جەكسەنبى, 26 قىركۇيەك 2021
بيلىك 3853 8 پىكىر 25 شىلدە, 2021 ساعات 13:01

سەناتور: "باياعى جارتاس – سول جارتاس"

قازاقستان رەسپۋبليكاسى پارلامەنتى سەناتىنىڭ دەپۋتاتى اقىلبەك كۇرىشباەۆ فەيسبۋك الەۋمەتتىك جەلىسىندە دەپۋتاتتىق ساۋالدارعا جاۋاپ ناتيجەسى تۋرالى جازدى. وندا بىلاي دەلىنگەن:


پارلامەنتتىڭ وتكەن سەسسياسىندا مەن الەۋمەتتىك-كاسىپكەرلىك كورپوراتسياسىنىڭ (اكك) ساۋدا ورتالىقتارى ارقىلى ازىق-تۇلىك تاۋارلارىنىڭ باعاسىن رەتتەۋ جۇمىسىنىڭ تيىمسىزدىگىن ايتىپ، بىرنەشە رەت دەپۋتاتتىق ساۋال جىبەرگەم.

جۋىردا  بۇل جۇمىستا نە وزگەرگەنىن بىلمەك بولىپ، نۇر-سۇلتان قالاسىنىڭ اكك-نىڭ جۇمىسىمەن تانىستىم. ءىس جۇزىندە كوڭىل كونشىتەتىن وزگەرىستەر جوق. "باياعى جارتاس – سول جارتاس" دەۋگە بولادى.

جولدانعان ساۋالدار ءوز شەشىمىن تاپپاعان. ماسەلەن،

«1) ساۋدا ورتالىقتارىن ىرىكتەۋ قاعيداتى تۇسىنىكسىز، سەبەبى بىرنەشە  ساۋدا ورتالىقتارىنىڭ ىشىنەن تەك كەيبىر تاڭداۋلىلارى عانا ىرىكتەلەدى;
2) ازىق-تۇلىك تاۋارلارىنا باعانىڭ ايتارلىقتاي قۇبىلمالىلىعى كەزىندە تەك ماۋسىمدار بويىنشا عانا ەمەس، جىلدار بويىنشا دا ولاردىڭ ەڭ تومەنگى شەگىن الدىن الا بولجاۋ قيىن;

3) ەگەر ازىق-تۇلىكتىڭ جەكەلەگەن تۇرلەرىنىڭ تۇراقتاندىرۋ قورىنداعى كولەمى قالا تۇرعىندارىنىڭ ەڭ تومەنگى تۇتىنۋ نورماسىنىڭ 0,01-7 پايىزىن عانا قۇراسا، نارىقتى رەتتەۋ تۋرالى نە ايتۋعا بولادى؟

4) مۇنداي سحەما كەزىندە ساۋدا ورتالىقتارى تەك وتاندىق اۋىل شارۋاشىلىعى تاۋارلارىن وندىرۋشىلەردەن ساتىپ الۋدى جۇرگىزۋگە مىندەتتى ەمەس، باسقاشا ايتقاندا، قازاقستاندىق فەرمەرلەر ءوز ونىمدەرىن ساتا المايدى، ال بيۋدجەت قاراجاتى شەتەلدىك فەرمەرلەردى قارجىلاندىرۋعا جۇمسالۋى مۇمكىن;

5) تۇراقتاندىرۋدىڭ مۇنداي تەتىگى «باعانى رەتتەۋگە بارىنشا پارمەندى، بيۋدجەت قاراجاتىن پايدالانۋدىڭ تيىمدىلىگىن ارتتىرادى» دەگەن سەنىمىمىزدى اقتامايدى، وندا سىبايلاس جەمقورلىقتىڭ كورىنىستەرى بار" دەگەن ەدىك.

ءتىپتى، مەن ايتقان وسىنداي ماسەلەلەردىڭ ۇستىنە قوسىلعان جاڭا سۇراقتار بار.

مىسالى، 2011 جىلى ۇكىمەت الەۋمەتتىك ماڭىزى بار ازىق-تۇلىك تۇرلەرىنىڭ 30 ءتۇرىنىڭ باعاسىن رەتتەپ وتىراتىن، ال قازىر تەك 19 (!) ءتۇرىن باقىلاۋعا قاۋقارلى. الەۋمەتتىك-كاسىپكەرلىك كورپوراتسياسى ساۋدا ورتالىقتارىنداعى باعالارعا اپتاسىنا ءبىر رەت قانا مونيتورينگ جۇرگىزەدى ەكەن. سوندا باسقا  كۇندەرى ازىق-تۇلىك باعاسىن كىم باقىلايدى؟ ساۋدا ورتالىقتارىندا الەۋمەتتىك ماڭىزى بار (ياعني، ارزانداتىلعان) تاۋارلار جەكە سورەلەرگە ورنالاستىرىلمايدى. نەلىكتەن؟

قىسقاسىن ايتسام، مەندە جاۋاپتان گورى سۇراقتار كوبەيدى....

ال بيىلعى قۇرعاقشىلىقتان كەيىن جانە باعالاردى الەۋمەتتىك-كاسىپكەرلىك كورپوراتسياسىنىڭ وسىنداي دەڭگەيدەگى رەتتەۋىمەن كۇزدە، قىستا جانە كوكتەمدە قاراپايىم حالىقتىڭ جاعدايى نە بولماق؟

اقىلبەك كۇرىشباەۆ،

قر پارلامەنتى سەناتىنىڭ دەپۋتاتى

Abai.kz

8 پىكىر