سەيسەنبى, 21 قىركۇيەك 2021
2753 8 پىكىر 25 شىلدە, 2021 ساعات 12:35

قىزىلورداداعى قۋاڭشىلىققا 1,7 ملرد تەڭگە بولىنەدى

ەلىمىزدىڭ ماڭعىستاۋ وبلىسى مەن قىزىلوردا وبلىسىندا قۋاڭشىلىق بولىپ، مال قىرىلىپ، ەل جۇتتىڭ الدىندا تۇر. پرەزيدەنت بۇل ماسەلەنى ۇكىمەت وتىرىسىندا كوتەرىپ، بۇرىنعى اۋىل شارۋاشىلىق ءمينيسترىن قىزمەتىنەن الىپ تاستاعان ەدى. حالىق ءوز بەتىنشە كومەك قولىن سوزىپ، ءشوپ ورىپ، قۋاڭشىلىق ايماقتارىنا اتتاندىرىپ جاتىر. بۇل رەتتە "ۇكىمەت ناقتى كومەك كورسەتۋى ءتيىس" دەگەن تالاپتار دا قاتاڭ قويىلۋدا. 

“اق جول” دەمپارتياسىنىڭ ءماجىلىس دەپۋتاتى بەرىك دۇيسەنبينوۆتىڭ تالابى بويىنشا ۇكىمەت قىزىلورداداعى مال ازىعىن ارزانداتۋعا 1,7 ملرد-قا كومەك كورسەتۋدى قاراستىرىپ جاتىر.

ماجىلىستەگى "اق جول" پارتياسىنىڭ دەپۋتاتى بەرىك دۇيسەمبينوۆ 2021 جىلى، شىلدەنىڭ 4 مەن 13 ارالىعىندا قىزىلوردا وبلىسىنا ءىس-ساپارمەن بارعان بولاتىن.

"اق جول" دەپۋتاتى سىر وڭىرىندەگى ارال، قازالى، جاڭاقورعان اۋداندارى مەن وبلىس ورتالىعىنان شالعاي ورنالاسقان بوگەن، جاڭاقۇرىلىس، شاكەن، اسقار، كوكتوبە اۋىلدارى مەن جاڭاقورعان كەنتى، كەيدەن اۋىل وكرۋگىنە بارىپ، اۋىل حالقىمەن، كاسىپكەرلەرمەن، قۇمدا وتىرعان مالشىلارمەن جۇزدەسىپ، جەرگىلىكتى جەردەگى تۇيتكىلدى ماسەلەلەرمەن تانىسىپ، حالىقتىڭ وسى ماسەلەردى شەشۋگە ارنالعان ۇسىنىس-تىلەكتەرىن تىڭداپ، اقىلداستى.

كەزدەسۋدە اۋىل تۇرعىندارى باستى ماسەلە قۋاڭشىلىق، جايىلىمدىق، شابىندىق جەرلەردى سۋلاندىرۋ، ءتورت تۇلىك مالعا قاجەتتى جەم-ءشوپ، جول ماسەلەسى قيىندىق تۋدىرىپ وتىرعانىن ايتقان بولاتىن. بۇگىنگى سىر ەلىندەگى باستى ماسەلە قۋاڭشىلىقتان بولعان مال ازىعىنىڭ تاپشىلىعى مەن سۋ ماسەلەسى بولعاندىقتان، دەپۋتاتتار وزدەرىمەن بىرگە اۋىل شارۋشىلىق مينيسترلىگى مەن سۋ كوميتەتىنىڭ وكىلىن بىرگە الىپ شىققان ەدى.

وسى ءىس-ساپاردا دەپۋتاتتارمەن بىرگە ەل ارالاعان اۋىل شارۋاشىلىق مينيسترلىگىنىڭ وكىلىنەن جاعىمدى جاڭالىق جەتتى. قۋاڭشىلىقتان زارداپ شەگىپ وتىرعان تۇرعىنداردىڭ مال ازىعىنا قولداۋ كورسەتۋ ءۇشىن پرەمەر ءمينيستردىڭ كەڭسەسىنە جەم-ءشوپتى ارزانداتۋعا رەزەرۆتەن 1,7 ملرد. تەڭگە ءبولۋ تۋرالى قاۋلى جوباسى ەنگىزىلگەن. كومەككە مۇقتاج بولىپ وتىرعان سىر مەن ارال حالقىنا بۇل قاراجات كەلەسى اپتادا جەتەدى.

وڭىردەگى اعايىننىڭ كوتەرگەن ماسەلەلەرى ۇكىمەتكە جەتىپ، ناقتى شەشىمدەر قابىلدانىپ جاتقانى قۋانتادى.

Abai.kz

8 پىكىر