بەيسەنبى, 27 قاڭتار 2022
اسقانعا - توسقان 6313 17 پىكىر 18 تامىز, 2021 ساعات 13:40

تۇرعىمباەۆتىڭ مينيسترلىگى قاي تىلدە سويلەيدى؟

قر ىشكى ىستەر ءمينيسترى
ەرلان زامانبەكۇلى تۇرعىمباەۆتىڭ نازارىنا!

ءدال قازىر قازاق قوعامىنداعى قىزۋى قايناپ تۇرعان تاقىرىپ – ءتىل ماسەلەسى. قازاقتار قازاقستاندا قازاقشا سويلەگەنى، قازاق تىلىندە قىزمەت كورسەتۋدى تالاپ ەتكەنى الگى سولتۇستىكتەگى سويى بولەك، سالتى باسقا، سوتقار كورشىمىز – رەسەيگە، ونىڭ ايتاقتاعان يتتەي ارسىلداعان كوبىكاۋىز ايتاشىلارىنا، ءتۇرلى لاۋازىمداعى ساياساتكەرلەرىنە ۇناماي قالعان ەكەن. ءسويتىپ، جوق جەردەن داۋ شىعارىپ، وزگە مەملەكەتتىڭ ىشكى شارۋاسىنا اشىقتان-اشىق ارالاستى.

ويى بۇزىق وداقتاسىمىز: «قازاقستاندا ۇلتشىلدىق بەلەڭ الىپ بارادى. ورىستارعا قىسىم جاساپ جاتىر» - دەپ، قايتا ويبايعا باستى. سالا-قۇلاش سايتتاردى ايتپاعاندا، فەدەرالدىق تەلەارنالار پرايم-تايمنان ۋاقىت ءبولىپ، كرەمل اۋلاسىنداعى ءبىرلى-جارىم «بىلگىشتى» سويلەتتى. ۇلىجەرجاۆالىق ءشوۆينيزمنىڭ ايىقپاس دەرتىنە شالدىققان ولاردىكى نە، ادەتتەگىدەي كوگەرىپ-سازارىپ سويلەدى.

ونى ەستىگەن اقوردا ىلدىم-جىلدىم اقتالۋدىڭ الەگىنە ءتۇستى. پرەزيدەنت اكىمشىلىگىنىڭ وكىلى داۋرەن اباەۆتىڭ «تۇرپايى ۇلتشىلدىق» نەمەسە «ۇڭگىردەگى ۇلتشىلدىق» تۋرالى ايتقان ەكى اۋىز ءسوزى، ورىس اقپاراتى ءۇشىن ىزدەگەنگە-سۇراعاننىڭ ناق ءوزى بولدى. ءسويتىپ، بۇل ماسەلە قازاق قوعامىنىڭ قىزۋ تالقىسىنا ءتۇستى. ءجا، وسىمەن ءتامام.

نازارباەۆتىڭ 95 پايىز قازاقشاسى - 90 پايىز ورىسشا بوپ كەتكەن بە؟

ءبىزدىڭ نازارىمىزدى بۇرعان – مىنا ءبىر ءسوز بولىپ تۇر.

«ءبىزدىڭ ەلىمىزدە حالىقتىڭ 90%-ى ورىس ءتىلىن بىلەدى. مەنىڭ ويىمشا، بۇل الەمدەگى ەڭ جوعارى كورسەتكىشتەردىڭ ءبىرى. مۇمكىن، رەسەي جانە بەلارۋستان كەيىنگى كورسەتكىش شىعار، بۇل»، - دەدى اباەۆ مىرزا.

قايسىبىر جىلى ەكس-پرەزيدەنت نازارباەۆ ۇكىمەتكە تاپسىرما بەرىپ، ساياسي باعدارلاما قابىلداعان ەدى. ول بويىنشا 2025 جىلعا قاراي قازاقستان حالقىنىڭ 95 پايىزى قازاق ءتىلىن ەركىن مەڭگەرگەن بولۋى ءتيىس-ءتىن.

