ەلىمىزدە كوروناۆيرۋس ىندەتىنە قاتىستى جاعداي تاعى دا ۋشىعىپ تۇر. بۇگىنگى تاڭدا تۇركىستان وبلىسىنان باسقا ون التى ءوڭىر «قىزىل» ايماقتا. الماتى وبلىسىندا ەپيدەميولوگيالىق احۋالدىڭ ناشارلاۋىنا بايلانىستى وبلىستىڭ باس مەملەكەتتىك سانيتارلىق دارىگەرىنىڭ قاۋلىسىمەن 26 شىلدەدەن باستاپ جاڭا شەكتەۋ شارالارى ەنگىزىلەدى.

وعان سەبەپ -الماتى وبلىسىندا سوڭعى تاۋلىكتە 230 ادام ىندەت جۇقتىرعانى بەلگىلى بولدى. وسىدان ەكى اپتا بۇرىن كوروناۆيرۋسپەن اۋىرعاندار سانى تاۋلىگىنە 100 ادامنان اسپايتىن. از ۋاقىتتا ۆيرۋس جۇقتىرعاندار سانى ەكى ەسەگە ءوسىپ وتىر.

الماتى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنە سۇيەنسەك، وبلىس ىشىندەگى ەلدى مەكەندەردىڭ وزدەرى ىندەتتىڭ تارالۋىنا بايلانىستى قىزىل، سارى، جاسىل ايماقتارعا بولىنەدى. مىسالى، ەپيدەميولوگيالىق ماتريتسا باعالاۋى بويىنشا، كوۆيد ەڭ كوپ تىركەلگەن ەسكەلدى مەن تالعار اۋدانى، تەكەلى مەن تالدىقورعان قالاسى «قىزىل»، ىلە، قاراتال اۋداندارى «سارى»، قالعان قالالار مەن اۋداندار «جاسىل» ايماقتا.

پاندەميا باستالعالى الماتى وبلىسىسىندا پتر ناتيجەسى وڭ كورسەتكەن 30 323 ناۋقاس تىركەلىپ، ولاردىڭ 27 803-ءى ىندەتتەن جازىلىپ شىقتى. وبلىستىق دەنساۋلىق ساقتاۋ باسقارماسىندا ايتقانداي، وڭىردە قازىر بارلىعى 379 ادام ستاتسيونارلىق ەم قابىلداپ جاتىر. اۋرۋحانالارداعى توسەك قورىنىڭ 48,6 پايىزى پايدالانىلۋدا. ءبىر تاۋلىكتە اۋرۋحانالاردان 11 پاتسيەنت شىعارىلدى. وتكەن جىلدىڭ تامىزىنان بەرى انىقتالماعان پنەۆمونيانىڭ 5263 جاعدايى تىركەلسە، سوڭعى تاۋلىكتە - 11 جاعداي انىقتالعان. ولارمەن بايلانىستا بولعان 10 ادام مەديتسينالىق باقىلاۋعا الىنىپ، ءۇي كارانتينىنە جابىلدى.

مامانداردىڭ ايتۋىنشا، نەگىزىنەن، كۆي جانە «دەلتا» تۇرلەنگەن ۆيرۋستارى ۆاكتسينالانباعان تۇرعىندار اراسىندا تىركەلگەن. وسىدان-اق جۇقپالى ۆيرۋستىڭ الدىن الۋدىڭ ەڭ ءتيىمدى جولى – ۆاكتسينا سالدىرۋ ەكەنىن اڭعارۋ قيىن ەمەس.

مەملەكەت باسشىسى قاسىم-جومارت توقاەۆ ەلىمىزدەگى ەپيدەميولوگيالىق احۋال جونىندە وتكىزگەن كەڭەستە وتكىزدى سوڭعى كەزدە ىندەت جۇقتىرعان ادامداردىڭ سانى كۇرت ارتىپ كەتكەنىن اتاپ وتكەن بولاتىن. كۇن سايىن 5 مىڭنان استام ناۋقاس تىركەلۋدە. ءبىر اپتا بۇرىن ۇكىمەت احۋالدى باقىلاۋدا ۇستاپ وتىرمىز دەپ مالىمدەگەن بولاتىن. بىراق ەپيدەميولوگيالىق جاعداي ناشارلاپ كەتتى. اۋىر جاعدايداعى ناۋقاستاردىڭ سانى كۇن سايىن كوبەيىپ بارادى.

– ەڭ باستىسى – اسا اۋىر ناۋقاستاردىڭ كوبەيۋىن بولدىرماۋ، ادام ءومىرىن ساقتاۋ. سوندىقتان، ونىڭ ءبىر عانا جولى بار. بۇل – جاپپاي ۆاكتسيناتسيا، ەكپە سالۋ. قالىپتاسقان احۋالدىڭ وتە كۇردەلى ەكەنىن اشىق ايتۋ كەرەك. پاندەميا ءوڭىر باسشىلارى ءۇشىن ناعىز سىناق بولدى. بۇل سىناقتى كەم دەگەندە اكىمدەردىڭ جارتىسى، ەڭ جاقسى دەگەندە، «ۇشكە» تاپسىرادى. وسىنداي جاعدايدا ۇكىمەتتىڭ ۇيلەستىرۋشىلىك ءرولى بىرنەشە ەسە ارتا تۇسەدى. بۇل جەردە سىرتتان تون ءپىشىپ وتىراتىنداردىڭ پىكىرى ماڭىزدى ەمەس. ۇكىمەت پەن ءتيىستى ۆەدومستۆولاردىڭ ۇيلەستىرۋشىلىك ءرولىن كۇشەيتۋ قاجەت، – دەگەن ەدى سول جولى پرەزيدەنت.

