سەيسەنبى, 21 قىركۇيەك 2021
بيلىك 1611 2 پىكىر 15 شىلدە, 2021 ساعات 20:25

اكىم سايلاۋى: قازاقستاندا كانديداتتاردى تىركەۋ اياقتالدى

اۋداندىق ماڭىزى بار قالالاردىڭ، اۋىلداردىڭ، كەنتتەردىڭ، اۋىلدىق وكرۋگتەردىڭ 730 اكىمىن سايلاۋعا تۇسەتىن ۇمىتكەرلەردى تىركەۋ اياقتالدى. 

كانديداتتاردى ۇسىنۋ 9 شىلدە ساعات 18:00-گە دەيىن جالعاسسا، ولاردى تىركەۋ 14 شىلدە كۇنى جەرگىلىكتى ۋاقىتپەن ساعات 18.00-دە اياقتالدى جانە بىردەن ۇگىت-ناسيحات جۇمىستارى باستالدى. زاڭعا ەنگىزىلگەن وزگەرتۋلەر مەن تۇزەتۋلەر بويىنشا، ۇگىت-ناسيحات 24 شىلدە ساعات 00.00-گە دەيىن جالعاسادى.

ناۋقان باستالعالى بەرى رەسپۋبليكا بويىنشا ەكى مىڭنان استام ۇمىتكەر تىركەلگەن. سايلاۋ جاريالانعان وكرۋگتەر سانىنىڭ كوپتىگىنە بايلانىستى كانديداتتاردىڭ ەڭ كوبى اقمولا، قاراعاندى، الماتى جانە شىعىس قازاقستان وبلىستارىندا ۇسىنىلدى. كانديداتتاردىڭ ەڭ ازى ماڭعىستاۋ، اتىراۋ جانە باتىس قازاقستان وبلىستارىندا.

ايتا كەتەيىك، 25 شىلدەدە ەلىمىزدىڭ بىرقاتار وڭىرىندە اكىمدەردىڭ سايلاۋى باستالادى. سايلاۋ ناۋقانىنىڭ جالپى مەرزىمى – 30 كۇن. ال ءىس باسىنداعى اكىمنىڭ وكىلەتتىك مەرزىمى اياقتالعان جاعدايدا سايلاۋ 40 كۇن بۇرىن جاريالانادى جانە جۇمىس ىستەپ تۇرعان اكىمنىڭ وكىلەتتىك مەرزىمى اياقتالعانعا دەيىن 10 كۇن بۇرىن ءوتۋى ءتيىس.

2021 جىلدان باستاپ اۋىل اكىمدەرىنىڭ تىكەلەي سايلاۋىن وتكىزۋ تۋرالى پرەزيدەنت قاسىم-جومارت توقاەۆتىڭ «قازاقستان جاڭا ناقتى احۋالدا: ءىس-قيمىل ۋاقىتى» اتتى جولداۋىندا تاپسىرما بەرىلگەن بولاتىن.

رەسمي ستاتيستيكا بويىنشا، قازاقستان حالقىنىڭ 40%-دان استامى اۋىلدىق ەلدى مەكەننىڭ تۇرعىنى رەتىندە تىركەلگەن. ياعني اۋىلدىق اۋماقتاردى باسقارۋدىڭ ءتيىمدى تەتىگىن قالىپتاستىرۋ ىسىنە قازاقستان ازاماتتارىنىڭ 40%-دان استامى اتسالىسپاق.

Abai.kz

2 پىكىر