«ەگەر ءاربىر قازاق انا تىلىندە سويلەۋگە ۇمتىلسا، ءتىلىمىز الدەقاشان اتا زاڭىمىزداعى مارتەبەسىنە لايىق ورنىن يەلەنەر ەدى»، - دەگەندى دە، «قازاق ءتىلى جاپپاي قولدانىس تىلىنە اينالىپ, شىن مانىندەگى مەملەكەتتىك ءتىل مارتەبەسىنە كوتەرىلگەندە، ءبىز ەلىمىزدى «قازاق مەملەكەتى» دەپ اتايتىن بولامىز»، - دەگەندى دە، «قازاق ءتىلى – قازاقستان رەسپۋبليكاسىنىڭ مەملەكەتتىك ءتىلى. وعان كوڭىل دە، قارجى دا سولاي بولىنەدى. انا ءتىلىن بىلمەۋ قازاق ازاماتى ءۇشىن ۇيات سانالۋعا ءتيىس. مەملەكەتتىك تىلگە قۇرمەتپەن قاراماۋى ونىڭ قىزمەت بابىندا وسۋىنە دە اسەر ەتەتىن بولۋى كەرەك»، - دەگەندى دە نۇرسۇلتان نازارباەۆ ايتقان.

نازارباەۆ قويعان مەجە – 2025 جىل ەدى. بيىل 2021 جىل. ءبىز ءالى كۇنگە «حالىقتىڭ 90 پايىزى ورىس ءتىلىن بىلەدى»، دەگەن جىلتىر، جالتاق ءسوزدى اقتالۋدىڭ ارگۋمەنتى ەتىپ ءجۇرمىز...

تاقارىپقا وراي، ءبىز بۇگىن ەرلان زامانبەكۇلى تۇرعىمباەۆ باسشىلىق ەتەتىن قر ىشكى ىستەر مينيسترلىگىندەگى رەفورما ءھام ونداعى مەملەكەتتىك ءتىلدىڭ احۋالى جايلى ءسوز ەتپەكپىز.

ءىىم قاي تىلدە سويلەيدى؟

2019 جىلدىڭ اقپانى. قازاقستاننىڭ ىشكى ىستەر ءمينيسترى اۋىستى. قالمۇحانبەت قاسىموۆ سەگىز جىل تاپجىلماي وتىرعان كرەسلوعا ەرلان زامانبەكۇلى كەلىپ قونجيدى. ءسويتىپ، قاسىموۆقا قوش ايتتىق تا، تۇرعىمباەۆتى تورگە شىعاردىق. ەل-جۇرتقا سۇيەۋدەي سۇيكىمى قالماي بارا جاتقان سوڭ، ەلباسى وزگەرىس جاساۋدى تاپسىرعاندا، فورما اۋىستىرعاننان ءارى اسا الماعان قازاق پوليتسياسىنا ءمينيستردىڭ اۋىسۋى وڭ اسەر ەتەر دەدىك. وكىنىشتىسى، باياعى جارتاس – سول جارتاس كۇيىندە قالدى.

ءبىز وسىعان دەيىن ەرلان زامانبەكۇلى باسشىلىق ەتەتىن «ۇردا-جىق» مينيسترلىكتىڭ ءبىراز ءمىنىن جازىپ، سوقىرعا تاياق ۇستاتقانداي كورسەتتىك. «قازاق پوليتسياسىنىڭ ءيميدجىن قالاي كوتەرەمىن» دەپ، دال بولعان تۇرعىمباەۆقا ءدوپ باسىپ، ءدال سەبەبىن كورسەتتىك. تۇرعىمباەۆ تاراپىنان «ءلام-ميم» دەگەن جاۋاپ بولمادى. ونان سوڭ، تۇرعىمباەۆ كومانداسىنداعى «ارداگەرلەر» ارمياسىن دا cىنعا الدىق.  مىز باقپاس ءمينيسترىمىز بۇ جولى دا جاۋاپ جازبادى.

ءجا، ودان دا وتتىك. ەندى مىنە... قازىر تۇرعىمباەۆ باسقاراتىن ءىىم سىننىڭ استىندا وتىر. قايسىبىر جىلى ايدىكتەپ ايتقان رەفورما – پوليتسەيلەردىڭ فورماسى مەن «كروسوۆكاسىن» اۋىستىرۋدان ءارى اسقان جوق. قازاقستان پوليتسياسىنا ايتىلار سىن كوپ. ولاردىڭ ۇردا-جىق ساياساتى مەن اكىرەڭ-مىنەز اڭگىرتاياقشىل، الىمجەتتىك ارەكەتتەرى تۋرالى الەمدىك اقپارات جازىپ، حالىقارالىق ۇيىمدار سىننىڭ توپەسىنە الىپ جاتقانى وتىرىك ەمەس. وعان سەبەپ تە جوق ەمەس! سونىڭ ەڭ ماڭىزدىسى – مەملەكەتتىك ءتىلدىڭ، قازاق ءتىلىنىڭ قىزمەتتىك قولدانىس تىلىنە اينالماۋى.

