قازاقستاننىڭ ۇلتتىق قۇراماسى توكيو وليمپياداسىنا اتتاندى. قازاقستاننىڭ وليمپيادالىق قۇرامىنىڭ نەگىزگى بولىگى 16 شىلدە كۇشى الماتىدان توكيوعا ۇشقان. ۇزىن-سانى 128 ادام. ولاردىڭ قاتارىندا سپورتشىلار، باپكەرلەر، دارىگەرلەر، عىلىمي-كەشەندى توپ مۇشەلەرى، وليمپياداداعى قازاقستان ميسسياسىنىڭ وكىلدەرى بار. بۇل تۋرالى قر ۇلتتىق وليمپيادا كوميتەتىنىڭ ءباسپاسوز قىزمەتى حابارلادى.

توكيوعا «اقبۇلاق» وليمپيادالىق بازاسىنان كاراتەشىلەر، ساداق اتۋشىلار، ۇستەل تەننيسى مەن سەمسەرلەسۋ كومانداسى، اۋىر اتلەتتەر مەن بوكسشىلار اتتاندى. وزگە دە جاتتىعۋ بازالارىنان ءجۇزۋ سپورتىنىڭ، سۋ دوبى سپورتىنىڭ وكىلدەرى، جەڭىل اتلەتتەر، ۆەلوشاباندوزدار، ستەند اتۋ مەن نىسانا كوزدەۋدەن قۇراما كوماندالار، سونداي-اق، دزيۋدوشىلار توكيوعا جول تارتتى.

اتلەتتەر ەكى اپتالىق كارانتيندە بولىپ، سوڭعى جاتتىعۋ جيىندارىن الماتى قالاسى مەن الماتى وبلىسىندا وتكىزدى. ويىن قارساڭىنداعى سوڭعى كۇندەردى سپورتشىلار وقشاۋلانۋ رەجيمىندە وتكىزگەن.

«ءبىز وليمپيادا ويىندارىنا قاتىسۋشى سپورتشىلاردىڭ قاۋىپسىزدىگىنە باعىتتالعان حوك پەن توكيو-2020 ۇيىمداستىرۋ كوميتەتىنىڭ بارلىق تالاپتارىن ورىندادىق. ۇلتتىق وليمپيادالىق كوميتەت پەن ۇلتتىق فەدەراتسيالار سپورتشىلاردىڭ ساپالى ءارى قاۋىپسىز دايىندالۋىنا بار جاعدايدى جاسادى.  ءبىزدىڭ كومانداداعى 96 سپورتشى ورتاق ەڭبەگىمىزدى جەمىسى. سپورتشىلار مەن باپكەرلەرگە، سونداي-اق، سپورتتىق دارىگەرلەرگە بىرلەسكەن جۇمىسى ءۇشىن راحمەت ايتامىز»، - دەلىنگەن ۇلتتىق وليمپيادالىق كوميتەتىنىڭ جازباسىندا.

وليمپيادالىق قۇرامنىڭ قالعان بولىگى 28 شىلدەگە جوسپارلانعان ەكىنشى رەيسپەن ۇشادى. وندا 43 ادام بار. ولار بالۋاندار، كوركەم گيمناستيكادان قازاقستان كومانداسى، ارتىستىك ءجۇزۋ، بەسسايىس جانە جەڭىل اتلەتتەردىڭ قالعان جارتىسى.

8 شىلدەدەن باستاپ جاپونياداعى وليمپيادا ويىندارىنداعى قازاقستان ميسسياسى جۇمىسىن باستاعان.

وليمپيادا اۋىلىنداعى تىرشىلىك تە كارانتين تالاپتارىنا ساي بولماق. ءتۇرلى ەل كوماندالارىنىڭ، ءارتۇرلى سپورت تۇرلەرىندەگى اتلەتتەردىڭ ءوزارا بايلانسۋىنا تىيىم سالىنعان. وليمپيادالىق اۋىل مەن جاتتىعۋ جانە سپورت زالدارىنىڭ اراسىنداعى مارشرۋتتان اۋىتقۋعا بولمايدى، قوعامدىق كولىكتى پايدالانۋعا رۇقسات جوق. كوروناۆيرۋسقا بايلانىستى كۇن سايىن تەست تاپسىرۋ مىندەتتى سانالادى. سونىمەن قاتار، سپورتشىلاردىڭ جۇرگەن ورنى مەن دەنساۋلىق جاعدايىن باقىلايتىن بىرنەشە قوسىمشالاردى ۇيالى تەلەفونعا ورناتۋ مىندەتتەلەدى.

قازاقستان وليمپيادالىق كومانداسىنىڭ ساپىندا 97 ليتسەنزيا جەڭىپ العان 96 سپورتشى بار.

