ءبىلىم جانە عىلىم مينيسترلىگى مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىلارى مەن پەداگوگتەرىن قىزمەتكە تاعايىنداۋ، قىزمەتتەن بوساتۋ ەرەجەلەرىن جاساپ شىعاردى. 

اۋدانداردىڭ جانە وبلىستىق ماڭىزى بار قالالاردىڭ ءبىلىم بولىمدەرى مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىلارىنىڭ بوس نەمەسە ۋاقىتشا بوس لاۋازىمدارى پايدا بولعان كەزدە ءۇش جۇمىس كۇنى ىشىندە وبلىستاردىڭ جەرگىلىكتى اتقارۋشى ورگاندارىنا كونكۋرس وتكىزۋ تۋرالى ءوتىنىش ەنگىزەدى.

ءبىرىنشى باسشى لاۋازىمىنا تاعايىنداۋعا ارنالعان كونكۋرستى ۆەدومستۆو نەمەسە مينيسترلىكتىڭ قۇرىلىمدىق بولىمشەسى نەمەسە وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارى جاريالايدى.

كونكۋرس وتكىزۋ تۋرالى حابارلاندىرۋ مەملەكەتتىك ءبىلىم بەرۋ ۇيىمىنىڭ ءبىرىنشى باسشىسىنىڭ بوس نەمەسە ۋاقىتشا بوس لاۋازىمى پايدا بولعان كۇننەن باستاپ 15 جۇمىس كۇنىنەن كەشىكتىرىلمەي جاريالانادى.

ءبىرىنشى باسشى لاۋازىمىنا ۇسىنىلعان ۇمىتكەرلەر ءوتىنىش پەن قۇجاتتارىن مەملەكەتتىك كورپوراتسيا نەمەسە مينيسترلىك كانتسەليارياسى ارقىلى تاپسىرادى.

بايقاۋ بىرنەشە كەزەڭنەن تۇرادى:

كونكۋرس جاريالاعان مەملەكەتتىك ورگاننىڭ رەسمي ينتەرنەت-رەسۋرسىندا، الەۋمەتتىك جەلىلەردىڭ رەسمي اككاۋنتتارىندا كونكۋرس وتكىزۋ تۋرالى حابارلاندىرۋدى جاريالاۋ;
كونكۋرسقا قاتىسۋعا نيەت بىلدىرگەن جەكە تۇلعالاردان قۇجاتتاردى قابىلداۋ;
كونكۋرسقا قاتىسۋشىلاردىڭ قۇجاتتارىن بىلىكتىلىك باعالاۋ;
زاڭنامانى، باسقارۋشىلىق قۇزىرەتتەردى، پەداگوگيكا جانە پسيحولوگيا نەگىزدەرىن بىلۋگە ارنالعان ۇلتتىق بىلىكتىلىك تەستىلەۋ;
مەملەكەتتىك ءبىلىم بەرۋ ۇيىمىنىڭ قامقورشىلىق كەڭەسىمەن كانديداتتاردىڭ كەلىسۋى;
مەكتەپكە دەيىنگى، ارنايى (پسيحولوگيالىق-مەديتسينالىق-پەداگوگيكالىق كونسۋلتاتسيا، پسيحولوگيالىق-پەداگوگيكالىق تۇزەتۋ كابينەتى، وڭالتۋ ورتالىعى), قوسىمشا ءبىلىم بەرۋ ۇيىمىنىڭ، قىلمىستىق-اتقارۋ جۇيەسى كوميتەتى جانىنداعى ءبىلىم بەرۋ ۇيىمىنىڭ باسشىسى لاۋازىمىنا ورنالاسۋعا ۇمىتكەر كانديداتقا قاتىستى قامقورشىلىق كەڭەسپەن كەلىسۋ جۇرگىزىلمەيدى.
وبلىستىڭ، رەسپۋبليكالىق ماڭىزى بار قالالاردىڭ جانە استانانىڭ ءبىلىم باسقارماسىنىڭ كونكۋرستىق كوميسسياسىنىڭ وتىرىسىندا سۇحباتتان ءوتۋ.

قۇجات 28 شىلدەگە دەيىن كوپشىلىك تالقىلاۋعا ۇسىنىلىپ، “اشىق نقا” سايتىندا جاريالاندى.

بايقاۋدىڭ ناتيجەرى بويىنشا، مەملەكەتتىك ءبىلىم بەرۋ ۇيىمىنىڭ ءبىرىنشى باسشىسى 5 جىلدىق مەرزىمگە تاعايىندالادى. وسى ۋاقىت بىتكەن سوڭ ەڭبەك كەلىسىمشارتتارى قر ەڭبەك زاڭى نەگىزىندە قاراستىرىلادى.

وسىعان دەيىن ءبىلىم جانە عىلىم ءمينيسترى اسحات ايماعامبەتوۆ مەكتەپ ديرەكتورلارى شەكسىز ەڭبەك شارتتارىن جاساتىپ، ءبىر ورىندا ون جىلداپ وتىرا بەرەتىنىن ايتقان. وسىعان بايلانىستى ديرەكتورلاردى تاعايىنداۋدىڭ جاڭا ەرەجەلەرى جاسالادى دەپ حابارلانعان ەدى.

Abai.kz