مەن دۇنيە-مۇلكىنىڭ ساقتالۋىن قامتاماسىز ەتۋ ءۇشىن كەشەندى شارالار قابىلداۋدى تاپسىردى.

ۇلتتىق قاۋىپسىزدىك كوميتەتىنە، باس پروكۋراتۋراعا جانە ىشكى ىستەر مينيسترلىگى مەن مۇددەلى مەملەكەتتىك ورگاندارعا وقيعا تۋرالى جالعان اقپاراتتىڭ تارالۋىنا جول بەرمەۋ ءۇشىن شارالار قابىلداۋ جونىندە تاپسىرمالار بەرىلدى.

جيىندا، قورعانىس ءمينيسترى نۇرلان ەرمەكباەۆ، توتەنشە جاعدايلار ءمينيسترى يۋري يلين، جامبىل وبلىسىنىڭ اكىمى بەردىبەك ساپارباەۆ، ىشكى ىستەر ءمينيسترى ەرلان تۇرعىمباەۆ جانە باس پروكۋرور عيزات نۇرداۋلەتوۆ بايانداما جاسادى.

3 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1584
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2284
عيبىرات

قايسار رۋحتى عازيز جان

مۇحتار قۇل-مۇحاممەد 3621