بۇگىنگى قر ىشكى ىستەر مينيسترلىگىنىڭ قىزمەتتىك ءتىلى قاي ءتىل؟ ارينە، رەسمي ءتىل! كورشى ەلدىڭ مەملەكەتتىك ءتىلى! ورىس ءتىلى! ولاي دەپ توپشىلاۋىمىزدىڭ ءبىر سەبەبى مىنەكەي:

يگور ۆلاديميروۆيچ لەپەحا دەگەن - قر ءىىم اپپاراتىن باسقاراتىن ادام. بىلايشا ايتقاندا ءىىم ىشىندە كادر ماسەلەسىن باقىلايتىن ءداۋ باستىق. قازاقستاننىڭ قاراعاندىسىندا تۋىپ، رەسەيدىڭ ءىىم اكادەمياسىندا وقىپ كەلگەن گەنەرال. بيىل قاراشادا 59-عا تولادى. ەڭبەك ءوتىلى – 1986 جىلدان باستالادى.

نەمەسە كالايچيدي. 58 جاستا. تۇرعىمباەۆتىڭ تاپ قاسىندا باقانداي ەكى جىل ورىنباسار بولىپ ءجۇرىپ، بيىل شىلدەدە عانا پرەزيدەنت اكىمشىلىگىنە اۋىسقان. الەكسەي دميتريەۆيچ كالايچيدي سسر-دىڭ ءىىم اكادەمياسىندا، سوسىن قاراعاندىدا ءبىلىم العان. قىزمەت جولىن قىرعىزدىڭ توكماعىندا باستاعان. ول ءىىم ورىنباسارلىعىندا جۇرگەندە ءدال وسى كادر مەن ءتىل سالاسىنا جاۋاپتى باسشى بولعان. بىلايشا ايتقاندا، ءىىم-ءدى قازاقشا سويلەتپەي كەتكەن ادام دەسەك تە بولادى.

نەمەسە پولكوۆنيك ۆارگو سەرگەي لەونيدوۆيچ. رەسەي فەدەراتسياسىنىڭ گوركي قالاسىندا دۇنيەگە كەلگەن. 2002 جىلعى قىركۇيەكتەن باستاپ قر ءىىم ورتالىق اپپاراتىندا ءارتۇرلى لاۋازىمداردا قىزمەت اتقارعان. 2020 جىلعى قاراشادان باستاپ قر ءىىم اقپاراتتاندىرۋ جانە بايلانىس دەپارتامەنتىنىڭ باستىعى بولىپ تاعايىندالعان.

ەندى وسى اتى دارداي شەندىلەر كۇن سايىن جيىن-كەڭەستەرىن قازاقشا وتكىزەدى دەگەنگە سەنەسىز بە؟ ءبىزدىڭ بىلۋىمىزشە، تۇرعىمباەۆ مىرزا تىزگەندەپ وتىرعان مينيسترلىكتەگى سەلەكتورلىق جيىنداردىڭ دەنى رەسمي تىلدە وتەدى ەكەن. ەسەپتىك، قىزمەتتىك قۇجاتتار رەسمي تىلدە تولتىرىلادى-مىس. باياندامالار جانە ورىس تىلىندە جاسالادى. بۇل ءتىپتى تالاپ بولماسا كانە... اتالعان اقپاراتتىڭ انىق-قانىعىن مينيسترلىك ايتا جاتار. ايتسا ارينە. ويتكەنى، وسىعان دەيىنگى جازعان سىني ماتەريالدارىمىزدىڭ ەشبىرىنە «ءلام-ميم» دەگەن جاۋاپ بولماعان ەدى...