الماتى وبلىسى دەنساۋلىق ساقتاۋ باسقارماسىنىڭ كوروناۆيرۋسقا قارسى ەكپە سالۋ تۋرالى مالىمەتتەرىنە سۇيەنسەك،  بۇگىندە وڭىردە 244 ەكپە پۋنكتى جۇمىس ىستەيدى، 71 ءموبيلدى توپ، 17 جىلجىمالى مەديتسينالىق كەشەن بار. ايماقتا ۆاكتسينا قۇتىلارىن ساقتايتىن 153 مۇزداتىلعان كامەرا ورناتىلعان. سونداي-اق، 272 بەلسەندى اۆتومۇزداتقىش ىسكە قوسىلعان. سوڭعى اقپارات بويىنشا، الماتى وبلىسىنا ۆاكتسينانىڭ ءبىرىنشى كومپونەنتىنەن 544 310 دوزا جەتكىزىلگەن. ال ەكىنشى كومپونەنتتەن 379 990 دوزا بار.

سoronavirus2020.kz مالىمەتى بويىنشا، قازىرگى تاڭدا الماتى وبلىسىنىڭ 517 مىڭ 457 تۇرعىنى ەكپەنىڭ ءبىرىنشى كومپونەنتىن ەكتىرگەن. ەكى كومپونەنتىن دە سالدىرعان ادامدار سانى 300 مىڭنان استى. ۆاكتسينالانعاندار سانى بويىنشا پەداگوگتار (37 594) جانە مەديتسينا قىزمەتكەرلەرى (23 167) كوش باستاپ تۇر. سالالىق باسقارمانىڭ ماماندارى ايماقتا ەكپە الۋ بويىنشا اقپاراتتىق ءتۇسىندىرۋ جۇمىستارى جان-جاقتى جۇرگىزىلىپ جاتقانىن ايتادى. تەلەارنانىڭ تىكەلەي ەفيرىندە 60-تان استام ماتەريال دايىندالعان، 40 شاقتى سيۋجەت كورسەتىلدى. رەسپۋبليكالىق جانە ايماقتىق گازەتتەردە 500-دەن استام ماقالا جاريالاندى. 800 مىڭنان استام جادىناما، ءتۇسىندىرۋ پاراقتارى تاراتىلىپتى.

ىندەتپەن كۇرەسۋ ماقساتىندا وبلىستا جەرگىلىكتى اتقارۋشى ورگاندار جانىندا 268 مونيتورينگتىك توپ جۇمىس ىستەيدى. ولار حالىقتىڭ سانيتارلىق-ەپيدەمياعا قارسى جانە سانيتارلىق-پروفيلاكتيكالىق شارالاردى ساقتاۋىن باقىلايدى. جىل باسىنان بەرى مونيتورينگتىك توپتار 22 مىڭنان استام رەيد جۇرگىزدى، 127 مىڭ نىساندى تەكسەرگەن. ناتيجەسىندە كارانتين رەجيمىن بۇزۋدىڭ 1082  فاكتىسى انىقتالدى.

- 590 نىسانعا 69 ميلليوننان استام سوماعا اكىمشىلىك جازالار قولدانىلدى، ونىڭ ىشىندە، 149-ى جاپپاي وتباسىلىق جانە ۇجىمدىق ءىس-شارالاردى (توي، ۇزاتۋ، قۇدالىق جانە تۋعان كۇندەر) وتكىزۋ بويىنشا قوعامدىق تاماقتانۋ وبەكتىلەرىنە سالىندى. بەتپەردە رەجيمىن ساقتاماعانى ءۇشىن جەكە تۇلعالارعا 430 حاتتاما جانە وتباسىلىق ءىس-شارالاردى وتكىزگەنى ءۇشىن 40 حاتتاما تولتىرىلدى، - دەپ حابارلادى سەس وكىلدەرى.

دۇيسەنبىدەن باستاپ الماتى وبلىسىندا «Ashyq» جوباسىنا قاتىساتىن قوعامدىق تاماقتانۋ وبەكتىلەرى، فۋدكورتتاردىڭ جۇمىسىنا ساعات 20:00-گe دەيىن، «Ashyq» جوباسىنا قاتىسپايتىنداردىڭ قىزمەتىنە ساعات 17:00-گe دەيىن; «Ashyq» جوباسىنا قاتىساتىن فيتنەس-ورتالىقتار، فيتنەس-كلۋبتار، يوگا، سپورتتىق-ساۋىقتىرۋ وبەكتىلەرى، ساۋنالار، سپا-ورتالىقتار، سپورت وبەكتىلەرى، باسسەيندەر ساعات 20:00-گe دەيىن، «Ashyq»-قا قاتىسپايتىندارعا ساعات 17:00-گe دەيىن شەكتەۋ قويىلادى.

«Ashyq» جوباسىنا قاتىسۋىنا قاراماستان، سەنبى جانە جەكسەنبى كۇندەرى  قوعامدىق كولىكتەر جۇرمەيدى، جوعارىداعى نىسانداردىڭ ەشقايسىسى جۇمىس ىستەمەيدى.  سونداي-اق، «Ashyq» جوباسىنا قاتىسۋىنا قاراماستان اشىق جانە جابىق جاعاجايلار، اكۆاپاركتەر مەن اتتاركتسيونداردىڭ قىزمەتى توقتاتىلادى.

Abai.kz