بەيسەنبى, 28 ناۋرىز 2024
بيلىك 3816 0 پىكىر 23 شىلدە, 2021 ساعات 14:20

پرەزيدەنت توقاەۆ ارداگەر ءجۋرناليستى قۇتتىقتادى

بۇگىن، 23 شىلدەدە الماتى قالاسىنداعى «دوستىق ۇيىندە» اقپارات جانە قوعامدىق دامۋ ءمينيسترى ايدا بالاەۆا قازاقستاننىڭ ەڭبەك سىڭىرگەن مادەنيەت قايراتكەرى، ارداگەر جۋرناليست ءحانىمبۇبى اقجولوۆانىڭ 100 جاسقا تولۋىنا بايلانىستى مەرەيتوي يەسىنە مەملەكەت باسشىسى قاسىم-جومارت توقاەۆتىڭ ارنايى العىس حاتىن تابىستادى.

«ءسىز عيبراتتى عۇمىر جولىڭىزدىڭ بۇگىنگى ءبىر عاسىرلىق بەلەسىنە ۇلكەنگە دە، جاسقا دا ۇلگى بولاتىن ادامي بيىك بولمىسىڭىزبەن جەتىپ وتىرسىز. وتاندىق ءباسپاسوز سالاسىندا كوپ جىل قاجىرلى قىزمەت ەتىپ، ەلىمىزدىڭ بۇقارالىق اقپارات قۇرالدارىن دامىتۋعا وراسان زور ەڭبەك ءسىڭىردىڭىز. ەل يگىلىگى ءۇشىن اتقارعان جەمىستى جۇمىسىڭىز ءۇشىن سىزگە العىسىمدى ءبىلدىرىپ، 100 جاسقا تولعان مەرەيتويىڭىزبەن شىن جۇرەكتەن قۇتتىقتايمىن. دەنىڭىزگە ساۋلىق، اۋلەتىڭىزگە اماندىق تىلەيمىن», – دەلىنگەن العىس حاتتا.

سونىمەن قاتار مينيستر ءوز سوزىندە مەرەيتوي يەسىنە: «ءسىز بۇكىل سانالى عۇمىرىڭىزدى – قازاق جۋرناليستيكاسىنىڭ دامۋىنا ارنادىڭىز. سوندىقتان ءوزىڭىزدىڭ ءتول سالاڭىز – ءباسپاسوز زامانمەن بىرگە ءوسىپ-وركەندەپ، ءوز ورنىن جوعالتپاي كەلەدى. مۇنىڭ ءوزى ەڭ الدىمەن وزىڭىزدەي ارداگەر-جۋرناليستەر سالعان سارا جولدىڭ جەمىستى جالعاسى ەكەنى داۋسىز. سوندىقتان بۇگىنگى مەرەيتويىڭىز اۋلەتىڭىزدىڭ عانا ەمەس، ءبىزدىڭ ۇلتتىق جۋرناليستيكانىڭ ورتاق قۋانىشى»، - دەپ اتاپ ءوتتى.

ءوز كەزەگىندە ءحانىمبۇبى اقجولوۆا مەملەكەت باسشىسىنىڭ ىستىق ىقىلاستى قۇتتىقتاۋىنا ريزاشىلىعىن بىلدىرە وتىرىپ «ءبىر عاسىر بيىگىندە» اتتى جاڭا كىتاپتىڭ ءبىر داناسىن پرەزيدەنتكە جولدادى.

ءحانىمبۇبى اقجولوۆا الماتى وبلىسىندا دۇنيەگە كەلگەن. قازاقستانعا ەڭبەگى سىڭگەن مادەنيەت قايراتكەرى، ارداگەر جۋرناليست.

1944 جىلى قازمۋ-ءدىڭ فيلولوگيا فاكۋلتەتىنىڭ جۋرناليستيكا بولىمىنە وقۋعا ءتۇسىپ، ادەبيەتتانۋشى، پروفەسسور ءمۇسىلىم بازارباەۆ، اتاقتى عالىم، جازۋشى-جۋرناليست مۇقان ماماجانوۆ، جازۋشى كەمەل توقاەۆ سىندى بولاشاق تانىمال تۇلعالارمەن قاتار وقىپ، ءبىلىم العان.

1949 جىلى ءبىلىم ورداسىن قىزىل ديپلوممەن ءتامامداپ، «سوتسياليستىك قازاقستان» («ەگەمەن قازاقستان») رەسپۋبليكالىق گازەتىندە ۇزاق جىلدار بويى قىزمەت اتقارعان. كەيىننەن تۋعان جەرىنە ورالىپ، جامبىل اۋداندىق «بولشەۆيكتىك جول» («ەكپىندى ەڭبەك») گازەتىنە رەداكتور بولىپ تاعايىندالىپ، قاجىرلى ەڭبەك ەتەدى. 1971 جىلى زەينەت جاسىنا جەتىپ، «قازاقستانعا ەڭبەگى سىڭگەن مادەنيەت قايراتكەرى» قۇرمەتتى اتاعىن يەلەنگەن. الماتى وبلىسىنىڭ قۇرمەتتى ازاماتى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3528