شىندىعىنا كەلگەندە، اتالعان مينيسترلىكتە جالعىز لەپەحالار مەن ۆارگولار قىزمەت ەتپەيدى. وڭتۇستىك جاقتاعى قازاقي وڭىرلەردەن شىققان ازاماتتار دا جوق ەمەس. تەك، ورىس ءتىلىنسىز تاربيەلەنىپ كەلگەن بۇل جىگىتتەردىڭ مينيسترلىكتىڭ ءداۋ دالىزدەرىندەگى ءارى قارايعى كارەراسى سول ورىس تىلىنە كەلىپ تىرەلەتىنى وكىنىشتى-اق... بىلايشا ايتقاندا، قازاق ءتىلدى قازاق پوليتسەيلەرى وزگە تىلدە ءومىر سۇرۋگە ماجبۇرلەنەدى. بۇل قانشالىقتى ادىلدەتتى؟

بۇل جالعىز تۇرعىمباەۆ مينيسترلىگىنە ءتان دەرت ەمەس. قازاقستان حالقىنىڭ 80 پايىزدان استامى قازاق تىلىندە سويلەيتىنىن ءبىز دە، اقوردا بيلىگى دە ايتتى. ەندەشە، تۇرعىمباەۆ مينيسترلىگى قازاق اۋديتورياسىمەن قاي تىلدە سويلەسكەنى ءتيىمدى؟ ارينە، قازاق تىلىندە! وكىنىشكە وراي، جوعارىداعى لەپەحالار مەن ۆارگولاردىڭ قازاق تىلىندە سۇحبات بەرىپ، ەلگە قايرىلۋ جاساعانىن كورگەن ەمەسپىز. وسىدان كەيىن، كەڭەستىك جازالاۋ ءتاسىلىن قاندارىنا ءسىڭىرىپ، توتاليتارلىق جۇيەنىڭ تورىنا شىرمالعان بۇگىنگى قازاقستاننىڭ ىشكى ىستەر مينيسترلىگى حالىقپەن قازاق تىلىندە ديالوگ ورناتا الا ما دەگەن كۇمان تۋادى. كۇن سايىن كورشىنىڭ تىلىندە سويلەپ ۇيرەنگەن مينيسترلىك قازاق ءتىلدى جۇرتتىڭ پروبلەماسىن شەشپەك تۇگىلى، ءسوزىن تۇسىنۋگە دارمەنسىز. ەكى تاراپ - ەكى ءتىلدى. مۇنداي جاعدايدا ارينە – ديالوگ ورنامايدى.

ەل سەنىمىنەن ايىرىلعان ءىىم-ءدى وسى جولعى رەفورما قۇتقارادى دەپ سەنسە، اۋەلى تۇرعىمباەۆ تا، ۆارگو دا، لەپەحا دا قازاقشا سويلەۋى كەرەك! ءىىم-نە قازاق ءتىلدى كادرلار كەلمەي ديالوگ ورنامايدى! بۇل فاكت!

زەينەتكەرلەر رەفورما جاساي الا ما؟

 

سوسىن بۇل سالاعا ءتيىمدى رەفورما جاساۋ ءۇشىن الدىمەن زەينەتكەلەر مەن پوتەنتسيالدى زەينەتكەرلەر ەڭبەك دەمالىسىنا كەتۋى كەرەك!

قازاقستاندا «قۇقىق قورعاۋ قىزمەتى تۋرالى قر زاڭنامالىق اكتىسىنە وزگەرتۋلەر مەن تولىقتىرۋلار ەنگىزۋ» تۋرالى تۋرالى 2013 جىلدىڭ 21 مامىرىنداعى №93-V زاڭى بار. ول زاڭنىڭ 82-بابىندا قۇقىق قورعاۋ ورگاندارىنىڭ ەڭبەك جاسى سوقىرعا تاياق ۇستاتقانداي جازىلعان. قاراڭىز:

*مايور شەندىلەرگە دەيىن جانە كىشى كەڭەسشىلىكتەگى قىزمەتكەرلەرگە – 48 جاسقا،

*پودپولكوۆنيك شەندىلەرگە جانە كەڭەسشىلەرگە – 50 جاسقا،

*پولكوۆنيك شەندىلەرگە جانە جوعارعى كەڭەسشىلەرگە – 55 جاسقا،

*جوعارعى باسشىلىق قۇرامداعى ازاماتتارعا – 60 جاسقا دەيىن قىزمەتتە بولۋعا رۇقسات ەتىلگەن.

«قۇقىق قورعاۋ قىزمەتى تۋرالى» 2011 جىلدىڭ 6 قاڭتارىنداعى № 380-IV قر زاڭىندا دا وسى اقپارات جازىلعان.