وليمپيادا ويىندارىنىڭ اشىلۋ سالتاناتى 23 شىلدە كۇنى نۇر-سۇلتان ۋاقىتىمەن 17:00-دە باستالادى.

تاقىرىپقا تۇزدىق:

دزيۋدودان ريو وليمپياداسىنىڭ كۇمىس جۇلدەگەرى ەلدوس سمەتوۆتوكيوعا ۇشار الدىندا قازاقستان حالقىنا ۇندەۋ ايتىپتى.

«قۇرمەتتى جانكۇيەرلەر! بۇگىن ءبىز ەڭ ماڭىزدى جارىسقا – توكيو وليمپياداسىنا اتتانىپ بارامىز. ءبىز ەلىمىزدىڭ كوك تۋى جەڭىس تۇعىرىندا جەلبىرەۋى ءۇشىن قولىمىزدان كەلگەننىڭ بارلىعىن جاسايمىز. ال سىزدەر، ءبىزدىڭ قولداڭىزدار! سىزدەردىڭ قولداۋلارىڭىز كەرەك. بۇل ءبىز ءۇشىن وتە ماڭىزدى»، - دەپتى سمەتوۆ.

سپورتتاعى ەڭ بيىك شىڭ -  وليمپيادا ويىندارى. اتالعان ءدۇبىرلى دودا ءتورت جىلدا ءبىر وتەدى. بيىل الەمدىك پاندەمياعا بايلانىستى مەرزىمىنەن كەشىكتىرىلىپ وتكىزىلۋدە. الەمنىڭ ءار تۇكپىرىنەن كەلگەن مىڭداعان سپورتشى ءدال وسى بيىكتى باعىندىرۋ ءۇشىن بارىن سالادى. وليمپيادا ويىندارىنا ەلىمىز سپورتشىلارى تاۋەلسىزدىك العالى التى مارتە قاتىستى. ءارى ەشقاشان مەدالسىز قايتىپ كورگەن جوق. ايتا كەتەيىك، 1992 جىلعى بارسەلوناداعى جازعى وليمپيادا ويىندارىندا قازاقستاندىق سپورتشىلار تمد-نىڭ بىرىككەن قۇراماسى ساپىندا ونەر كورسەتتى.

ەلىمىز سپورتشىلارى جازعى وليمپيادا ويىندارىندا 1996 جىلدان بەرى جالپى 64 مەدال جەڭىپ الدى. بۇنىڭ 19-ى التىن، 20-سى كۇمىس، 25-ءى قولا مەدال. ال قىسقى وليمپياداعا 1994 جىلدان بەرى قاتىسىپ ءجۇرمىز. بۇل جارىستا قازىرگە دەيىن جەتى جۇلدە جەڭىپ الدىق. اتاپ ايتقاندا 1 التىن، 3 كۇمىس، 3 قولا مەدالگە قول جەتكىزدىك.

قازاقستان قۇراماسى ازيا ويىندارىنا 1994 جىلدان بەرى قاتىسىپ كەلەدى. سودان بەرى وتكەن التى كەزەكتى ازيادادا ەلىمىز سپورتشىلارى جالپى 557 مەدالگە قول جەتكىزدى. بۇنىڭ ىشەندە 155 التىن، 158 كۇمىس، 244 قولا مەدال بار. ال قىسقى ازيا ويىندارىنداعى كورسەتكىشىمىز مىناداي: 69 التىن، 51 كۇمىس، 44 قولا جيىنى 164 مەدال.

قازاقستان تاۋەلسىز ەل رەتىندە قاتىسقان العاشقى وليمپيادا - 1994 جىلى نورۆەگيانىڭ ليللەحاممەر قالاسىندا وتكەن XVII قىسقى وليمپيادا ويىندارى بولاتىن. قازاقستاننىڭ ءانۇرانىن وليمپ شىڭىندا تۇڭعىش رەت ۆلاديمير سميرنوۆ شىرقاتتى. اتاقتى شاڭعىشى سول كەزدە ءبىر ءوزى ءبىر التىن، ەكى كۇمىس مەدال جەڭىپ الدى.

سودان بەرى تاۋەلسىز قازاقستان تاريحىندا قول جەتكىزگەن سپورتتىق جەتىستىكتەرىمىز از ەمەس. الەمدىك ارەنالاردا جەڭىپ العان جۇلدەلەر ەل مەرەيىن ۇستەم ەتۋگە سەپتىگىن تيگىزەتىنى شىن. سپورتشىلارىمىز حالىقارالىق ءىرى دودالاردا توپ جارعان كەزدە بوركىمىزدى اسپانعا اتىپ قۋاناتىنىمىز وسىنىڭ دالەلى.

Abai.kz