ال ەرلان تۇرعىمباەۆ مينيسترلىگىندە جانە وڭىرلەردەگى پوليتسيا دەپارتامەنتتەرى باسشىلىعىندا قانشا ادام زەينەت جاسىنا جەتسە دە، قىزمەتىن جالعاستىرىپ وتىر؟ قاراڭىز:

سونتاەۆ قايرات يماتۇلى

شەنى – گەنەرال-مايور. تولىق جاسى – 60-تا. 2020 جىلعى 13 ناۋرىزدان باستاپ – قازاقستان رەسپۋبليكاسى ىشكى ىستەر ءمينيسترىنىڭ ورىنباسارى.

جوعارعى باسشىلىق قۇرامداعى ازاماتتارعا – 60 جاسقا دەيىن قىزمەتتە بولۋعا رۇقسات ەتىلگەن.

سارسەنوۆا گالينا وردابايقىزى

شەنى – پوليتسيا پولكوۆنيگى. تولىق جاسى – 56-دا. 2011 جىلدان باستاپ قازاقستان رەسپۋبليكاسىنىڭ ىشكى ىستەر مينيسترلىگى ورتالىق اپپاراتىندا جۇمىس ىستەيدى. كوشى-قون قىزمەتى كوميتەتى توراعاسىنىڭ ورىنباسارى.

پولۆوكنيك شەندىلەر 55 جاستان زەينەتكە شىعۋى ءتيىس.

سەراليەۆ الىبەك بولاتۇلى

شەنى – گەنەرال-مايور. تولىق جاسى – 60-تا. 2020 جىلدىڭ 17 قىركۇيەگىنەن باستاپ ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى.

جوعارعى باسشىلىق قۇرامداعى ازاماتتارعا – 60 جاسقا دەيىن قىزمەتتە بولۋعا رۇقسات ەتىلگەن.

سادىقوۆ سەرىك ايتبايۇلى

شەنى – پولكوۆنيك. تولىق جاسى – بيىل جەلتوقساندا 58-گە كەلەدى. ءىىم جەدەل-كريميناليستيكالىق دەپارتامەنتىنىڭ باستىعى.

پولۆوكنيك شەندىلەر 55 جاستان زەينەتكە شىعۋى ءتيىس.

ۇمبەتقاليەۆ قامزا باقتىعاليۇلى

شەنى – پولكوۆنيك. تولىق جاسى – بيىل قىركۇيەكتە 58-گە كەلەدى. اتىراۋ وبلىسى پوليتسيا دەپارتامەنتىنىڭ باسشىسى.

پولكوۆنيك شەندىلەر 55 جاستان زەينەتكە شىعۋى ءتيىس.

ايماعامبەتوۆ بەكەت يمانۇلى

شەنى – گەنەرال-مايور. تولىق جاسى – 61-دە. قوستاناي وبلىسى پوليتسيا دەپارتامەنتىنىڭ باستىعى.

جوعارعى باسشىلىق قۇرامداعى ازاماتتارعا – 60 جاسقا دەيىن قىزمەتتە بولۋعا رۇقسات ەتىلگەن.

ناشاربەكوۆ ءابدۋۆالي ابدۋللاۇلى

شەنى – پولكوۆنيك. تولىق جاسى – 55-تە. الماتى قالالىق پوليتسيا باسقارماسى باستىعىنىڭ ورىنباسارى.

پولكوۆنيك شەندىلەر 55 جاستان زەينەتكە شىعۋى ءتيىس.

جانبەكوۆ ريزاحمەت جاركەنۇلى

شەنى – پولكوۆنيك. تولىق جاسى – 55-تە. اقمولا وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى.

پولكوۆنيك شەندىلەر 55 جاستان زەينەتكە شىعۋى ءتيىس.

ىنتىقباەۆ ارداق قابىكەنۇلى

شەنى – پولكوۆنيك. تولىق جاسى – 55-تە. قوستاناي وبلىسى پوليتسيا دەپارتامەنتى باستىعىنىڭ ورىنباسارى.

پولكوۆنيك شەندىلەرگە جانە جوعارعى كەڭەسشىلەرگە – 55 جاسقا دەيىن قىزمەتتە بولۋعا رۇقسات ەتىلگەن.

دۇيسەمبەكوۆ قايرات سىزدىقۇلى

شەنى – پولكوۆنيك. تولىق جاسى – 58-دە. قوستاناي وبلىسى پوليتسيا دەپارتامەنتى باستىعىنىڭ ورىنباسارى.

پولكوۆنيك شەندىلەرگە جانە جوعارعى كەڭەسشىلەرگە – 55 جاسقا دەيىن قىزمەتتە بولۋعا رۇقسات ەتىلگەن.

داۋلەتباەۆ قاپەز قازيۇلى

شەنى – پولكوۆنيك. تولىق جاسى – 56-دا. سقو پد باستىعىنىڭ ورىنباسارى.

پولكوۆنيك شەندىلەرگە جانە جوعارعى كەڭەسشىلەرگە – 55 جاسقا دەيىن قىزمەتتە بولۋعا رۇقسات ەتىلگەن.

حالىقوۆ باعلان انۋاربەكۇلى

شەنى – پولكوۆنيك. تولىق جاسى – 57-تە. تۇركىستان وبلىسىنىڭ پوليتسيا دەپارتامەنتى باستىعىنىڭ ورىنباسارى.

پولكوۆنيك شەندىلەرگە جانە جوعارعى كەڭەسشىلەرگە – 55 جاسقا دەيىن قىزمەتتە بولۋعا رۇقسات ەتىلگەن.

ءتۇيىن. ءبىز جوعارىدا ەرلان زامانبەكۇلى تىزگىنىن ۇستاعان مينيسترلىكتەگى جوعارعى لاۋازىمدى باسشىلاردىڭ ءبىرسىپىراسىنىڭ ەسىم-سويىن ەرەكشە جازىپ، كورسەتتىك. بۇل اتالعان ازاماتتار زاڭدا كورسەتىلگەن زەينەت جاسىنا تولسا دا، زاڭ ەرەجەسىن ورەسكەل بۇزىپ، قىزمەتتەرىن جالعاستىرىپ كەلە جاتقان ادامدار.

«قر قۇقىق قورعاۋ قىزمەتكەرلەرى تۋرالى» زاڭىنان ناقتى دالەل كەلتىردىك. وعان سۇيەنسەك، جوعارىدا ءبىز اتتارىن اتاپ كورسەتكەن ازاماتتار نەگە قر زاڭىندا كورسەتىلگەن مەرزىمدە زەينەتكە جىبەرىلمەگەن؟ ءبىز ىشكى ىستەر مينيسترلىگى مەن دەپارتامەنت سايتتارىنداعى اشىق دەرەككوزدەرىندە كورسەتىلگەن ءبىرلى-جارىمىن عانا جازدىق. ىزدەي بەرسەڭ ءالى تالايىن تابۋعا بولارى انىق. زاڭعا باعىنۋ الدىمەن ءمينيستردىڭ مىندەتى ەمەس پە؟..

قازاقستان پرەزيدەنتى قاسىم-جومارت كەمەلۇلى «قازاقستان پوليتسياسىنا رەفورما قاجەت» ەكەندىگىن قاداپ ايتتى. ال ەرلان تۇرعىمباەۆ قاراماعىنداعى بۇل زەينەتكەر باسشىلار مەن پوتەنتسيالدى زەينەتكەرلەر پرەزيدەنت مىندەتتەگەن رەفورمانى جۇزەگە اسىرۋعا قاۋقارلى ما؟ بىزشە بولسا جوق! ءبىز رەفورما كۇتەمىز. پرەزيدەنت رەفورما كۇتەدى. ەگەر مينيسترلىك ىشكى ىستەر سالاسىنا رەفورما جاساۋعا دايىن بولسا، الدىمەن مينيسترلىكتى مەملەكەتتىك تىلدە سويلەتۋى كەرەك. ەكىنشى كەزەكتە زەينەتكەر باسشىلاردان قۇرالعان كونە ارميانى ەڭبەك دەمالىسىنا جىبەرۋى كەرەك. ۇشىنشىدەن، تۇرعىمباەۆ مىرزانىڭ ورىنباسارلىعىنا قازاقى تاربيە كورگەن، قازاقشا ءبىلىم العان، قازاقتىڭ ءتىلىن عانا ەمەس، تۇرمىس-سالتىن، ءومىر ءسۇرۋ ەتيكاسىن تۇسىنەتىن ازاماتتار كەلۋى كەرەك. وسىلاي ىستەگەندە عانا، ءىىم مەن حالىق اراسىندا ديالوگ پروتسەسى العا جىلجيتىن بولادى. وسىمەن ءسوز ءتامام.

نۇرگەلدى ابدىعانيۇلى

Abai.kz

17 پىكىر